އީރާން އެއްބަސްވުމުގެ ބޮޑު ބައެއް ނިމިއްޖެ: ޓްރަމްޕް

އީރާން އާއެކު ގާއިމުކުރާ ސުލްހައިގެ އެއްބަސްވުމުގެ ބޮޑު ބައެއް މިހާރު ނިމިފައިވާ ކަމަށާއި، މި އެއްބަސްވުމުގެ ދަށުން ހޮރްމޫޒް ކަނޑު އޮޅި އަލުން ހުޅުވާލެވޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ހޮނިހިރު ދުވަހު ވިދާޅުވެއްޖެ އެވެ.

ޓްރަމްޕް މިހެން ވިދާޅުވި ނަމަވެސް، އީރާނުގެ ރަސްމީ ނޫސް އެޖެންސީއެއް ކަމަށްވާ ފާރްސް ނިއުސް އެޖެންސީ އިން ވަނީ ޓްރަމްޕްގެ މި ވާހަކަފުޅު ތަކަށް އިންކާރު ކޮށް ފައެވެ.

ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، ދެ ގައުމުގެ ދެ މެދުގައި އެކުލަވާލެވޭ ފަހުމުނާމާގެ ދަށުން ބައިނަލްއަގުވާމީ ވިޔަފާރީގައި މުހިންމު ދައުރެއް އަދާކުރާ ހޮރްމޫޒް ކަނޑު އޮޅި އަލުން ހުޅުވާލެވޭނެ ކަމަށެވެ. މި ކަނޑުއޮޅި ބަންދު ކުރުމުގެ ސަބަބުން ދުނިޔޭގެ ހަކަތައިގެ ބާޒާރަށް ވަނީ ބޮޑެތި ލޮޅުން ތަކެއް އަރާފައި އެވެ. ހޮރްމޫޒް ކަނޑުއޮޅި ބަންދު ކުރަން ޖެހުނީ މިއަހަރުގެ ފެބްރުއަރީ މަހު އެމެރިކާ އާއި އިޒްރޭލް ގުޅިގެން އީރާންއާ ދެކޮޅަށް ހަނގުރާމަ ފެށުމާ ގުޅިގެންނެވެ.

އެހެން ނަމަވެސް، މި އެއްބަސްވުމުގައި އިތުރަށް ހިމެނޭ ކަންތައްތަކާ ބެހޭ އެއްވެސް ތަފްސީލެއް ރައީސް ޓްރަމްޕް ހާމަ ކުރައްވާފައި ނުވެ އެވެ. ޓްރަމްޕް މިހެން ވިދާޅުވި ނަމަވެސް، އީރާނުގެ ފާރްސް ނިއުސް އެޖެންސީ އިން އާދިއްތަ ދުވަހުގެ ހެނދުނު ރިޕޯޓު ކޮށްފައިވާ ގޮތުގައި، އެއްބަސްވުމުގެ ދަށުން ކަނޑުއޮޅި ބެލެހެއްޓުމުގެ ފުރިހަމަ ބާރު އޮންނާނީ އީރާން އަށެވެ. 

ފާރްސް ނިއުސް އެޖެންސީ އިން އިތުރަށް ބުނެފައި ވަނީ، ކަނޑު އޮޅި ހުޅުވާލުމާ ގުޅޭ ގޮތުން ޓްރަމްޕް ދެއްކެވި ވާހަކަފުޅު ތަކަކީ ހަގީގަތާ ޚިލާފު ވާހަކަ ތަކެއް ކަމަށެވެ. މިކަމުގެ ސަބަބުން ދެ ގައުމުގެ ދެ މެދުގައި ކުރިއަށްދާ މަޝްވަރާ ތަކުގައި ކަނޑުއޮޅީގެ ކޮންޓްރޯލް އޮންނާނެ ފަރާތަކާ މެދު ބޮޑެތި ޚިޔާލު ތަފާތުވުން ތަކެއް ހުރިކަން ވަނީ ހާމަވެފައި އެވެ.

ހޮރްމޫޒް ކަނޑު އޮޅި އަކީ ދުނިޔޭގައި އުފައްދާ ތެލުގެ ބޮޑު ބައެއް ބޭރު ކުރުމަށް ބޭނުން ކުރާ އެންމެ މުހިންމު އެއް މަގު ކަމަށްވާތީ، މި ތަނުގެ ސަލާމަތީ ކަންކަމާއި ކޮންޓްރޯލާ މެދު އުފެދިފައިވާ މައްސަލަ އަކީ ބައިނަލްއަގުވާމީ މުޖުތަމައުން ނުހަނު ކަންބޮޑުވުމާ އެކު ބަލަމުންދާ މައްސަލަ އެކެވެ.

އެމެރިކާ އިން ބޭނުން ވަނީ އެ ސަރަހައްދުން ދަތުރު ކުރާ އުޅަނދު ފަހަރަށް ފުރިހަމަ މިނިވަންކަން އޮތުމެވެ. ނަމަވެސް އީރާން އިން އަދިވެސް ބާރު އަޅަމުން ދަނީ އެ ސަރަހައްދުގެ ސިޔާދަތީ ބާރު އެ ގައުމަށް އޮންނަން ޖެހޭނެ ކަމަށެވެ.