ޓްރަމްޕްގެ ދަރިކަނބަލުން އިވަންކާ އަވަހާރަ ކޮށްލަން އީރާންގެ އެޖެންޓަކު މަސައްކަތް ކުރި ކަމަށް ރިޕޯޓު ކޮށްފި

އެމެރިކާގެ ރައީސް ޑޮނަލްޑް ޓްރަމްޕްގެ ދަރިކަނބަލުން އިވަންކާ ޓްރަމްޕް އަވަހާރަ ކޮށްލަން، އީރާންއާ ގުޅުން އޮތް އެޖެންޓަކު މަސައްކަތް ކުރި ކަމަށް ނިއު ޔޯކް ޕޯސްޓުން ރިޕޯޓު ކޮށްފި އެވެ. 

ނިއު ޔޯކް ޕޯސްޓުގައި ބުނެފައި ވަނީ، އީރާންގެ ގުދުސް ފޯސްގެ ކުރީގެ ކޮމާންޑަރު ގާސިމް ސުލައިމާނީ އަވަހާރަކޮށްލި ހާދިސާގެ ބަދަލު ހިފުމުގެ ގޮތުން، އެމެރިކާގެ ރައީސް ޑޮނަލްޑް ޓްރަމްޕްގެ ދަރިކަނބަލުން އިވަންކާ ޓްރަމްޕް އަވަހާރަކޮށްލަން އިރާނާ ގުޅުން އޮންނަ އޭޖެންޓަކު ރާވަމުން ދިޔަ ކަމަށެވެ.

މިދިޔަ ހުކުރު ދުވަހު އެ ނޫހުން އާންމު ކުރި ރިޕޯޓެއްގައި ބުނެފައި ވަނީ، އިވަންކާ އަވަހާރަ ކޮށްލުމަށް ރާވަމުން ދިޔައީ އިރާގަށް ނިސްބަތްވާ އުމުރުން 32 އަހަރުގެ މުހައްމަދު ބާގިރު ސާދު ދާއޫދު އަލް ސާދީ ނަމަކަށް ކިޔާ މީހެއް ކަމަށެވެ.

ނިއު ޔޯކް ޕޯސްޓް އިން ރިޕޯޓު ކޮށްފައިވާ ގޮތުގައި، އަލް ސާދީ ވަނީ އިވަންކާ ޓްރަމްޕް އަވަހާރަ ކޮށްލާނެ ކަމަށް ބުނެ "ވައުދު" ވެފައި އެވެ. އަދި އޭނާގެ އަތުން ފްލޮރިޑާގައި ހުންނަ އިވަންކާގެ ގޭގެ ބްލޫޕްރިންޓް ނުވަތަ ޗާޓެއް ފެނިފައިވާ ކަމަށް ވެސް، އެކި އެކި މަސްދަރުތަކާ ހަވާލާދީ އެ ނޫޙުން ވަނީ ބުނެފަ އެވެ.

މި ރޭވުމަކީ 2020 ވަނަ އަހަރު ބަޣުދާދު އަށް އެމެރިކާ އިން ދިން ޑްރޯން ހަމަލާއެއްގައި ސުލައިމާނީ އަވަހާރަ ކޮށްލުމާ ގުޅިގެން، ޓްރަމްޕްގެ އާއިލާ އަށް އަމާޒުކޮށް ހިންގަން އުޅުނު އަމަލެއް ކަމަށް ބެލެވެ އެވެ.

އެމެރިކާގައި ހުންނަ އިރާގު އެމްބަސީގެ ކުރީގެ ޑެޕިއުޓީ މިލިޓަރީ އެޓޭޗޭ، އިންތިފާޟް ގަންބަރު ނިއު ޔޯކް ޕޯސްޓަށް މައުލޫމާތު ދެމުން ބުނެފައި ވަނީ، ސުލައިމާނީ އަވަހާރަ ކޮށްލި ފަހުން އިވަންކާ ޓްރަމްޕް މަރާލާނެ ކަމަށް އަލް ސާދީ ދައްކާފައިވާ ވާހަކަތައް އަޑު އިވިފައިވާ ކަމަށެވެ. މީގެ އިތުރުން، އިވަންކާ އާއި އޭނާގެ ފިރިކަލުން ޖެރާޑް ކުޝްނާގެ ގެކޮޅު ހުންނަ ފްލޮރިޑާގެ ސަރަހައްދު ފެންނަ މެޕެއް، އަރަބި ބަހުން ލިޔެފައިވާ އިންޒާރަކާ އެކު އަލް ސާދީ ސޯޝަލް މީޑިއާގައި ޕޯސްޓު ކޮށްފައިވާ ކަމަށް ވެސް ރިޕޯޓުގައިވެ އެވެ.

އަލް ސާދީ ތުރުކީ އިން ހައްޔަރު ކޮށްފައި ވަނީ މިއަހަރުގެ މެއި މަހުގެ 15 ވަނަ ދުވަހު އެވެ. އޭގެ ފަހުން އޭނާ ވަނީ އެމެރިކާއާ ހަވާލު ކޮށްފަ އެވެ. އޭނާގެ މައްޗަށް ޔޫރަޕް އާއި އެމެރިކާގައި ދީފައިވާ، އަދި ދޭން އުޅުނު 18 ހަމަލާއެއްގެ ތުހުމަތު ކުރެވޭ ކަމަށް ރިޕޯޓުތައް ބުނެ އެވެ. އޭނާ އަކީ އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އާއި ހިޒްބުالله އާ ގުޅުން އޮންނަ އެޖެންޓެއް ކަމަށް ތުހުމަތު ކޮށްފައިވެ އެވެ.

މީގެ އިތުރުން، ނެދަލެންޑްސްގެ ވެރި ރަށް އަމްސްޓެރްޑަމް އާއި، އިނގިރޭސިވިލާތުގެ ލަންޑަން އާއި، ކެނެޑާގެ ޓޮރޮންޓޯ އަދި ބެލްޖިއަމްގައި އެމެރިކާ އާއި ޔަހޫދީންގެ އަމާޒު ތަކަށް ދީފައިވާ ހަމަލާތަކާ ވެސް އޭނާއާ ގުޅުން އޮތް ކަމަށް ތުހުމަތު ކޮށްފައިވެ އެވެ. އަލް ސާދީ ބައިނަލްއަގުވާމީ ދަތުރުތައް ކުރުމަށާއި، ހަނގުރާމަވެރި ސެލްތަކާ ގުޅުން ބޭއްވުމަށްޓަކައި، ދީނީ ދަތުރުތައް ރާވައިދޭ އެޖެންސީއެއްގެ ނިވާފަތްގަނޑު ބޭނުން ކޮށްފައިވާ ކަމަށް ވެސް ނިއު ޔޯކް ޕޯސްޓު ގައި ވަނީ ބުނެފަ އެވެ.

މި މައްސަލައާ ގުޅިގެން، އެމެެރިކާގެ ރިޔާާސީ ގަނޑުވަރު ވައިޓް ހައުސްގެ ބަހެއް ހޯދުމަށް ނިއު ޔޯކް ޕޯސްޓް އިން ކުރި މަސައްކަތް ކާމިޔާބު ވެފައި ނުވެ އެވެ. އަދި އަލް ސާދީގެ ވަކީލު ވެސް މިކަމާ ގުޅޭ ގޮތުން އެއްވެސް ޖަވާބެއް ދީފައި ނުވާ ކަމަށް އެ ނޫހުން ބުނެ އެވެ. އަލް ސާދީ މިހާރު ހުރީ ބްރޫކްލިންގެ މެޓްރޯޕޮލިޓަން ޑިޓެންޝަން ސެންޓަރުގައި އެކަހެރިކޮށް ބަންދު ކޮށްފައި އެވެ.