އީރާން އަށް ހަމަލާ ދިނުމަށް އެމެރިކާ އިން ވިސްނަމުން އަންނަ ކަމަށް ރިޕޯޓު ކޮށްފި

އިރާންއާ ދެކޮޅަށް އައު ހަމަލާ ތަކެއް ދިނުމުގެ ވިސްނުން އެމެރިކާ އިން ގެންގުޅެމުން އަންނަ ކަމަށް އެމެރިކާގެ މީޑިއާ ތަކުން ހުކުރު ދުވަހު ރިޕޯޓު ކޮށްފި އެވެ.

ސީބީއެސް އަދި އެކްސިއޯސް ނޫސް ތަކުން މި ރިޕޯޓުތައް ނެރުނީ އެމެރިކާގެ ރައީސް ޑޮނަލްޑް ޓްރަމްޕް އޭނާގެ ދަރިކަލުންގެ ކައިވެނީގެ ރަސްމިއްޔާތަށް މި ހަފްތާ ބަންދުގައި ނުދާނެ ކަމަށް އިއުލާން ކުރިތާ ގަޑިއެއްހާ އިރު ފަހުންނެވެ. ޓްރަމްޕް މި ނިންމުން ނިންމީ ސަރުކާރާ ގުޅޭ ހާލަތްތަކާއި، އެމެރިކާ އަށް އޭނާ ލޯބިވާތީ ކަމަށް އޭނާ ވިދާޅުވެފައި އެވެ.

މި މުހިންމު ދަނޑިވަޅުގައި އެމެރިކާގެ ވެރި ރަށް ވޮޝިންޓަން ޑީސީގައި ހުންނަން ޖެހޭ ކަމަށާއި، ރިޔާސީ ގަނޑުވަރު ވައިޓްހައުސްގައި ހުންނަން ޖެހޭ ކަމަށް ޓްރަމްޕް ވިދާޅުވި އެވެ. އެކްސިއޯސް އަދި ސީބީއެސް ނޫހުން ވެސް ބުނީ އައު ހަމަލާ ތަކެއް ދިނުމާ ގުޅޭ ފައިނަލް ނިންމުމެއް އަދި ނުނިންމާ ކަމަށެވެ.

އެމެރިކާ އާއި އީރާންއާ ދެމެދު، މެދުވެރިއެއްގެ ދައުރު އަދާ ކުރަމުން އަންނަ ޕާކިސްތާން އިން ވަނީ އެ ގައުމުގެ ސިފައިންގެ އެންމެ އިސް ވެރިޔާ ވެރިޔާ އީރާން އަށް ފޮނުވައި، އެއްބަސްވުމުގެ މަސައްކަތް ކުރިއަށް ގެންދަމުން ކަމަށް ބުނެފައިވެ އެވެ. އޭއެފްޕީ އިން މި ރިޕޯޓުތަކާ ގުޅިގެން ވައިޓް ހައުސްއާ ސުވާލު ކުރުމުން ވަކި އެއްޗެއް ބުނެފައި ނުވެ އެވެ. 

ސީބީއެސް އިން ބުނީ ވައިޓް ހައުސްގެ ތަރުޖަމާން އައްނާ ކެލީ ވިދާޅުވެފައި ވަނީ، އެއްބަސްވުމުގެ މައްސަލައިގައި އީރާން އިން ގޮތެއް ނުނިންމައިފި ނަމަ، ދެން ކުރިމަތި ވާނެ ކަންކަން ޓްރަމްޕް ވަރަށް ސާފުކޮށް ވިދާޅުވެފައިވާ ކަމަށެވެ. 

ވައިޓް ހައުސް އިން ހުކުރު ދުވަހު ވަނީ ޓްރަމްޕްގެ ހަފްތާ ބަންދުގެ ޕްލޭން ތަކަށް ބަދަލު ގެނެސް، ނިއު ޖާސީގައި ހުންނަ ގޮލްފް ރިސޯޓަށް ޓްރަމްޕް ނުދާނެ ކަމަށާއި، ވޮޝިންޓަންގައި ހުންނަވާނެ ކަމަށް އިއުލާންކޮށްފަ އެވެ.

ނިއު ޔޯކް ސްޓޭޓް އަށް ކުރި ދަތުރުފުޅަށް ފަހު އެނބުރި ވަޑައިގެން، ޓްރަމްޕް ނޫސްވެރިންނާ ވެސް ވާހަކަ ދައްކަވާފައި ނުވެ އެވެ. އެހެން ނޫން ނަމަ، އެނބުރި ވަޑައިގެން ޓްރަމްޕް ނޫސްވެރިންގެ ސުވާލު ތަކަށް ޖަވާބު ދެއްވަ އެވެ. ދެ މަސްދަރަކާ ހަވާލާދީ އެކްސިއޯސް އިން ބުނެފައި ވަނީ، އީރާންގެ މައްސަލައިގައި ފާއިތުވި ދެ ދުވަހު ޓްރަމްޕް ހުންނެވީ ވަަރަށް ނުރުހުންވެ ވަޑައިގެންފަ އެވެ.