އެމެރިކާ ދެކެވާ ލޯތްބެއްގެ ބޮޑު ކަމުން، ދަރިފުޅުގެ ކައިވެނީގައި ބައިވެރި ނުވާ ކަމަށް ޓްރަމްޕް ވިދާޅުވެއްޖެ

އެމެރިކާގެ ރައީސް ޑޮނަލްޑް ޓްރަމްޕްގެ ދޮށީ ދަރިފުޅު، ޑޮނަލްޑް ޓްރަމްޕް ޖޫނިއާ އާއި ޕާމް ބީޗްގެ ސޯޝަލައިޓް ބެޓީނާ އެންޑަސަން ކުރާ ކައިވެނީގެ ހަފުލާގައި ބައިވެރިވެ ވަޑައި ނުގެންނެވޭނެ ކަމަށް ޓްރަމްޕް އިއުލާން ކުރައްވައިފި އެވެ.

ޓްރަމްޕް ވިދާޅުވީ ދަރިފުޅުގެ ކައިވެނީގެ ހަފުލާ އަށް ވަޑައި ނުގެންނެވީ ސަރުކާރުގެ މުހިންމު މަސައްކަތް ތަކެއްގައި ވެރި ރަށް ވޮޝިންޓަންގައި މަޑު ކުރައްވަން ޖެހިވަޑައި ގަތުމުން ކަމަށެވެ.

މިކަމާ ގުޅޭ ގޮތުން ޓްރަމްޕްގެ އަމިއްލަ ސޯޝަލް މީޑިއާ ޕްލެޓްފޯމް ކަމަށްވާ "ޓްރުތް ސޯޝަލް" ގައި ކުރެއްވި ޕޯސްޓެއްގައި ވިދާޅުވީ، ދަރިފުޅު ޑޮން ޖޫނިއާ އާއި ޓްރަމްޕް އާއިލާގެ އައު މެންބަރަކަށް ވާން އުޅޭ ބެޓީނާގެ ކައިވެނީގައި ބައިވެރިވުމަށް ވަރަށް ބޮޑަށް ބޭނުން ފުޅުވި ކަމަށެވެ. ނަމަވެސް ސަރުކާރުގެ ކަންކަން ހުރި ގޮތުންނާއި، އެމެރިކާ ދެކެވާ ލޯތްބެއްގެ ބޮޑުކަމުން، މި ވަގުތު ރިޔާސީ ގަނޑުވަރު ވައިޓް ހައުސްގައި މަޑު ކުރެއްވުމަކީ މުހިންމު ކަމެއް ކަމަށް ދެކެ ވަޑައިގަންނަވާ ކަމަށް ޓްރަމްޕް ވިދާޅުވި އެވެ.

ހަފުތާ ބަންދުގައި ބަހާމަސްގެ ކުޑަ ރަށެއްގައި ބޭއްވުމަށް ހަމަޖެހިފައިވާ މި ކައިވެނީގެ ހަފުލާއާ ގުޅޭ ގޮތުން ސީއެންއެން އިން ރިޕޯޓު ކޮށްފައި ވަނީ، މިއީ ވަރަށް އަމިއްލަ އަދި ކުޑަ ހަފުލާއެއް ކަމަށެވެ. ބުރާސްފަތި ދުވަހު ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، ދަރިފުޅު ޑޮން ޖޫނިއާ، އޭނާ އެ ހަފުލާ އަށް ވަޑައިގަތުމަށް ބޭނުންވި ނަމަވެސް، މި ވަގުތަކީ އީރާނުގެ މައްސަލަ ފަދަ ބައިނަލްއަގުވާމީ ބޮޑެތި ކަންތައް ތަކެއް ހިނގަމުންދާ ވަގުތެއް ކަމުން ކައިވެންޏަށް ވަޑައި ގަތުމަށް ވަގުތު ތަން ނުދެނީ ކަމަށެވެ.

އެމެރިކާ އާއި އިޒްރޭލް އިން ފެބްރުއަރީ 28 ވަނަ ދުވަހު އީރާންއާ ދެކޮޅަށް ފެށި ހަނގުރާމަ ހުއްޓާލުމަށްޓަކައި، ޕާކިސްތާން އިން މެދުވެރިއެއްގެ ދައުރު އަދާ ކޮށްގެން ކުރިއަށް ގެންދާ ޑިޕްލޮމެޓިކް މަޝްވަރާ ތަކުގައި ޓްރަމްޕްގެ ސަރުކާރުން މިހާރު ދަނީ ބައިވެރި ވަމުންނެވެ. މި ހަނގުރާމައިގެ ސަބަބުން ދުނިޔޭގެ އިޤްތިޞާދަށް ވަނީ ބޮޑެތި ލޮޅު ންތަކެއް އަރައިފަ އެވެ.

އެމެރިކާގެ ރައީސް ރައީސް ޓްރަމްޕް ކުރިން ނިންމަވައިގެން ހުންނެވީ، ނިއު ޔޯކްގައި އޮތް އިވެންޓަކަށް ފަހު ހުކުރު ދުވަހުގެ ރޭ ނިއު ޖާޒީގެ ބެޑްމިންސްޓާގައި ހުންނަ އޭނާގެ ގޮލްފް ކުލަބުގައި މަޑު ކުރެއްވުމަށެވެ. ނަމަވެސް ހުކުރު ދުވަހު އާންމުކުރި އައު ތާވަލުގައިވާ ގޮތުން އޭނާ ވަނީ އަނބުރާ ވައިޓް ހައުސް އަށް ވަޑައިގަންނަވާ ގޮތަށް ނިންމަވާފައި އެވެ.

މިއީ ޑޮނަލްޑް ޓްރަމްޕް ޖޫނިއާ އެންގޭޖްވި ތިން ވަނަ ފަހަރެވެ. އޭނާ ކުރިން ކައިވެނި ކޮށްގެން އުޅުނީ ކުރީގެ މޮޑެލް އަދި އެކްޓްރެސް ވެނެސާއާ އެވެ. 12 އަހަރުވީ އެ ކައިވެންޏަށް ފަސް ދަރިން ލިބިފައިވާ އިރު، ވެނެސާ ވަނީ 2018 ވަނަ އަހަރު ވަރިވާން ހުށަހަޅާފައި އެވެ. އޭގެ ފަހުން އެމެރިކާގެ ޓީވީ ޝަޚްސިއްޔަތެއް ކަމަށްވާ ކިމްބާލީ ގިލްފޮއިލްއާ އެންގޭޖްވި ނަމަވެސް، 2024 ވަނަ އަހަރު އެ ދެމީހުން ވަނީ ވަކިވެފަ އެވެ. ޑޮން ޖޫނިއާގެ ކައިވެންޏާ ގުޅޭ ގޮތުން އޭނާގެ ތަރުޖަމާނު އަދި ވަކި އެއްޗެއް ބުނެފައެއް ނުވެ އެވެ.