އާޓެޓާ ހުރީ ޔަޤީންކަމާ އެކު، އެދުނީ ސަޕޯޓަރުން ސާބިތުކަމާ އެކު ތިބުމަށް!

މި ސީޒަންގައި އާސެނަލް އިން ހާސިލު ކުރަން ބޭނުންވާ ކަންކަން ހާސިލު ކުރުމަށް ގަދައަޅާ މަސައްކަތް ކުރާނެ ކަމަށާއި، ޓީމާ މެދު ޔަޤީންކަން އޮތް ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.

އާޓެޓާ މިހެން ބުނީ، ހޮނިހިރު ދުވަހުގެ ރޭ އިނގިރޭސި ޕްރިމިއާ ލީގުގައި ފުލަމްއާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ.

އާޓެޓާ ބުނީ ޔުއެފާ ޗެމްޕިއަންސް ލީގުގެ ސެމީ ފައިނަލްގެ ފުރަތަމަ ލެގަށް ފަހު، އާސެނަލްގެ ފުރިހަމަ ފޯކަސް އޮތީ ފުލަމް މެޗަށް ކަމަށެވެ. އެގޮތުން އޭނާ ބުނީ، އާސެނަލް އޮތީ ވާދަވެރި ކުޅުމަކަށް ބޭނުންވެފައި ކަމަށާއި، އާސެނަލް އޮތީ މޮޅުވުމުގެ ރޫހުގައި ކަމަށެވެ. ހަމަ އެއާ އެކު، އާސެނަލްގެ ހުވަފެން ހަގީގަތަކަށް ހެދުމަށް ކެތްމެދުވެފައި ތިބި ކަމަށާއި، އެކަމަށް "ފެން ބޮވައިގެންފައި" ތިބި ކަމަށް ވެސް އާޓެޓާ ބުނެފައިވެ އެވެ.

މީގެ އިތުރުން އާޓެޓާ ވަނީ، އާސެނަލްގެ ސަޕޯޓަރުން ޓީމާ އެކު ދެމި ތިބުމަށް ވެސް އެދިފަ އެވެ. އޭނާ ބުނީ ސީޒަންގެ މިހާތަނަށް އައިއިރު، ސަޕޯޓަރުންގެ ފަރާތުން ފެނުނު ރޫހާއި، ހިތްވަރު އަދި ޓީމަށް ދިން ސަޕޯޓު ކުރިއަށް އޮތް ދުވަސް ތަކުގައި ވެސް ދިނުމަށް އެދޭ ކަމަށެވެ. ކުޅުންތެރިންނެކޭ އެއްވަރަށް، އާސެނަލްގެ ސަޕޯޓަރުން ވެސް ބޭނުން ވަނީ ކާމިޔާބު ކަމަށާއި، އެކަން ހާސިލު ކުރުމަށް ކުޅުންތެރިންނާއި ސަޕޯޓަރުން އެކުގައި ތިބެން ވާނެ ކަމަށް އާޓެޓާ ބުންޏެވެ.

ފުލަމްއާ ގުޅޭ ގޮތުން ވާހަކަ ދައްކަމުން އާޓެޓާ ބުނީ، ފުލަމްގެ ކޯޗު މާކޯ ސިލްވާ އަންނަނީ ވަރަށް ރަނގަޅު މަސައްކަތް ތަކެއް ކުރަމުން ކަމަށެވެ. އާޓެޓާގެ ނަޒަރުގައި ސިލްވާ އަކީ، މިވަގުތު ޕްރިމިއާ ލީގުގައި މަސައްކަތް ކުރަމުން އަންނަ ކޯޗުންގެ ތެރެއިން އެންމެ މޮޅު އެއް ކޯޗެވެ. ޚާއްސަކޮށް އޭނާގެ އިރުޝާދުގެ ދަށުން ފުލަމް ރާވާލާފައި އޮންނަ ގޮތާއި، އެ ޓީމުގެ ކުޅުމާއި، އަދި އިދިކޮޅު ޓީމުތަކަށް ކުރިމަތިވާ އުނދަގޫ ތަކަކީ އަބަދު ވެސް ފާހަގަވާ ކަމެއް ކަމަށް އާޓެޓާ ވަނީ ބުނެފަ އެވެ.

އާސެނަލްގެ އެމިރޭޓްސް ސްޓޭޑިއަމްގައި ފުލަމްއާ ދެކޮޅަށް ނިކުންނައިރު، އެ ޓީމު އެއް ވަނައިގައި އޮތީ މިހާތަނަށް ކުޅެފައިވާ 34 މެޗުން 73 ޕޮއިންޓާ އެކު އެވެ. އާސެނަލް އަށް ވުރެ އެއް މެޗު މަދުން ކުޅެގެން، ދެ ވަނައިގައި ވާދަވެރި މެންޗެސްޓަރ ސިޓީ އަށް 70 ޕޮއިންޓު ލިބޭއިރު، ދެ ޓީމުގެ ދެ މެދުގައި ލީގުގެ ވާދަވެރިކަން ވަނީ އިންތިހާ އަށް ބޮޑުވެފަ އެވެ.