އީރާންގެ މަޝްވަރާތައް އެންމެ ފަހުގެ މަރުޙަލާ އަށް ގޮސްފި: ޓްރަމްޕް

އެމެރިކާ އާއި އީރާންއާ ދެމެދު ކުރިއަށް ގެންދާ މަޝްވަރާތައް އެންމެ ފަހުގެ މަރުހަލާ އަށް ގޮސްފައިވާ ކަަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ހަނގުރާމަ މެދު ކަނޑާލުމުގެ އެއްބަސްވުން ޤާއިމު ކުރި ފަހުން ވެސް، އިތުރު ކުރިއެރުން ތަކެއް ލިބިފައި ނުވެ އެވެ. މި ހަފުތާގެ ތެރޭގައި ޓްރަމްޕް ވިދާޅުވީ، އީރާން އަށް ހަމަލާ ދިނުމަށް ނިންމުމަށް ފަހު ވެސް، ގަލްފުގެ ޤައުމު ތަކުގެ ވެރިން އެދިވަޑައިގެންނެވުމުން އެ ހަމަލާ ދިނުން ފަސް ކުރެއްވި ކަމަށެވެ. 

ޓްރަމްޕް ވިދާޅުވީ އީރާންގެ މައްސަލައިގައި މިހާރު އޮތީ އެންމެ ފަހުގެ މަރުހަލާ އަށް އާދެވިފައި ކަމަށާއި، ކަންތައް ވާ ގޮތް ބަލަން ޖެހޭ ކަމަށެވެ. ޓްރަމްޕް ވިދާޅުވީ އެއް ގޮތަކީ އެއްބަސްވުމަކަށް އައުން ކަމަށެވެ. ނުވަތަ ނުރައްކާތެރި ކަންތައްތަކެއް ހިނގުން ކަމަށެވެ. ނަމަވެސް، އޭނާ އުންމީދު ކުރައްވަނީ ނުރައްކާތެރި ކަންތައްތަކެއް ނުވުން ކަމަށް ޓްރަމްޕް ވިދާޅުވި އެވެ. 

ނަމަވެސް ޓްރަމްޕް ވަނީ، އީރާންއާ ދެކޮޅަށް ހަމަލާ ދޭން ޖެހިއްޖެ ހާލަތެއްގައި އެކަން ވެސް ކުރައްވާނެ ކަމަށް ވިދާޅުވެފަ އެވެ. އަދި އެމެރިކާގެ އަސްކަރިއްޔާ އަށް އަންގަވާފައި ވަނީ، އީރާންއާ ދެކޮޅަށް ބާރު ގަދަ ހަމަލާ ތަކެއް ދޭން ޖެހި ދާނެ ކަމަށެވެ. މި ވާހަކަ ތަކުގެ ސަބަބުން ސަރަހައްދުގައި ނުތަނަވަސްކަން އިތުރުވެފައިވެ އެވެ.

އީރާންގެ ފަރާތުން މަޝްވަރާ ތަކުގައި އިސްކޮށް އުޅުއްވާ، އަދި އެ ޤައުމުގެ ޤާނޫނު ހަދާ މަޖިލީހުގެ ރައީސް މުހައްމަދު ބާގިރު ގަލިބާފް ސޯޝަލް މީޑިއާގައި ނެރުއްވި އޯޑިއޯ މެސެޖެއްގައި ވިދާޅުވީ "ފާޅުގަ އާއި ފޮރުވިގެން ތިބެ ދުޝްމިނުން ހިންގާ ހަރަކާތް ތަކުން" އެމެރިކާ އިން އައު ހަމަލާ ތަކަކަށް ތައްޔާރުވަމުން އަންނަ ކަމަށް ފެންނަ ކަމަށެެވެ.