ވައިޓް ހައުސް ކައިރީގައި އަނެއްކާ ވެސް ބަޑީގެ ހަމަލާ ތަކެއް

އެމެރިކާގެ ރިޔާސީ ގަނޑުވަރު، ވައިޓް ހައުސް ކައިރީގައި އަނެއްކާ ވެސް ބަޑީގެ ހަމަލާ ތަކެއް ދީފި އެވެ.

މި ހާދިސާގައި ހަމަލާ ދިން މީހާ ވަނީ އެ ސަރަހައްދުގައި ހުރި ސެކިއުރިޓި ޗެކް ޕޮއިންޓަކަށް އަމާޒުކޮށް ހަމަލާ ދޭން ފަށައިފަ އެވެ. އެއާ އެކު އެމެރިކާގެ ސީކްރެޓް ސާވިސް އިން ވަނީ އެ މީހާ ގަޔަށް ބަޑި ޖަހައިފަ އެވެ. މި ހާދިސާގައި އެ މީހާ މަރުވެފައިވާ ކަމަށް ވަނީ ބުނެފަ އެވެ. މީގެ އިތުރުން އެ ސަރަހައްދުގައި ހުރި އާންމުންގެ މީހެއްގެ ގަޔަށް ވަޒަން އެރުމުގެ ސަބަބުން، އެ މީހާ އަށް އަނިޔާވެފައިވާ ކަމަށް ބުނެފައިވެ އެވެ. 

މި ހާދިސާ ހިނގި ވަގުތު ސީކްރެޓް ސާވިސްގެ އޮފިސަރުން ވަނީ ވަގުތުން ރައްދު ހަމަލާ ދީ، ހަމަލާ ދިން މީހާ ހުއްޓުވައިފަ އެވެ. ސަލާމަތީ ބާރު ތަކުން ބުނި ގޮތުގައި، ބަޑި ޖެހި މީހާ މަރުވެފައި ވަނީ އޮފިސަރުން ދިން ހަމަލާ ތަކުގައި ލިބުނު ޒަޚަމްތަކަށް ފަރުވާ ދެމުން ދަނިކޮށެވެ. މި ހާދިސާގައި ޒަޚަމުވެފައިވާ އާންމު މީހާއަށް މިހާރު ދަނީ ހޮސްޕިޓަލުގައި ފަރުވާ ދެމުންނެވެ.

މި ހާދިސާއާ ގުޅިގެން ވައިޓް ހައުސް ހިމެނޭ ސަރަހައްދުގެ ސަލާމަތީ ކަންކަން ވަނީ ވަރަށް ބޮޑަށް ވަރުގަދަ ކޮށްފަ އެވެ. އަދި އެ ސަރަހައްދުގެ ބައެއް މަގުތައް ބަންދުކޮށް، ތަހުގީގު ޓީމު ތަކުން ދަނީ ހަރަކާތްތެރި ވަމުންނެވެ. މި ހަމަލާ ދޭން މެދުވެރިވި ސަބަބު ނުވަތަ ހަމަލާ ދިން މީހާގެ މަގުސަދަކީ ކޮބައިކަން ދެނެގަތުމަށް ފެޑަރަލް އެޖެންޓުން މިހާރު ވަނީ ތަހުގީގު ފަށާފައެވެ.

ވައިޓް ހައުސްގެ ސެކިއުރިޓީ ޗެކް ޕޮއިންޓަކަށް މިފަދަ ހަމަލާއެއް އަމާޒު ވެފައި މިވަނީ، އެމެރިކާގެ ސަލާމަތީ ކަންކަމާ މެދު އާންމު ރައްޔިތުންގެ މެދުގައި ކަންބޮޑުވުން ތަކެއް ހުރި ދަނޑިވަޅެއްގަ އެވެ. މި ހާދިސާ ހިނގި އިރު ވައިޓް ހައުސްގެ ތެރޭގައި ތިބި އިސްވެރިންގެ ސަލާމަތީ ކަންކަން ކަށަވަރު ކޮށްފައިވާ ކަމަށް ސަރުކާރުގެ ކަމާ ބެހޭ އިދާރާ ތަކުން މައުލޫމާތު ދީފައިވެ އެވެ.

މި ހަމަލާ ދިން ވަގުތު އެމެރިކާގެ ރައީސް ޑޮނަލްޑް ޓްރަމްޕް ހުންނެވީ ވައިޓް ހައުސްގައި ކަމަށް ރިޕޯޓުތައް ބުނެ އެވެ. އަދި އެ ވަގުތު ޓްރަމްޕް ގެންދެވީ އީރާންއާ ދެކޮޅަށް އެމެރިކާ އިން ކުރަމުން އަންނަ ހަނގުރާމައާ ގުޅޭ ކަންކަމުގައި މަޝްވަރާ ކުރައްވަމުން ކަމަށް ވެސް ފާހަގަ ކޮށްފައިވެ އެވެ. 

ކަމާ ބެހޭ ފަރާތް ތަކުން ބުނި ގޮތުގައި، މި ހާދިސާއާ ގުޅޭ އިތުރު ތަފްސީލުތައް ތަހުގީގު ކުރިއަށްދާ ވަރަކުން ހާމަ ކުރަމުން ދާނެ އެވެ. އަދި މިފަދަ ހަމަލާ ތަކުން ރައްކާތެރި ވުމަށްޓަކައި އަޅަން ޖެހޭ އެންމެހާ ފިޔަވަޅުތައް ސަލާމަތީ ބާރު ތަކުން ދަނީ އަޅަމުންނެވެ.