އެވަޓަންއާ އެއްވަރުވެ، ސިޓީ އަށް ފައިދާ ނުނެގުނު
މިހާރު ސިޓީ ދެ ވަނައިގައި އޮތީ 34 މެޗުން 71 ޕޮއިންޓާ އެކު. ސިޓީ އަށް ވުރެ އެއް މެޗު އިތުރަށް ކުޅެގެން އާސެނަލް އެއް ވަަނައިގައި އޮތީ 76 ޕޮއިންޓާ އެކު. މިހާރު ސިޓީ އިން މެޗުގެ އަދަދު ހަމަކުރާއިރު ވެސް، އާސެނަލް އަށް ދެ ޕޮއިންޓުގެ ލީޑެއް އޮންނާނެ.
އެވަޓަން މެޗު އެއްވަރުވުމުން ސިޓީގެ ކުޅުންތެރިން މާޔޫސްވެފައި. | ރޮއިޓާސް
އިނގިރޭސި ޕްރިމިއާ ލީގުގައި އެވަޓަންއާ ދެކޮޅަށް ކުޅުނު މެޗުން އެއްވަރުވެ، ލީގު ތާވަލްގެ އެއް ވަަނައިގައި އޮތް އާސެނަލްއާ ދެެމެދު ފަރަގު ކުޑަ ކުރަން އޮތް ފުރުސަތު މެންޗެސްޓަރ ސިޓީ އިން ނަގާލައިފި އެވެ.
އެވަޓަންގެ އަމިއްލަ ދަނޑުގައި ހޯމަ ދުވަހުގެ ރޭ ދަންވަރު ކުޅުނު މެޗު ނިމުނީ ދެ ޓީމު 3-3 އިން އެއްވަރު ވެގެންނެވެ. މެޗުގައި ސިޓީ އިން ލީޑު ހޯދާފައި ވަނިކޮށް، ފަހަތުން އަރައި އެވަޓަން އިން ލީޑު ވެސް ނެގި އެވެ. ނަމަވެސް، އިތުރު ދެ ލަނޑު ޖަހައިގެން ސިޓީ އިން ނަތީޖާ ހަމަހަމަ ކުރި އެވެ.
މެޗުގެ ފުރަތަމަ ހާފުގެ 43 ވަނަ މިނެޓުގައި ސިޓީ އަށް ލީޑު ނަގައިދިނީ ޖެރެމީ ޑޮކޫ އެވެ. އޭގެ ފަހުން މެޗުގެ ދެ ވަނަ ހާފުގެ 68 ވަނަ މިނެޓުގައި އެވަޓަން އަށް ނަތީޖާ ހަމަހަމަ ކޮށްދިނީ ތިއާނޯ ބެރީ އެވެ. އޭގެ ފަސް މިނެޓު ފަހުން ޖޭކް އޯބްރަޔަން ވަނީ އެވަޓަންގެ ދެ ވަނަ ލަނޑު ޖަހައި ލީޑު ނަގައިދީފަ އެވެ.
އެވަޓަން އިން ދެ ވަނަ ލަނޑެއް ޖެހުމަށް ފަހު، 81 ވަނަ މިނެޓުގައި ތިން ވަނަ ލަނޑެއް ޖަހައި ލީޑު ފުޅާ ވެސް ކުރި އެވެ. އެ ލަނޑު އެވަޓަން އަށް ޖަހައިދިނީ ބެރީ އެވެ. ނަމަވެސް އޭގެ ދެ މިނެޓު ފަހުން އާލިން ހާލަންޑު ވަނީ ލަނޑު ޖަހައި ސިޓީ އަށް ފަރަގު ކުޑަ ކޮށްދީފަ އެވެ. އަދި މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޑޮކޫ ވަނީ ސިޓީ އަށް ނަތީޖާ ހަމަހަމަ ކޮށްދީފަ އެވެ.
މެޗުން މޮޅުވެ އާސެނަލްއާ ދެމެދު އޮތް ފަރަގު ކުޑަ ކުރުމުގެ ފުރުސަތު ސިޓީ އަށް އޮތެވެ. މިހާރު ސިޓީ ދެ ވަނައިގައި އޮތީ 34 މެޗުން 71 ޕޮއިންޓާ އެކު އެވެ. ސިޓީ އަށް ވުރެ އެއް މެޗު އިތުރަށް ކުޅެގެން އާސެނަލް އެއް ވަަނައިގައި އޮތީ 76 ޕޮއިންޓާ އެކު އެވެ. މިހާރު ސިޓީ އިން މެޗުގެ އަދަދު ހަމަކުރާއިރު ވެސް، އާސެނަލް އަށް ދެ ޕޮއިންޓުގެ ލީޑެއް އޮންނާނެ އެވެ.
