ޗެލްސީ ބަލިކޮށް، ސިޓީ އިން އަށް ވަނަ ފަހަރަށް އެފްއޭ ކަޕް ކާމިޔާބު ކޮށްފި

އިނގިރޭސި އެފްއޭ ކަޕްގެ ފައިނަލްގައި ޗެލްސީ ބަލިކޮށް، މެންޗެސްޓަރ ސިޓީ އިން މުބާރާތް ކާމިޔާބު ކޮށްފި އެވެ.

އިނގިރޭސި ވެމްބްލީ ސްޓޭޑިއަމްގައި ހޮނިހިރު ދުވަހުގެ ރޭ ކުޅުނު މެޗު ސިޓީ އިން ކާމިޔާބު ކުރީ 1-0 އިންނެވެ. މެޗުގައި ސިޓީ އިން ހަމައެކަނި ލަނޑު ޖެހީ ވެސް މެޗުގެ ދެ ވަނަ ހާފުގަ އެވެ.

މެޗު ފަށައިގެން ސިޓީ އިން ރަނގަޅަށް ކުޅެފައިވާއިރު، އެ ޓީމުން ވަނީ ޗެލްސީ ކޮޅަށް ލަނޑު ޖަހަން މަސައްކަތް ކޮށްފަ އެވެ. މެޗުގެ ފުރަތަމަ ހާފުގައި ވެސް ސިޓީ އަށް ވަނީ ލަނޑު ޖަހައި ލީޑު ނަގަން ފުރުސަތު ލިބިފަ އެވެ. ނަމަވެސް، އެ ޓީމަށް ލިބުނު އެއްވެސް ފުރުސަތެއްގެ ބޭނުން ކުރެވޭ ގޮތެއް ނުވި އެވެ. 

މެޗުގެ ދެ ވަނަ ހާާފުގައި ސިޓީ އިން ވަނީ ލަނޑު ޖަހައި ލީޑު ނަގައިފަ އެވެ. އެގޮތުން މެޗުގެ 72 ވަނަ މިނެޓުގައި ސިޓީ އަށް ލީޑު ނަގައިދިނީ އެންޓޮއިން ސެމެންޔޯ އެވެ. އެ ލަނޑު ޖަހަން އޭނާާ އަށް ފުރުސަތު ތަނަވަސްކޮށްދިނީ ނޯވޭގެ ފޯވާާޑު އާލިން ހާލަންޑް އެވެ.

މޮޅާ އެކު ސިޓީ އިން އެފްއޭ ކަޕް ކާމިޔާބު ކޮށްފައިވާއިރު، މިއީ ސިޓީ އިން އެފްއޭ ކަޕް ކާމިޔާބު ކުރި އަށް ވަނަ ފަހަރެވެ. މީގެ ކުރިން ސިޓީ އިން ވަނީ 2023 ވަނަ އަހަރު އެފްއޭ ކަޕް ކާމިޔާބު ކޮށްފަ އެވެ. ސިޓީ އިން އެ އަހަރު އެފްއޭ ކަޕް ކާމިޔާބު ކުރީ ވާދަވެރި މެންޗެސްޓަރ ސިޓީ ބަލިކޮށްގެންނެވެ. ޖެހިގެން އައި 2024 ވަނަ އަހަރުގެ އެފްއޭ ކަޕްގެ ފައިނަލްގައި ސިޓީ އާއި ޔުނައިޓެޑު ވާދަކުރިއިރު، އެފަހަރު ޔުނައިޓެޑުން ވަނީ ސިޓީ ބަލިކޮށްފަ އެވެ. 

އަނެއްކޮޅުން މިއީ މި ސީޒަންގައި ސިޓީ އިން ކާމިޔާބު ކުރި ދެ ވަނަ ތައްޓެވެ. މީގެ ކުރިން ސިޓީ އިން ވަނީ ކަރަބޯ ކަޕްގެ ފައިނަލްގައި އާސެނަލް ބަލިކޮށް، ކަރަބޯ ކަޕް ކާމިޔާބު ކޮށްފަ އެވެ. މި ސީޒަންގެ އިނގިރޭސި ޕްރިމިއާ ލީގުގައި ސިޓީ އާއި އާސެނަލްގެ ވާދަވެރިކަން ބޮޑުއިރު، ސިޓީ އޮތީ ލީގު ރޭހުގެ ދެ ވަނައިގަ އެވެ.

ޕްރިމިއާ ލީގު ތާވަލްގެ ދެ ވަނައިގައި ސިޓީ އޮތީ މިހާތަނަށް އެ ޓީމު ކުޅެފައިވާ 36 މެޗުން 77 ޕޮއިންޓާ އެކު އެވެ. ހަމަ އެ އަދަދަަށް މެޗު ކުޅެގެން އެއް ވަަނައިގައި އާސެނަލް އަށް ލިބެނީ 79 ޕޮއިންޓެވެ. ދެ ޓީމަށް ވެސް ބާކީ ދެ މެޗު އޮތްއިރު، ސިޓީ އަށް ލީގު ކާމިޔާބު ކުރުމުގެ ފުރުސަތު އޮތީ އާސެނަލް އިން ޕޮއިންޓެއް ގެއްލުވާލައިގެންނެވެ. 

ސިޓީ އިން އެފްއޭ ކަޕް ކާމިޔާބު ކުރުމާ އެކު، އެ ޓީމަށް އިރުޝާދު ދެމުން އަންނަ ޕެޕް ގާޑިއޯލާ އަށް ވެސް ވަނީ ޚާއްސަ ކާމިޔާބެއް ލިބިފަ އެވެ. އެގޮތުން ފާއިތުވި 10 އަހަރުގެ ތެރޭގައި ގާޑިއޯލާ މި ވަނީ 20 ތަށި ކާމިޔާބު ކޮށްފަ އެވެ.

އޭގެ ތެރޭގައި ޕްރިމިއާ ލީގު ހަ ފަހަރު ކާމިޔާބު ކުރުމުގެ އިތުރުން، އެފްއޭ ކަޕް ތިން ފަހަރު ކާމިޔާބު ކުރުމާއި، ކަރަބޯ ކަޕް ފަސް ފަހަރު ކާމިޔާާބު ކުރުމާއި، އެފްއޭ ކޮމިއުނިޓީ ޝީލްޑް ތިން ފަހަރު ކާމިޔާބު ކުރުމާއި، ޔުއެފާ ޗެމްޕިއަންސް ލީގު އެއް ފަހަރު ކާމިޔާބު ކުރުމާއި، ޔުއެފާ ސުޕަ ކަޕް އެއް ފަހަރު ކާމިޔާބު ކުރުން އަދި ފީފާ ކުލަބު ވޯލްޑް ކަޕް އެއް ފަހަރު ކާމިޔާބު ކުރުން ހިމެނެ އެވެ.