ސިޔާސީ ގޮތުން މީހުން ޖަލަށް ލުމަށްފަހު ވެސް އެ ވިދާޅުވަނީ ސިޔާސީ ހައްޔަރީން ނެތް ކަމަށް!

ދިވެހިރާއްޖޭގެ ސިޔާސީ މަޝްރަހުގައި މިހާރު އެންމެ ގަދައަށް ދެކެވޭ އެއް ވާހަކައަކީ ސިޔާސީ ހައްޔަރީންނާ ގުޅޭގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްކެވި ވާހަކަފުޅުތަކެވެ. ދައުލަތުގެ މީޑިއާއިން ގެނެސްދިން "ނޭޝަން ޗެޓް" ޕްރޮގްރާމްގައި ރައީސް މުއިއްޒު ވިދާޅުވީ ރާއްޖޭގައި މިހާރު ސިޔާސީ ހައްޔަރީންނެއް ނުތިބޭނެ ކަމަށާއި، ބަދަލުހިފުމުގެ ރޫހު ނައްތާލުމަކީ އެމަނިކުފާނުގެ ވައުދެއް ކަމަށެވެ. 

ނަމަވެސް ކުރީގެ ސަރުކާރުތަކުގައި އޮތީ ސިޔާސީ ގޮތުން ބަދަލުހިފުމުގެ ސަގާފަތެއް ކަމަށް ރައީސް މުއިއްޒު ތަކުރާރުކޮށް ވިދާޅުވެފައިވެ އެވެ. އެމަނިކުފާނު ގަބޫލުކުރައްވާ ގޮތުގައި މިހާރު އެކަން ވަނީ ބަދަލުކުރެވިފަ އެވެ. މީގެ އިތުރުން އިދިކޮޅު ޕާޓީތަކަށް ފާޑުވިދާޅުވަމުން ރައީސް ވިދާޅުވީ، އިދިކޮޅު ފަރާތްތަކުގެ ސިކުނޑީގައި އަބަދުވެސް އޮންނަނީ ހަމަނުޖެހުން އުފެއްދުމާއި އަމިއްލަ އެދުން އިސްކުރުމުގެ ވިސްނުން ކަމަށެވެ. އަދި ޑިމޮކްރަސީ ފައްކާކުރުމަށްޓަކައި ޒިންމާދާރު އޮޕޮޒިޝަނެއް އޮތުން މުހިންމުކަން އެމަނިކުފާނު ފާހަގަކުރެއްވި އެވެ.

ރައީސް މުއިއްޒު މިފަދައިން ވިދާޅުވި ނަމަވެސް، އަމަލީ މައިދާނުން ފެންނަ މަންޒަރު ތަފާތެވެ. ސިޔާސީ ހައްޔަރީންނާއި، ނޫސްވެރިން ޖަލަށް ލުމުގެ ސަގާފަތެއް ފެށިގެން މިދިޔައީ އެމަނިކުފާނަށް ގިނަ ތުހުމަތު ކުރެވޭ ގޮތަށް އާއްމުކުރި "އައިޝާ" ޑޮކިއުމެންޓްރީއާއެކު އެވެ. އަދި އެ ޑޮކިއުމެންޓްރީގެ ވާހަކަ ސީދާކޮށް ވެސް ނުސީދާކޮށް ވެސް ދެއްކުން މަނާކޮށް "މުޅި ރާއްޖެ" އަށް ކްރިމިނަލް ކޯޓުން 10 މެއި 2026 ގައި ނެރުނު އަމުރާ ހިލާފުވި ކަމަށް ނިންމައި، އަދަދު ނޫހުގެ ދެ ނޫސްވެރިން ލީވާން އަލީ ނަސީރާއި މުހައްމަދު ޝަހުޒާން ޖަލަށްލުމާއެކު ނޫސްވެރިން މިނިވަން ކުރުމަށް ގޮވާލާ މުޒާހަރާތަކާއި، އެއްވުންތައް އިތުރުވެގެން ދިޔަ އެވެ. އަދި އެ ނޫހުގެ ސީއީއޯ ހުސެއިން ފިޔާޒް މޫސާ އާއި އެޑިޓަރު ހަސަން މުހައްމަދުގެ މައްޗަށް ޖިނާއީ ދައުވާ އުފުލާފައިވުމަކީ ނޫސްވެރިކަމުގެ މިނިވަންކަމަށް އެޅުނު ހުރަހެއް ކަމަށާއި، މިއީ ސިޔާސީ ގޮތުން ކުރާ ކަމެއް ކަމަށް ގިނަ ބަޔަކު ބުނެ އެވެ. 

ސިޔާސީ ހައްޔަރީން ނެތް ކަމަށް ރައީސް މުއިއްޒު ތަކުރާރުކޮށް ވިދާޅުވި ނަމަވެސް މިހާރު ވެސް ކޮންމެ ރެއަކު ފެންނަމުންދާ އެއް މަންޒަރަކީ ޕީއެންއެފް އަދި އެމްޑީޕީގެ މުޒާހަރާތަކުން އެތައް ބަޔަކު ހައްޔަރު ކުރާ މަންޒަރެވެ.

އެގޮތުން މުޒާހަރާ ލީޑު ކުރުމުގެ މަސައްކަތުގައި ހަރަކާތްތެރިވާ އެމްޑީޕީ ގައުމީ މަޖިލީހުގެ ހަސަން ހުސެއިން ވެސް އެތައް ފަހަރަކު މުޒާހަރާގެ ތެރެއިން ހައްޔަރު ކޮށްފައިވެ އެވެ. އަދި މީގެ ކުރިން ބޭއްވި މުޒާހަރާއަކުން ސޯޝަލް މީޑިއާ އެކްޓިވިސްޓު ޝަމްއޫން ޖަލީލު ވެސް ވަނީ ހައްޔަރުކޮށް ބަންދުކޮށްފަ އެވެ.

މީގެ އިތުރުން ކުރީގެ އިމިގްރޭޝަން ކޮންޓްރޯލަރު ޝައްމާން ވަހީދުގެ މައްޗަށް އުފުލާފައިވާ ދައުވާތަކަކީ ވެސް ސިޔާސީ ނުފޫޒުން ކުރެވޭ ކަމެއް ކަމަށް އާއިލާގެ އިތުރުން ގިނަ އާއްމު ރައްޔިތުން ދަނީ ބުނަމުންނެވެ. 

މިގޮތަށް އަނިޔާވެރިވެ، ރައްޔިތުންނަށް ދަތި ކުރަމުންދަނީ މިސަރުކާރުގެ ނޭއްގާނީ އެންމެހައި އަމަލުތައް ފޮރުވުމަށް ކަމަށް ގިނަ މީހުން ތުހުމަތު ވެސް ކުރެ އެވެ. އަދި އެއްވެ އުޅުމާއި، ހިޔާލުފާޅު ކުރުމާއި، ދުލުގެ މިނިވަން ކަމަށް ހުރަސްއަޅަމުންދާނީ ހަގީގަތް ސިއްރު ކުރުމުގެ މަގުސަދުގައި ނޫންތޯ އެވެ. ސިޔާސީ ގޮތުން ޒާތީވެ، އެތައް ބަަޔަކު ޖަލަށް ލުމަށް ބަންދު މުއްދަތު ޖަހަމުންދާ މަންޒަރު ފެންނައިރު، ސިޔާސީ ހައްޔަރީން ނެތް ކަމަށް ރައީސް މުއިއްޒު ވިދާޅުވަމުން ގެންދަވާތީ، އެމަނިކުފާނަކީ ތަފާތު ''ކެރަކްޓަރ'' ގެންގުޅުއްވާ ބޭފުޅެއް ގޮތުގައި ސިފަކޮށް ރައްޔިތުން ދަނީ މާލާމާތް ވެސް ކުރަމުންނޭ ބުންޏަސް މިއަދު ދޮގަކަށް ނުވާނެ އެވެ.