ނަތަންޔާހޫ އަށް ހޮސްޕިޓަލްގައި ފަރުވާ ދީފި

އިޒްރޭލްގެ ބޮޑު ވަޒީރު ބެންޖަމިން ނަތަންޔާާހޫ ހޮސްޕިޓަލް އަށް ގެންގޮސްފައިވާ ކަމަށާއި، ހޮސްޕިޓަލްގައި އޭނާ އަށް ފަރުވާ ދީފައިވާ ކަމަށް އެ ޤައުމުގެ މީޑިއާ ތަކުގައި ރިޕޯޓު ކޮށްފި އެވެ.

އިޒްރޭލްގެ މީޑިއާ ތަކުގައި އެންމެ ފުރަތަމަ ރިޕޯޓު ކޮށްފައި ވަނީ، ހޯމަ ދުވަހުގެ ރޭ ނަތަންޔާހޫ ހޮސްޕިޓަލް އަށް ގެންގޮސްފައިވާ ކަމަށެވެ. ނަމަވެސް، އޭރު އޭނާ ގެންދިޔައީ ކޮން ސަބަބަކާ ހުރެ ކަމެއް ހާމަ ކޮށްފައި ނުވެ އެވެ. ފާއިތުވި ދުވަސް ތަކުގައި ނަަތަންޔާހޫގެ ޞިއްޙަތާ ގުޅޭ ގޮތުން ވަނީ ގިނަ ސުވާލު ތަކެއް އުފެދިފަ އެވެ. 

އޭގެ ފަހުން ނަތަންޔާހޫގެ އޮފީހާ ހަވާލާދީ އިޒްރޭލްގެ މީޑިއާ ތަކުގައި ބުނެފައި ވަނީ، ނަތަންޔާހޫ ހޮސްޕިޓަލް އަށް ގެންގޮސްފައި ވަނީ ދަތުގެ ފަރުވާއެއް ހޯދެއްވުމަށެވެ. ނަމަވެސް، އެކަމާ ގުޅޭ އިތުރު ތަފްސީލެއް އޭނާގެ އޮފީހުން ވެސް ހާމަ ކޮށްފައި ނުވެ އެވެ. 

މީގެ މަހެއްހާ ދުވަސް ކުރިން، އުމުރުން 76 އަހަރުގެ ނަތަންޔާހޫ ވަނީ އޭނާގެ ޕްރޮސްޓޭޓް ގްލޭންޑްގައި އުފެދުނު ކެންސަރުގެ ޓިއުމަރަކަށް ފަރުވާ ހޯއްދަވާފައިވާ ކަމަށް ވިދާޅުވެފަ އެވެ. އަދި އޭގެ ފަހުން އޭނާގެ ސިއްހީ ހާލަތު ރަނގަޅު ކަމަށް ވެސް ވަނީ ވިދާޅުވެފަ އެވެ. ނަތަންޔާހޫ ވިދާޅުވި ގޮތުގައި އޭނާގެ ސިއްހީ ރިޕޯޓު އާންމު ކުރުން ލަސްކުރީ، އީރާންގެ ވެރިން އެ ރިޕޯޓުގެ ބޭނުން ހިފައިގެން ޕްރޮޕެގެންޑާ ފެތުރުން ހުއްޓުވުމަށެވެ.

އީރާން އާއެކު ހިނގަމުންދާ ހަނގުރާމައިގެ ތެރޭގައި، ނަތަންޔާހޫ މަރުވެފައިވާ ކަމަށް ބުނެ ސޯޝަލް މީޑިއާގައި އަޑު ތަކެއް ވެސް ފެތުރުނެވެ. މީގެ އިތުރުން އޭނާގެ ޞިއްޙީ ހާލަތާ މެދު އިޒްރޭލްގެ އެތެރޭގަ އާއި، ބައިނަލްއަގުވާމީ މައިދާނުގައި ވެސް ތަފާތު ވާހަކަ ތަކެއް ވަނީ ދެކެވިފަ އެވެ.

މީގެ ކުރިން ވެސް ޞިއްޙީ އެކި މައްސަލަތަކާ ގުޅިގެން ނަތަންޔާހޫ ވަނީ އެތައް ފަހަރަކު ހޮސްޕިޓަލުގައި ފަރުވާ ހޯއްދަވާފައި އެވެ. އެގޮތުން 2024 ވަނަ އަހަރު ހާނިއާގެ އޮޕަރޭޝަނެއް ކޮށްފައިވާ އިރު، 2023 ވަނަ އަހަރު ވަނީ އޭނާގެ ހިތުގެ ވިންދު ރަނގަޅު ކުރުމަށް ޕޭސްމޭކަރެއް ލައްވާފައި އެވެ. އަދި މިދިޔަ އަހަރު ގޮހޮރު ދުޅަވުމުގެ މައްސަލައެއް ދިމާވެގެން ގޭގައި ހުންނަވައިގެން ވެސް ނަތަންޔާހޫ ވަނީ ފަރުވާ ހޯއްދަވާފައި އެވެ.