ގަލްފުގެ ޤައުމުތަކުގައި އެމެރިކާގެ އަސްކަރިއްޔާ އޮތުމަކީ، އެ ޤައުމު ތަކުގެ ސަލާމަތާއި ރައްކާތެރިކަން ކަށަވަރުވުމެއް ނޫން: ޕެޒެޝްކިއާން

ގަލްފުގެ ސަރަހައްދުގައި އެމެރިކާގެ އަސްކަރިއްޔާ އޮތުމަކީ، އެ ސަރަހައްދުގެ ޤައުމު ތަކުގެ ސަލާމަތާއި ރައްކާތެރިކަން ކަށަވަރު ކޮށްދޭނެ ކަމެއް ނޫން ކަމަށާއި، އެމެރިކާ އަށް ބަރޯސާވުމަކީ ހަގީގަތާ ޚިލާފު އަދި އެއްވެސް ނަތީޖާއެއް ނުނެރެވުނު ކަމެއްކަން ސަރަހައްދީ ޤައުމު ތަކަށް މިހާރު ޤަބޫލު ކުރެވިފައިވާ ކަމަށް އީރާންގެ ރައީސް މަސްއޫދު ޕެޒެޝްކިއާން ވިދާޅުވެއްޖެ އެވެ. 

އީރާންގެ އަސްކަރީ ކޮމާންޑަރުންނާ ބައްދަލު ކުރައްވައި ވާހަކަފުޅު ދައްކަވަމުން ޕެޒެޝްކިއާން ވިދާޅުވީ، ދުޝްމަނުން އައު ޓެކްނޮލޮޖީ ތަކާއި ވަސީލަތްތައް ހޯދަމުން ދާތީ އީރާންގެ ދިފާއީ އޮނިގަނޑު ޒަމާނީކޮށް އަދާ ހަމަކުރަން ޖެހޭ ކަމަށެވެ.

އީރާންގެ ރައީސްގެ އޮފީހުން ނެރުނު ބަޔާނެއްގައިވާ ގޮތުން، ގައުމުގެ ދިފާއީ ގާބިލުކަން އިތުރު ކުރުމަށާއި، ޓެކްނޮލޮޖީގެ ގޮތުން ކުރިއެރުން ހޯދުމަށްޓަކައި ޔުނިވަރސިޓީތަކާއި، ސައިންޓިފިކް މަރުކަޒު ތަކުގެ އިތުރުން އިލްމީ ދިރާސާ ތަކަށް ބިނާކޮށް ހިންގާ ކުންފުނި ތަކުގެ އެހީތެރިކަން އަސްކަރިއްޔާ އިން ހޯދަން ޖެހެ އެވެ.

މީގެ އިތުރުން، އީރާންގެ އަސްކަރިއްޔާ އިން އެމީހުންގެ ފަންނީ ޒިންމާތައް އަދާ ކުރުމުގައި ދައްކަމުންދާ ސާބިތު ކަމަށާއި، ސިޔާސީ އަދި ޕާޓީ ތަކުގެ ކަންކަމުގެ ތެރެއަށް ނުވަދެ މަސައްކަތް ކުރަމުން ދާތީ ޕެޒެޝްކިއާން ވަނީ އަސްކަރިއްޔާ އަށް ޝުކުރު އަދާ ކުރައްވާފައި އެވެ. ޕެޒެޝްކިއާން ވިދާޅުވީ ގައުމީ މަސްލަހަތަށް އިސްކަން ދީގެން އަސްކަރިއްޔާ އިން ގެންގުޅޭ ޒިންމާދާރު އަދި ފަންނީ އުސޫލު ތަކަކީ ގައުމަށާއި މުޅި ނިޒާމަށް ލިބިފައިވާ އަގުހުރި ރައުސްމާލެއް ކަމަށެވެ.

އީރާންގެ ރައީސް ޕެޒެޝްކިއާންގެ މި ވާހަކަފުޅުތައް އައިސްފައި ވަނީ މެދު އިރުމަތީގެ މަސްރަހު ނުތަނަވަސް ވެފައިވާ ދަނޑިވަޅެއްގައި އެވެ. އީރާން އިން ދެކޭ ގޮތުގައި ސަރަހައްދުގެ ސަލާމަތާއި ރައްކާތެރިކަން ދެމެހެއްޓޭނީ ބޭރުގެ ބާރުތަކަށް ބަރޯސާ ނުވެ، ސަރަހައްދީ ގައުމު ތަކުގެ މެދުގައި އޮންނަ އެއްބާރުލުމުގެ ތެރެއިންނެވެ. އެހެންކަމުން އަމިއްލަ ދިފާއީ ބާރު ވަރުގަދަ ކުރުމަކީ އީރާންގެ އެންމެ މުހިންމު އެއް ސިޔާސަތު ކަމަށް ޕެޒެޝްކިއާން ފާހަގަ ކުރެއްވި އެވެ.