ތިއްބެވީ ރައީސް މުއިއްޒު އާއެކު ގަދަކޮށް، ފެނިގެންދަނީ ދުވަހެއް ދުވަހަކަށް ސަރުކާރު ބަލިކަށިވެގެންދާ މަންޒަރު

ރާއްޖޭގެ މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވެރިކަމުގެ ފުރަތަމަ ދުވަހުން ފެށިގެން ފެނިގެންދިޔައީ، ދެވަނަ ދައުރެއް ކަށަވަރުކުރުމަށްޓަކައި ވަރުގަދަ މަސައްކަތްތަކެއް ފެއްޓެވި މަންޒަރެވެ. ގައުމިއްޔަތާއި އިސްލާމީ ވަހުދަތުގެ ނަމުގައި ރައްޔިތުންގެ އިތުބާރު ހޯއްދެވުމަށް ކުރެއްވި މަސައްކަތްތަކާއެކު، އެމަނިކުފާނުގެ އަރިސް ބޭފުޅުން ގެންދަވަނީ ރައީސްގެ ކޮންމެ ބަހަކީ ހަގީގަތެއްގެ ގޮތުގައި ދެއްކުމަށް ކެނޑިނޭޅި މަސައްކަތް ކުރަމުންނެވެ.

ވެރިކަމުގެ ބާރުތައް މުށުތެރެއަށް ލެއްވުމަށް ރައީސް މުއިއްޒު ކުރައްވާ މަސައްކަތްތަކުގެ ތެރެއިން، ރައްޔިތުންގެ މަޖިލީހާއި ކޯޓުތަކުގެ ކޮންޓްރޯލް ހޯއްދެވުމަށްފަހު، މިހާރު މިވަނީ ނޫސްވެރިކަމުގެ މިނިވަންކަމަށްވެސް ހުރަސްތަކެއް ކުރިމަތިވެފަ އެވެ. ގާނޫނުތަކަށް ގެންނަ ބަދަލުތަކުގެ ސަބަބުން، ހިޔާލުފާޅުކުރުމާއި ސުވާލުކުރުމުގެ ފުރުސަތު ހަނިވެ، ބިރުވެރިކަމެއްގެ ތެރެއަށް ގައުމު ވެއްޓެމުންދާކަމުގެ އިހުސާސް ރައްޔިތުންނަށް ކުރެވެން ފަށައިފި އެވެ. ދިވެހީން މިއަދު މިއުޅޭ "ދިވެހީންގެ ރާއްޖެ" އަކީ ލިޔެލާ ހަބަރަކުން، ނޫނީ ކޮށްލާ ސުވާލަކުން ވެރިމީހާ ބޭނުންވިއްޔާ، އެމީހަކު ހުރަގެއަށް ލެވިދާނެ ފަދަ ބިރުވެރި ރާއްޖެ އެކެވެ.

އާއްމު ރައްޔިތުންގެ ހާލު މިހެން ހުރި އިރު، މި ސަރުކާރުގެ ވަޒީރުންނާ ވެރިކަންކުރާ ޕީއެންސީ ގެ މަޖްލިސް މެމްބަރުން އަދިވެސް ބުނަމުން ދަނީ ތިމަންމެން އަދިވެސް ގަދަކޮށް މިތިބީ ރައީސް މުއިއްޒު އާއެކު އެމަނިކުފާނު ހިންގެވި މަގަކުން ހިންގަވަން ތައްޔާރަށް ކަމަށެވެ. ނަމަވެސް މިސަރުކާރު ވެރިކަމާ ހަވާލުވިފަހުން ރައްޔިތުންގެ ލާބައާ މަންފާ އަށް ކުރެވުނު އެއްވެސް ކަމެއް ނެތްކަމުގެ އަޑުތައް ވަނީ ގަދަވާން ފަށާފަ އެވެ. ވެރިކަމަށް ތިން އަހަރު ފުރެން ކައިރިވާއިރު، ވައުދުތައް ނުފުއްދޭތާނގައި، ކުރިން ލިބެމުންދިޔަ އަސާސީ ހިދުމަތްތަކުގެ ފެންވަރު ވެސް ވަނީ ދަށްވެފަ އެވެ. ތަރައްގީގެ ގިން މަޝްރޫއުތަކެއް ހުއްޓިފައި ހުރުމަކީ ރައްޔިތުންގެ މާޔޫސްކަން އިތުރުވަމުންދާ މައިގަނޑު އަނެއް ސަބަބެވެ.

ކަންކަން މިހެން ހުރި އިރު، ރައީސް މުއިއްޒު އަކީ ވެރިކަމަށް ކުފޫހަމަނުވާ ބޭފުޅެއް ކަން އެމަނިކުފާނުގެ ޕާޓީގެ އިސްފަރާތްތަކުން ވެސް ދިޔައީ ހިތާ ހިތާ ކިޔާލަމުންނެވެ. އެފަރާތްތަކަށް މިކަމުގަ ލިބުނު އެންމެ ބޮޑު ހިތްހަމަޖެހުމަކީ، ދައުރުގެ މެދުތެރެއިން ނެގި ފެންނަ ނުފެންނަ ވޯޓުން ރައްޔިތުންގެ 70 އިންސައްތަ ރައީސް މުއިއްޒު އަށް ނޫނެކޭ ބުނުމެވެ. މިކަމުގެ ސަބަބުން ޕާޓީގެ އެތެރޭގައި ރައީސްއާ ދެކޮޅު ރޫހެއް އުފެދި، ވެރިކަމުން ދުރުކުރުމުގެ މަޝްވަރާތައް ވަނީ ފެށިފަ އެވެ.

ވާން އުޅޭ ގޮތް ކޮންމެވެސް ވަރަކަށް ރައީސް މުއިއްޒު އަށް ފަހުމުވާން ފެށުމުން ދެން ފެނުނީ ކުއްލި އަކަށް، ރައީސް މުއިއްޒުގެ ލަފާފުޅާ އިރުދުގެ ދަށުން ނޫނީ ފިޔަވަޅެއްވެސް ނާޅާ ކެބިނެޓު މުޅިން އެފުށްމިފުށަށް ޖަހާލި މަންޒަރެވެ. އަރިސް ބޭފުޅުންނަށް އޮތް އިތުބާރު ކުޑަވެ، ސިޔާސީ ގޮތުން އިސްކޮށް ތިއްބެވި ބޭފުޅުންގެ މަގާމުތަކަށް ބޮޑެތި ބަދަލުތަކެއް ވަނީ ގެންނަވާފަ އެވެ.

އޭގެ ފަހުން ދެން ފެނިގެން ދިޔައީ ރައީސް މުއިއްޒުގެ އެއްމެ އަރިސް ބޭފުޅާގެ ގޮތުގަ ފެނުނު "ފަސްޓް ކަޒިން" މަޖިލީހުގެ ނައިބް ރައީސް އަހުމަދު ނާޒިމް "ކަތިލުމުގެ" މަސައްކަތް ކުއްލި ގޮތަކަށް ފެށި މަންޒަރެވެ. އަދި ޒަމާންތަކަކަށް ފަހު ބެންޗު ޓީމުގަ ހުންނެވި މަޖިލީހުގެ ރައީސް އަދުރޭ، ކުއްލިއަކަށް ކެޕްޓަން ބޭންޑް އަޅައިގެން ފުރަތަމަ 11 ގަ ކުޅެންފެށި މަންޒަރެވެ. 

ރައްޔިތުންގެ ތާއީދު ގެއްލި ރައީސް މުއިއްޒުގެ ސަރުކާރު ދުވަހެއް ދުވަހަކަށް ބަލިކަށިވެގެން ދާއިރު ވެސް ޕީއެންސީ ގެ އިސްވެރިން ވިދާޅުވަނީ ފިތުނަ ފަސާދަ އުފައްދައިގެން ޕީއެންސީ ބައިބައި ނުކުރެވޭނެ ކަމަށާއި، މިތިބީ ރައީސް ޑރ. މުއިއްޒު އާއެކު ސާބިތުވެ ކަމަށެވެ. ނަމަވެސް އެބޭފުޅުން އެހެން ވިދާޅުވުމަކީ ރައީސް މުއިއްޒު އަށް ސީދާ ގޮތުން ކުރައްވާ މަލާމާތެއް ކަމަށް ގިނަބަޔަކު ދަނީ ބުނަމުންނެވެ. އޭރު ރައީސް ޔާމިން އަށް އެެއްކޮޅުން ސަނާ ކިޔަމުން، އަނެއް ކޮޅުން އެމަނިކުފާނުގެ ސިޔާސީ ހަޔާތް ކަަފުން ކުރުމުގެ މަސައްކަތް އެ ޕާޓީ ތެރެއިން ކުރި ގޮތަށް، މިއަދު ރައީސް މުއިއްޒު އަށް ސަނާކިޔަމުން، ސިއްރިއްޔާތުގަ ޕީއެންސީ ގެ ބަޔަކު ރައީސް މުއިއްޒު ވެރިކަމުން ދުރުކުރުމުގެ މަސައްކަތް ފަށާފަވާކަމުގެ އަޑުތައް މިހާރު ވަނީ ގަދަވެފަ އެވެ. 

ރައްޔިތުންގެ ތާއީދު ގެއްލުމާއި، ޕާޓީގެ އެތެރޭގެ ކޯޅުންތަކުގެ ސަބަބުން ސަރުކާރުގެ ހިންގުން ވަނީ މަޑުޖެހިފަ އެވެ. ސަރުކާރުގެ އިސްވެރިން ކިތަންމެ ވަރަކަށް "ގަދަކޮށް" ތިބިކަމަށް ދެއްކި ނަމަވެސް، ހަގީގީ މަންޒަރު ފެންނަނީ މުޅިން ތަފާތުކޮށް، ނުތަނަވަސްކަމުގެ ތެރެއިންނެވެ.