ހަމަލާ އަށް ފަހު ވެސް، އީރާންއާ ވާހަކަ ދައްކަން އެމެރިކާާ އޮތީ ތައްޔާރަށް: ރޫބިއޯ

އީރާންގެ ދެކުނުގައި އޮންނަ ބަނދަރު އައްބާސް އަށް އެމެރިކާާ އިން ހަމަލާ ދީފައިވާއިރު، އެ ހަމަލާ ތަކަށް ފަހު ވެސް އީރާންއާ ވާހަކަ ދައްކަން އެމެރިކާ އިން އޮތީ ތައްޔާރަށް ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެ އެވެ. 

އިންޑިއާ އަށް ކުރައްވާ ރަސްމީ ދަތުރުފުޅުގެ ތެރެއިން ޖައިޕޫރުގައި ހުންނަވައި ނޫސްވެރިންނާ ވާހަކަ ދައްކަވަމުން ރޫބިއޯ ވިދާޅުވީ، ހޯމަ ދުވަހު ޤަތަރުގައި ބައެއް ވާހަކަތައް ދެކެވެމުން އަންނަ ކަމަށާއި، ކުރިއަށް ދެވޭނެ މަގެއް ހޯދޭނެ ކަމަށް އުންމީދު ކުރައްވާ ކަމަށެވެ. 

ރޫބިއޯ ވިދާޅުވީ އިބްތިދާއީ ލިޔުމުގައި ބޭނުން ކުރާ ވާހަކަ ތަކާ ގުޅޭ ގޮތުން ވަރަށް ގިނަ ވާހަކަ ތަކެއް ދެކެވެމުން އަންނަ ކަމަށާއި، އެހެންކަމުން އެކަމަށް ދުވަސް ކޮޅެއް ނަގާނެ ކަމަށެވެ. ރޫބިއޯ ވިދާޅުވީ އެމެރިކާާގެ ރައީސް ޑޮނަލްޑް ޓްރަމްޕް ހުންނެވީ އެއްބަސްވުމެއް ޤާއިމު ކުރަން ބޭނުންވެފައި ކަމަށެވެ.

އެހެން ނަމަވެސް، އެ އެއްބަސްވުމަކީ ރަނގަޅު އެއްބަސްވުމަކަށް ވާން ޖެހޭނެކަން ފާހަގަ ކުރައްވައި ރޫބިއޯ ވިދާޅުވީ، އެހެން ނޫން ނަމަ އެއްވެސް އެއްބަސްވުމެއް ނޯންނާނެ ކަމަށެވެ. އާދީއްތަ ދުވަހު ރޫބިއޯ ވިދާޅުވެފައި ވަނީ، އީރާން އާއެކު ޓްރަމްޕް ހައްދަވާ އެއްބަސްވުން ވާނީ އެމެރިކާ އަށް ފައިދާކުރާ ރަނގަޅު އެއްބަސްވުމަކަށް ކަމަށެވެ. 

މީގެ އިތުރުން ރޫބިއޯ ވަނީ، އީރާން އިން ބަންދު ކޮށްފައިވާ ހޮރްމޫޒް ކަނޑު އޮޅި ހުޅުވާފައި ބޭއްވުމުގެ މުހިންމުކަން ވެސް ފާހަގަ ކުރައްވައިފަ އެވެ. އެކަން ފާހަގަ ކުރައްވައި ރޫބިއޯ ވިދާޅުވީ، އެއް ގޮތަކުން ނުވެއްޖެ ނަމަ، އަނެއް ގޮތަކުން ވިޔަސް އެ ކަނޑު އޮޅި ހުޅުވިގެން ދާނެ ކަމަށެވެ. 

ރޫބިއޯ މިހެން ވިދާޅުވެފައި މި ވަނީ، އެމެރިކާ އިން އީރާންގެ ބަނދަރު އައްބާސް އަށް އަމާޒުކޮށް ހަމަލާ ތަކެއް ދީފައިވާ ވަގުތެއްގަ އެވެ. އަދި އެ ހަމަލާ ތަކުގެ ސަބަބުން ދެ ޤައުމުގެ ދެ މެދުގައި އޮތް ނުތަނަވަސްކަން ބޮޑުވެ، އިތުރު ހަމަ ނުޖެހުން ތަކެއް އުފެދިދާނެ ކަމުގެ ކަންބޮޑުވުން ވެސް އޮތް ވަގުތެއްގަ އެވެ.