ފުލަމް އަތުން މޮޅުވެ، އާސެނަލް އިން ލީޑު ނަގައިފި

އިނގިރޭސި ޕްރިމިއާ ލީގުގައި ފުލަމްއާ ދެކޮޅަށް ކުޅުނު މެޗުން މޮޅުވެ، އާސެނަލް އިން ލީގު ތާވަލްގެ އެއް ވަނަ މަގާމުގައި ލީޑު ނަގައިފި އެވެ.

އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި ހޮނިހިރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 3-0 އިންނެވެ. މެޗުގައި އާސެނަލް އިން އެ ޓީމުގެ ތިން ލަނޑު ވެސް ޖެހީ މެޗުގެ ފުރަތަމަ ހާފުގަ އެވެ. 

މެޗު ފަށައިގެން ނުވަ ވަނަ މިނެޓުގައި އާސެނަލް އިން ވަނީ ލަނޑު ޖަހައި ލީޑު ނަަގައިފަ އެވެ. އެ ލަނޑު އާސެނަލް އަށް ޖަހައިދިނީ ވިކްޓާ ޔޮކަރޭޝް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ބުކަޔޯ ސަކާ އެވެ. އޭގެ ފަހުން މެޗުގެ 29 ވަނަ މިނެޓުގައި އާސެނަލްގެ ރިކާޑޯ ކަލަފިއޯރީ ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ.

މެޗުގެ ފުރަތަމަ ހާފުގެ 40 ވަނަ މިނެޓުގައި އާސެނަލްގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ސަކާ އެވެ. އެއީ ޔޮކަރޭޝް ތަނަވަސްކޮށްދިން ފުރުސަތެއްގައި ސަކާ ޖެހި ލަނޑެކެވެ. އޭގެ ފަހުން ފުރަތަމަ ހާފުގެ އިތުރު ވަގުތުގައި ޔޮކަރޭޝް ވަނީ އާސެނަލްގެ ތިން ވަނަ ލަނޑު ވެސް ޖަހައިފަ އެވެ. އެއީ ލިއާންޑްރޯ ޓްރޮސާޑް ތަނަވަސްކޮށްދިން ފުރުސަތެއްގައި ޔޮކަރޭޝް ޖެހި ލަނޑެކެވެ. މެޗުގެ ދެ ވަނަ ހާފުގައި ޔޮކަރޭޝް އަށް ވަނީ އޭނާގެ ތިން ވަނަ ލަނޑެއް ޖަހައި ހެޓްރިކް ހަދާނެ ފުރުސަތު ވެސް ލިބިފަ އެވެ.

މޮޅާއެކު އާސެނަލް އިން ވަނީ އެއް ވަނައިގައި ހަ ޕޮއިންޓުގެ ލީޑެއް ނަގައިފަ އެވެ. ނަމަވެސް، އެއީ ދެ ވަނައިގައި އޮތް ވާދަވެރި މެންޗެސްޓަރ ސިޓީ އަށް ވުރެ ދެ މެޗު އިތުރަށް ކުޅެގެންނެވެ. ލީގުގައި މިހާތަނަށް ކުޅެފައިވާ 35 މެޗުން އާސެނަލް އަށް ލިބެނީ 76 ޕޮއިންޓެވެ. އާސެނަލް އަށް ވުރެ ދެ މެޗު މަދުން ކުޅެފައިވާ ސިޓީ އަށް ދެ ވަނައިގައި ލިބެނީ 70 ޕޮއިންޓެވެ. ލީގުގައި އެވަޓަންއާ ދެކޮޅަށް ކުޅޭ މެޗުން މޮޅުވެ، ފަރަގު ކުޑަ ކުރުމުގެ ފުރުސަތު ސިޓީ އަށް އެބަ އޮތެވެ.