އީރާން އިން ރައްކާ ކޮށްފައިވާ ޔުރޭނިއަމް ޤައުމުން ބޭރަށް ނުފޮނުވުމަށް ރޫހީ ލީޑަރު އަމުރު ކުރައްވައިފި

އީރާން އިން އުފައްދާފައިވާ ޔުރޭނިއަމް، އެ ޤައުމުން ބޭރަށް ނުފޮނުވުމަށް އެ ޤައުމުގެ ރޫހީ ލީޑަރު މުޖުތަބާ ޚާމަނާއީ އަމުރު ކުރައްވައިފި އެވެ.

އީރާންގެ ސަރުކާރުގެ އިސް ދެ މަސްދަރުން މިކަން ކަށަވަރު ކޮށްދީފައިވާއިރު، މިއީ ސުލްޙައިގެ މަޝްވަރާ ތަކުގައި އެމެރިކާ އިން ހުށަހަޅާފައިވާ އެންމެ މުހިންމު އެއް ޝަރުތާ ދެކޮޅަށް އީރާން އިން ނިންމި ހަރުކަށި ނިންމުމެކެވެ. 

އީރާންގެ ރޫހީ ލީޑަރު މުޖުތަބާ ޚާމަނާއީގެ މި ނިންމުމުގެ ސަބަބުން އެމެރިކާގެ ރައީސް ޑޮނަލްޑް ޓްރަމްޕް އަށް އިތުރު ގޮންޖެހުން ތަކެއް ކުރިމަތިވެ، އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމަ ހުއްޓާލުމަށް ކުރެވޭ މަޝްވަރާ ތަކަށް ބޮޑެތި ހުރަސް ތަކެއް އެޅޭނެ ކަމަށް ބެލެވެ އެވެ. 

އިޒްރޭލްގެ އޮފިޝަލުން ރޮއިޓާސް އަށް މައުލޫމާތު ދެމުން ބުނެފައިވާ ގޮތުގައި، ނިއުކްލިއާ ހަތިޔާރު އުފެއްދުމަށް ބޭނުންވާ މަތީ ދަރަޖައިގެ ޔުރޭނިއަމް އީރާން އިން ބޭރަށް ފޮނުވާލުމަކީ ސުލްޙައިގެ ކޮންމެ އެއްބަސްވުމެއްގައި ހިމަނަން ޖެހޭނެ ކަމެއް ކަމަށް ޓްރަމްޕް ވަނީ އިޒްރޭލް އަށް ޔަޤީންކަން ދެއްވައިފަ އެވެ. 

އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެފަިއ ވަނީ، އީރާން އިން ޔުރޭނިއަމް ބޭރުކޮށް، އެ ޤައުމުން ވާގިވެރިވާ ހަނގުރާމަވެރި ޖަމާއަތް ތަކަށް ދޭ އެހީތެރިކަން ހުއްޓާލައި، ބެލިސްޓިކް މިސައިލް އުފެއްދުމުގެ ޤާބިލުކަން ނައްތާލުނީސް ހަނގުރާމަ ނިމުނު ކަމަށް ޤަބޫލު ނުކުރައްވާނެ ކަމަށެވެ. 

ނަމަވެސް އީރާންގެ މަސްދަރު ތަކުން ބުނާ ގޮތުގައި، ޔުރޭނިއަމްގެ ރައްކާ އެ ޤައުމުން ބޭރު ނުކުރުމަކީ އެ ޤައުމުގެ އެންމެ މަތީ ވެރިޔާގެ އިތުރުން، މުޅި ދައުލަތުގެ އިސްވެރިންގެ މެދުގައި އޮތް އިއްތިފާގެކެވެ. 

މި މައްސަލައިގެ ނާޒުކު ކަމުން ނަން ހާމަ ނުކުރުމަށް އެދި މައުލޫމާތު ދިން އީރާންގެ އޮފިޝަލަކު ބުނީ، ޔުރޭނިއަން ޤައުމުން ބޭރަށް ފޮނުވާލައިފި ނަމަ ކުރި މަގުގައި އެމެރިކާ އާއި އިޒްރޭލް އިން ދީފާނެ ހަމަލާ ތަކުން ދިފާއުވުމަށް އީރާން އަށް އޮތް ބާރު ކުޑަ ވެގެންދާނެ ކަމަށް އެ ޤައުމުގެ އިސްވެރިން ޤަބޫލު ކުރައްވާ ކަމަށެވެ. އީރާންގެ ދައުލަތުގެ އެންމެ މުހިންމު ކަންކަމުގައި އެންމެ ފަހުގެ ނިންމުން ނިންމަވާ ފަރާތަކީ ރޫހީ ލީޑަރު ޚާމަނާއީ އެވެ. 

މި ރިޕޯޓުތަކާ ގުޅިގެން އެމެރިކާގެ ރިޔާސީ ގަނޑުވަރު، ވައިޓް ހައުސް އިންނާއި، ސްޓޭޓް ޑިޕާޓްމަންޓް އިން މިހާތަނަށް އެއްޗެސް ބުނެފައި ނުވެ އެވެ. އީރާންގެ މި ނިންމުމާ އެކު، މެދު އިރުމަތީގެ މަސްރަހު އިތުރަށް ނުތަނަވަސްވެ، ސުލްޙައިގެ މަޝްވަރާ ތަކުގެ މުސްތަޤުބަލާ މެދު ވަނީ ސުވާލު އުފެދިފަ އެވެ.