އީރާން އާއެކު އެއްބަސްވުމަކަށް އައުމުގެ ފުރުސަތު އަދިވެސް އެބަ އޮތް، އިޒްރޭލް އަށް އަމިއްލަ ނަފްސު ދިފާއު ކުރުމުގެ ޙައްގު އޮންނާނެ: ރޫބިއޯ

އިރާން އާއެކު އެއްބަސްވުމަކަށް އައުމުގެ ފުރުސަތު އަދިވެސް އެބައޮތް ކަމަށާއި، ނަމަވެސް ކޮންމެ އެއްބަސްވުމެއްގެ ދަށުން ވެސް އަމިއްލަ ނަފްސު ދިފާއު ކުރުމުގެ ހައްގު އިޒްރޭލް އަށް ލިބިގެންވާ ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެ އެވެ.

އިންޑިއާ އަށް ކުރައްވަމުން ގެންދަވާ ދަތުރުފުޅުގެ ތެރެއިން ނޫސްވެރިންނާ ވާހަކަ ދައްކަވަމުން ރޫބިއޯ ވިދާޅުވީ، އީރާންގެ ނިއުކްލިއާ މައްސަލަތަކާ ގުޅޭ ގޮތުން ވަގުތު ކަނޑަ އެޅިފައިވާ، ހަގީގީ އަދި މުހިންމު މަޝްވަރާ ތަކެއް ފެށުމަށާއި ހޮރްމޫޒް ކަނޑު އޮޅި ހުޅުވާލުމުގެ ގާބިލުކަން އީރާން އަށް ހޯދައި ދިނުމަށް "ވަރަށް ވަރު ގަދަ" ހުށަހެޅުމެއް މިހާރު ވެސް މޭޒު މަތީގައި އެބަ އޮތް ކަމަށެވެ.

މި ހުށަހެޅުމާ ގުޅޭ ގޮތުން ވާހަކަ ދައްކަވަމުން ރޫބިއޯ ވިދާޅުވީ، މިކަން ކާމިޔާބު ކުރެވޭނެ ކަމުގެ އުންމީދު ބޮޑު ކަމަށެވެ. އަދި މިއީ ގަލްފުގެ ގައުމު ތަކުގެ އިތުރުން މުޅި ދުނިޔޭގެ ވެސް ބޮޑު ތާއީދެއް އޮތް ކަމެއްކަން އޭނާ ފާހަގަ ކުރެއްވި އެވެ. މި މަޝްވަރާ ތަކުގެ ތަފްސީލު ހިއްސާ ކުރެވުނު ކޮންމެ ގައުމަކުން ވެސް މިއީ ހަމައެކަނި ބުއްދިވެރި ނިންމުމެއް ނޫން ކަމަށާއި، މިއީ މުޅި ދުނިޔޭގެ ސަލާމަތަށް ޓަކައި ކުރަން ޖެހޭ ކަމެއްކަން ގަބޫލު ކުރާ ކަމަށް ވެސް ރޫބިއޯ ވިދާޅުވި އެވެ.

މީގެ އިތުރުން ރޫބިއޯ ވިދާޅުވީ، އީރާން އާއެކު އެއްބަސްވުމަކަށް އައުމަށް އެމެރިކާގެ ރައީސް ޑޮނަލްޑް ޓްރަމްޕް އަވަސް އަރުވާ ނުލައްވާނެ ކަމަށެވެ. އަދި ކޮންމެ އެއްބަސްވުމެއްގެ ދަށުން ވެސް އިޒްރޭލްގެ ރައްކާތެރިކަން ކަށަވަރު ކުރުމާއި، އެ ގައުމުގެ ދިފާއުގައި އަޅަން ޖެހޭ ފިޔަވަޅުތައް އެޅުމުގެ ފުރިހަމަ އިޚުތިޔާރު އިޒްރޭލް އަށް އޮންނާނެ ކަމަށް އޭނާ ވަނީ ތަކުރާރު ކުރައްވާފައި އެވެ.

އެމެރިކާގެ ސަރުކާރުން މިހާރު މަސައްކަތް ކުރަމުން ދަނީ އީރާންގެ ނިއުކްލިއާ މައްސަލަ އަށް ދާއިމީ ހައްލެއް ހޯދުމަށެވެ. ނަމަވެސް މިކަމުގައި އެމެރިކާގެ ބައިވެރިންނާއި، އިޒްރޭލްގެ މަސްލަހަތު ހިމާޔަތް ކުރުމަކީ ޓްރަމްޕްގެ ސަރުކާރުގެ އެންމެ އިސް ސިޔާސަތު ކަމަށް މަސްރަހު ދިރާސާ ކުރާ ފަރާތް ތަކުން ބުނެ އެވެ.