ސިޓީ އަށް ވަރަށް ޕްރެޝަރު އެބަ އޮތް: ގާޑިއޯލާ

އިނގިރޭސި ޕްރިމިއާ ލީގު ރޭހުގައި މެންޗެސްޓަރ ސިޓީ އަށް ވަރަށް ބޮޑު ޕްރެޝަރެއް އޮތް ކަމަށް، އެ ޓީމަށް އިރުޝާދު ދެމުން އަންނަ ޕެޕް ގާޑިއޯލާ ބުނެފި އެވެ.

ގާޑިއޯލާ މިހެން ބުނެފައި ވަނީ، ލީގުގައި ސިޓީ އިން ކްރިސްޓަލް ޕެލަސްއާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގަ އެވެ. ލީގުގައި ސިޓީ އާއި އާސެނަލްގެ ވާދަވެރިކަން ބޮޑުވެފައިވާއިރު، ޕެލަސް މެޗުން މޮޅުވުމަކީ ސިޓީ އަށް ކޮންމެހެން މަޖުބޫރުވެފައިވާ ކަމެކެވެ.

ގާޑިއޯލާ ބުނީ، ސިޓީ އަށް ޕްރެޝަރު އެބަ އޮތް ކަމަށާއި އެކަމަށް ބަދަލެއް ނާންނަ ކަމަށެވެ. އެގޮތުން ގާޑިއޯލާ ބުނީ މީގެ އެއް ދުވަސް ކުރިން، ނުވަތަ ދެ ދުވަސް ކުރިން، ނުވަތަ ދެ ހަފުތާ އަދި ހަފުތާ ތަކެއް ކުރިން ސިޓީ އަށް އޮތް ޕްރެޝަރު މިއަދު ވެސް އެބަ އޮތް ކަމަށެވެ. އެކަން ފާހަގަކޮށް ގާޑިއޯލާ ބުނީ، އެއްވެސް ކަމެއް ކޮންޓްރޯލް ނުކުރެވޭނެ ކަމަށެވެ.

މީގެ އިތުރުން ގާޑިއޯލާ ބުނީ، ކުރަން އޮތް މަސައްކަތަށް ފޯކަސް ކޮށްގެން، ރަނގަޅު ކުރަން މަސައްކަތް ކުރަން ޖެހޭ ކަމަށެވެ. އެއާ އެކު އޭނާ ބުނީ، މި ސީޒަންގެ އިނގިރޭސި ޕްރިމިއާ ލީގުގައި ސިޓީ އަށް އެންމެ އެކަށީގެންވާ ގޮތުގައި މަސައްކަތް ނުކުރެވޭ ކަމަށެވެ. ސިޓީ އިން އަދި ވެސް ދަނީ "ފައިޓް" ކުރަމުން ކަމަށާއި، ޕެލަސް މެޗު އިންތިހާ އަށް މުހިންމު ކަމަށް ވެސް އޭނާ ބުނެފައިވެ އެވެ. 

ޕެލަސްއާ ގުޅޭ ގޮތުން ވާހަކަ ދައްކަމުން ގާޑިއޯލާ ބުނީ، އެ ޓީމަކީ އަބަދު ވެސް އުނދަގޫ ޓީމެއް ކަމަށެވެ. މިހާރު ވަކިން ޕެލަސް އަކީ އުނދަގޫ ޓީމަކަށް ވާނެ ކަމަށާއި، އެ ޓީމާ ދެކޮޅަށް ކުޅުމުގައި ގިނަ ކަންތައްތަކަށް ސަމާލުކަން ދޭން ޖެހޭ ކަމަށް ގާޑިއޯލާ ބުންޏެވެ. ނަމަވެސް ސިޓީ އިން މަސައްކަތް ކުރާނީ އެ ޓީމުގެ ފެންވަރުގައި ކަމަށާއި، ސިޓީ އިން ބޭނުން ވަނީ މެޗުން މޮޅުވުން ކަަމަށް ވެސް ގާޑިއޯލާ ބުންޏެވެ.

ލީގު ތާވަލްގައި ސިޓީ އޮތީ ދެ ވަނައިގަ އެވެ. އެއީ މިހާތަނަށް އެ ޓީމު ކުޅެފައިވާ 35 މެޗުން 74 ޕޮއިންޓާ އެކު އެވެ. ސިޓީ އަށް ވުރެ އެއް މެޗު މަދުން ކުޅެގެން އެއް ވަނައިގައި އާސެނަލް އަށް ލިބެނީ 79 ޕޮއިންޓެވެ. މެޗުގެ އަދަދު ހަމަކޮށް އާސެނަލްއާ ދެެމެދު އޮތް ފަރަގު ދެ ޕޮއިންޓަށް ކުޑަ ކުރުމުގެ ފުރުސަތު ސިޓީ އަށް އޮންނާނެ އެވެ.