ސަރަހައްދުގައި އެމެރިކާ އަށް ހިމާޔަތެއް ނޯންނާނެ ކަމަށް ވިދާޅުވެ، އީރާންގެ ރޫހީ ލީޑަރުގެ އިންޒާރެއް

މެދު އިރުމަތީގެ ސަރަހައްދުގައި އެމެރިކާ އަށް އެއްވެސް ހިމާޔަތެއް ނޯންނާނެ ކަމަށް ވިދާޅުވެ، އީރާންގެ ރޫހީ ލީޑަރު މުޖުތަބާ ޚާމަނާއީ ވަރުގަދަ އިންޒާރެއް ދެއްވައިފި އެވެ.

މުޖުތަބާ ޚާމަނާއީ މިހެން ވިދާޅުވެފައި މި ވަނީ، އެމެރިކާ އިން އީރާންގެ ބަނދަރު އައްބާސް އަށް އަމާޒުކޮށް ހަމަލާ ތަކެއް ދީފައި ވަނިކޮށެވެ. އެމެރިކާ އިން ބަނދަރު އައްބާސް އަށް ހަމަލާ ދީފައި ވަނީ، އެމެރިކާ އާއި އީރާންއާ ދެމެދު ސުލްޙަ ޤާއިމު ކުރުމަށް މަޝްވަރާ ކުރަމުން އަންނަނިކޮށެވެ. 

މުޖުތަބާ ޚާމަނާއީ ވިދާޅުވީ، އެމެރިކާގެ ބޭސް ތަކަށް ރައްކާތެރިކަން ދިނުމަށް ސަރަހައްދީ ބާރު ތަކަަށް އެއްވެސް ފުރުސަތެއް ނޯންނާނެ ކަމަށާއި، އެ ސަރަހައްދުގައި އެމެރިކާ އަށް އެއްވެސް ހިމާޔަތެއް ނޯންނާނެ ކަމަށެވެ. އެކަން ފާހަގަ ކުރައްވައި ޚާމަނާއީ ވިދާޅުވީ، ސަރަހައްދުގައި އެމެރިކާ އިން ހިންގާ އެއްވެސް ހަރަކާތަކަށް ސަރަހައްދީ ޤައުމު ތަކުގެ ތާއީދު އޮންނާނެ ކަމަށް ނުބެލެވޭ ކަމަށެވެ. 

މީގެ އިތުރުން ޚާމަނާއީ ވިދާޅުވީ، އެ ސަރަހައްދުގައި އެމެރިކާ އިން ހިންގަމުން އަންނަ ޙަރަކާތްތައް ހުއްޓުވަން ޖެހޭ ކަމަށެވެ. އެމެރިކާގެ ސިޔާސަތު ތަކަކީ ސަރަހައްދުގެ ސުލްޙަ އާއި، ރައްކާތެރި ކަމަށް ނުރައްކާވާ ސިޔާސަތު ތަކެއް ކަމަށް ވިދާޅުވެ، އެ ޤައުމުގެ ބާރުތައް ސަރަހައްދުން ނެރެން ޖެހޭ ކަމަށް ވެސް މުޖުތަބާ ޚާމަނާއީ ވިދާޅުވި އެވެ. 

މި ސަރަހައްދުގައި އެމެރިކާގެ ބޭސްތައް ހުންނަ ގައުމު ތަކުގެ ތެރޭގައި ޤަޠަރު، ބަހްރެއިން، ކުވެއިތު، އަދި އިރާގު ހިމެނެ އެވެ. އީރާންގެ އެންމެ އިސް ލީޑަރުގެ މި ބަސް ތަކަކީ، މި ގައުމު ތަކަށް ވެސް ފޮނުވި މެސެޖެއްގެ ގޮތުގައި ބައެއް ފަރާތް ތަކުން ދެކެ އެވެ. އެމެރިކާގެ ބޭސް ހުންނަ މި ޤައުމު ތަކަކީ، އަބަދު ވެސް އެމެެރިކާއާ ގާތް ގުޅުމެއް ބާއްވަމުން އަންނަ ޤައުމު ތަކެކެވެ. 

މުޖުތަބާ ޚާމަނާއީ ވިދާޅުވީ ސަރަހައްދީ ގައުމު ތަކުން އެމެރިކާގެ ބޭސް ތަކަށް ދޭ ތާއީދާއި، ހިމާޔަތް ހުއްޓާލަން ޖެހޭ ކަމަށާއި، އެހެން ނޫނީ އެ ގައުމުތައް ވެސް އީރާންގެ ދެކޮޅުވެރިންގެ ގޮތުގައި ބަލާނެ ކަމަށެވެ. މި ސަރަހައްދުގައި އެމެރިކާގެ އަސްކަރީ ހަރަކާތްތައް ހުރުމަކީ ސަރަހައްދީ ގައުމު ތަކަށް ވެސް ނުރައްކާވާ ކަމެއް ކަމަށް އޭނާ ވިދާޅުވި އެވެ.