ރައީސް މުއިއްޒު ސިންގަޕޫރަށް ވަޑައިގަތީ ނާޒިމް އާ ބައްދަލުކުރައްވާކަށް ނޫން، އާއިލާ އެކު ޗުއްޓީ ހޭދަކުރުމަށް: ތަރުޖަމާނު

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސިންގަޕޫރަށް ކުރައްވާ ދަތުރުފުޅަކީ އާއިލާއާއެކު ޗުއްޓީ ހޭދަކުރެއްވުމަށް ކުރައްވާ ދަތުރުފުޅެއް ކަމަށާއި، އެއީ ރައްޔިތުންގެ މަޖިލީހުގެ ނައިބު ރައީސް އަޙްމަދު ނާޒިމާ ބައްދަލުކުރެއްވުމަށް ކުރައްވާ ދަތުރުފުޅެއް ނޫން ކަމަށް ސަރުކާރުގެ އިސް ތަރުޖަމާނު މުހައްމަދު ހުސައިން ޝަރީފް (މުންދު) ވިދާޅުވެއްޖެއެވެ.

މުންދު މިފަދައިން ވިދާޅުވީ، ރައީސް ސިންގަޕޫރަށް ވަޑައިގަތީ ދިއްގަރު ދާއިރާގެ މެންބަރު އަޙްމަދު ނާޒިމާ ބައްދަލުކުރެއްވުމަށް ކަމަށް ބައެއް ފަރާތްތަކުން ރިޕޯޓްކޮށް، ސޯޝަލް މީޑިއާގައި ވާހަކަ ފެތުރެމުންދާ ދަނޑިވަޅެއްގަ އެވެ.  ނަމަވެސް މިކަން ދޮގުކުރައްވައި މުންދު ވިދާޅުވީ ރައީސްގެ މި ދަތުރުފުޅަކީ އާއިލީ ޗުއްޓީއެއް ކަމަށާއި، ބައެއް ފަރާތްތަކުން ފަތުރާ ވާހަކަތަކަކީ ހަގީގަތާ ޚިލާފު ވާހަކަތަކެއް ކަމަށެވެ.

ރައީސްގެ ދަތުރުފުޅާ ގުޅޭގޮތުން ތަފާތު އަޑުތަކެއް ފެތުރެމުންދާއިރު، މަޖިލީހުގެ ނައިބު ރައީސްކަމުން ނާޒިމް ވަކިކުރަން ޕީއެންސީގެ ޕާލަމެންޓަރީ ގްރޫޕުން ވަނީ މި މަހުގެ 13 ވަނަ ދުވަހު ނިންމާފައެވެ. 73 މެންބަރުންގެ ސޮޔާއެކު މަޖިލީހަށް ހުށަހެޅި ގަރާރުގައި ބުނެފައިވަނީ، ނާޒިމް މަގާމުގެ ނުފޫޒުން ނާޖާއިޒު ފައިދާ ނަގައި، ފިތުނަ އުފައްދައި، މަޖިލީހުގެ މަސްލަހަތު ނަގާލަން މަސައްކަތް ކުރައްވާފައިވާ ކަމަށެވެ.

ޕީއެންސީގެ އިސް މެންބަރަކު މީގެ ކުރިން ވިދާޅުވެފައިވާ ގޮތުގައި، ނާޒިމް ވަކިކުރުމުގެ މައްސަލަ މަޖިލީހަށް ހުށަހެޅީ އަމިއްލައަށް އިސްތިއުފާ ދެއްވުމަށް އެންގުމުން އެކަމަށް އިޖާބަ ނުދެއްވުމާ ގުޅިގެންނެވެ. ޕީއެންސީގެ ބައެއް މެންބަރުން ތުހުމަތު ކުރާ ގޮތުގައި، ނާޒިމް ގެންދަވަނީ ޕާޓީގެ 23 މެންބަރަކާއެކު ޕާޓީ ބަދަލުކުރައްވައި، ރައީސްގެ އިތުބާރު ނެތްކަމުގެ ވޯޓެއް ނެގުމަށް މަސައްކަތް ކުރައްވަމުންނެވެ.