އެމެރިކާ އަށް ގެއްލުންވާ ފަދަ "ގޯސް" އެއްބަސްވުމެއް ޓްރަމްޕް ނުހައްދަވާނެ: ރޫބިއޯ
އީރާން އާއެކު އެއްބަސްވުމަކަށް އައުމުގައި ލަސް ތަކެއް ވަމުން ދަނީ ކީއްވެގެންތޯ ނޫސްވެރިން ސުވާލު ކުރުމުން ރޫބިއޯ ވިދާޅުވީ، މިވަގުތު މަޑު ޖެހިފައި ވަނީ އީރާންގެ ފަރާތުން ލިބެން ޖެހޭ ޖަވާބަކަށް ކަމަށް. އަދި އީރާންގެ ސިޔާސީ ނިޒާމު ރޭވިފައި އޮންނަ ގޮތުން، ކަންކަމުގައި ގޮތެއް ނިންމައި ރަސްމީ ޖަވާބެއް ދިނުމަށް އެ ގައުމަށް އިތުރު ވަގުތު ބޭނުންވާ ކަމަށް ވެސް އޭނާ ފާހަގަ ކުރެއްވި.
އެމެރިކާާގެ ރައީސް ޑޮނަލްޑް ޓްރަމްޕް އާއި، ސެކްރެޓަރީ އޮފް ސްޓޭޓް މާކޯ ރޫބިއޯ. | ގެޓީ އިމޭޖަސް
އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން އީރާން އާއެކު ގާއިމުކުރާ އެއްވެސް އެއްބަސްވުމަކީ، އެމެރިކާ އަށް ގެއްލުން ވާނެ ފަދަ "ގޯސް" އެއްބަސްވުމަކަށް ނުވާނެ ކަމުގެ ޔަގީންކަން އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ދެއްވައިފި އެވެ.
ރޫބިއޯ މިހެން ވިދާޅުވީ އީރާން އާއެކު ކުރިއަށްދާ މަޝްވަރާ ތަކާ ގުޅޭ ގޮތުން ނޫސްވެރިން ކުރި ސުވާލު ތަކަށް ޖަވާބު ދެއްވަމުންނެވެ. ރޫބިއޯ މި ވާހަކަތައް ދައްކަވާފައި މި ވަނީ، އެމެރިކާ އާއި އީރާންއާ ދެމެދު އެއްބަސްވުމެއް ޤާއިމު ކުރުމުގެ އުންމީދު ބޮޑުވެފައިވާ ވަގުތެއްގަ އެވެ.
އީރާން އާއެކު އެއްބަސްވުމަކަށް އައުމުގައި ލަސް ތަކެއް ވަމުން ދަނީ ކީއްވެގެންތޯ ނޫސްވެރިން ސުވާލު ކުރުމުން ރޫބިއޯ ވިދާޅުވީ، މިވަގުތު މަޑު ޖެހިފައި ވަނީ އީރާންގެ ފަރާތުން ލިބެން ޖެހޭ ޖަވާބަކަށް ކަމަށެވެ. އަދި އީރާންގެ ސިޔާސީ ނިޒާމު ރޭވިފައި އޮންނަ ގޮތުން، ކަންކަމުގައި ގޮތެއް ނިންމައި ރަސްމީ ޖަވާބެއް ދިނުމަށް އެ ގައުމަށް އިތުރު ވަގުތު ބޭނުންވާ ކަމަށް ވެސް އޭނާ ފާހަގަ ކުރެއްވި އެވެ.
މި މަޝްވަރާ ތަކާ ގުޅޭ ގޮތުން އިތުރަށް ވާހަކަ ދައްކަވަމުން ރޫބިއޯ ވިދާޅުވީ، އެމެރިކާގެ ރައީސް ޓްރަމްޕް އަކީ ގައުމަށް ފައިދާ ނުވާނެ ފަދަ ދަށު ދަރަޖައިގެ އެއްބަސްވުން ތަކުގައި ސޮއި ކުރައްވާނެ ބޭފުޅެއް ނޫން ކަމަށެވެ. އަދި އެމެރިކާގެ މަސްލަހަތު ހިމާޔަތް ނުކުރެވޭ އެއްވެސް މުއާމަލާތެއް ޓްރަމްޕްގެ ސަރުކާރުން ނުކުރާނެ ކަމުގެ ފުރިހަމަ އިތުބާރު އެބަ އޮތް ކަމަށް ވެސް އޭނާ ވިދާޅުވި އެވެ.
އެމެރިކާގެ ސެކްރެޓަރީ އޮފް ސްޓޭޓް މިފަދަ މޭރުމަކުން ވާހަކަ ދައްކަވާފައި މިވަނީ، އީރާންގެ ނިއުކްލިއާ މައްސަލަ އާއި، ސަރަހައްދީ ހަމަޖެހުމާ ގުޅޭ ގޮތުން ދެ ގައުމުގެ މެދުގައި ނުތަނަވަސްކަން އުފެދިފައިވާ ދަނޑިވަޅެއްގަ އެވެ. ޓްރަމްޕްގެ ސަރުކާރުން އަބަދު ވެސް ވަކާލާތު ކުރަމުން ދަނީ އީރާން އާއެކު ކުރާ ކޮންމެ މުއާމަލާތަކީ، އެމެރިކާގެ ގައުމީ ސަލާމަތާއި އިގްތިސާދަށް އެންމެ ފައިދާ ހުރި ގޮތަށް ކުރެވޭ މުއާމަލާތް ތަކެއް ކަމަށް ހެދުމަށެވެ.
މި މައްސަލައިގައި އީރާންގެ ފަރާތުން ރަސްމީ ޖަވާބެއް ލިބުމުން، ކުރިއަށް އޮތް ފިޔަވަޅުތައް އަޅާނެ ގޮތުގެ ތަފްސީލު އެމެރިކާގެ ރިޔާސީ ގަނޑުވަރު ވައިޓް ހައުސް އިން ހާމަ ކުރާނެ ކަމަށް ބެލެވެ އެވެ. ނަމަވެސް މިހާތަނަށް އީރާން އިން މިކަމާ ގުޅޭ ގޮތުން ވަކި އެއްޗެއް ބުނެފައި ނުވެ އެވެ.
މަސްދަރު: އަލް ޖަޒީރާ
