އެއްވެސް ނިންމުމެއް ނިންމާނީ ރޫހީ ލީޑަރުގެ ހުއްދައާ އެކު: އީރާންގެ ރައީސް

އެމެރިކާ އާއެކު އީރާން އިން އެއްވެސް އެއްބަސްވުމަކަށް، ނުވަތަ އެއްވެސް ނިންމުމެއް ނިންމާނީ އެ ޤައުމުގެ ރޫހީ ލީޑަރު އާޔަތުﷲ އަލީ ޚާމަނާއީގެ ހުއްދަ ލިބިގެން ކަމަށް، އީރާންގެ ރައީސް މަސްއޫދު ޕެޒެޝްކިއާން ވިދާޅުވެއްޖެ އެވެ. 

އީރާންގެ ތަސްނީމް ނިއުސް އެޖެންސީ އިން ރިޕޯޓު ކޮށްފައިވާ ގޮތުގައި، އެ ޤައުމުގެ ރައީސް ޕެޒެޝްކިއާން ވިދާޅުވީ މުޖުތަމައުގެ ތެރޭގައި ބައިބައިވުން އުފެދޭ ފަދަ އެއްވެސް ބަޔާނެއް، ނުވަތަ ދިރާސާއެއް ނެރުމަކީ ހަގީގަތުގައި ދުޝްމަނުންނަށް ލިބޭ ފުރުސަތެއް ކަމަށެވެ. އަދި އެފަދަ އަމަލު ތަކަކީ ޤައުމަށް ލިބޭ ގެއްލުމަކަށް ވެގެން ދާނެ ކަމަށް ވެސް ޕެޒެޝްކިއާން ފާހަގަ ކުރެއްވި އެވެ.

އީރާންގެ ސަރުކާރުން ނިންމާ އެއްވެސް ނިންމުމަކީ ސުޕްރީމް ނޭޝަނަލް ސެކިއުރިޓީ ކައުންސިލްގެ އޮނިގަނޑުގެ ބޭރުން، އަދި އެންމެ މަތީ ވެރިޔާގެ ހުއްދަ ނެތި ނިންމާނެ ނިންމުމެއް ނޫން ކަމަށް ޕެޒެޝްކިއާން ވިދާޅުވި އެވެ. ޤައުމު ހިންގުމުގައި ބޭނުން ވަނީ އެއް ނިންމުމަކަށް ތަބާވުމާއި، އެންމެން ގުޅިގެން އެ ނިންމުން ތަކަށް ކިޔަމަން ތެރިވުން ކަމަށް ވެސް އޭނާ ވިދާޅުވި އެވެ.

މި މޭރުމުން ވާހަކަ ދައްކަވަމުން ރައީސް ޕެޒެޝްކިއާން އިތުރަށް ވިދާޅުވީ ބައިނަލްއަޤުވާމީ މައިދާނުގައި، ޚާއްސަކޮށް އެމެރިކާއާ އެކު ކުރެވޭ މުއާމަލާތް ތަކުގައި އީރާން އިން ގެންގުޅޭނީ އެއް ސިޔާސަތެއް ކަމަށެވެ. އަދި ޤައުމުގެ ސިޔާދަތާއި، މަސްލަހަތު ހިމާޔަތް ކުރުމުގައި އެންމެ މަތީ ވެރިޔާގެ އިރުޝާދަކީ އެންމެ މުހިންމު އަސާސް ކަމުގައި ވެސް ޕެޒެޝްކިއާން ފާހަގަ ކުރެއްވި އެވެ.

އީރާންގެ ރައީސް ޕެޒެޝްކިއާން މިހެން ވިދާޅުވެފައި ވަނީ، އެމެރިކާ އާއި އީރާންއާ ދެމެދު ސުލްޙަ ޤާއިމުކޮށް، ދެ ޤައުމުގެ ދެ މެދުގައި އެއްބަސްވުމެއް ޤާއިމު ކުރުމުގެ މަސައްކަތް ކުރަމުން އަންނަ ވަގުތެއްގަ އެވެ. އަދި އީރާން އާއެކު އެއްބަސްވުމަކަށް އައުމުގެ އުންމީދު ވަރަށް ބޮޑު ކަމަށް އެމެރިކާގެ އޮފިޝަލުން ބުނަމުން އަންނަ ވަގުތެއްގަ އެވެ.