ކޭންގެ ހެޓްރިކާ އެކު މޮޅުވެ، ބަޔާން އިން ޖަރުމަނު ކަޕް ކާމިޔާބު ކޮށްފި

ޖަރުމަނު ކަޕްގެ ފައިނަލްގައި ސްޓަޓްގާޓްއާ ދެކޮޅަށް ކުޅުނު މެޗުން މޮޅުވެ، ބަޔާން މިއުނިކް އިން މުބާރާތުގެ ޗެމްޕިއަންކަން ހޯދައިފި އެވެ.

ހޮނިހިރު ދުވަހުގެ ރޭ ކުޅުނު ފައިނަލް މެޗު ބަޔާން އިން ކާމިޔާބު ކުރީ 3-0 އިންނެވެ. މެޗުގައި ބަޔާން އިން އެ ޓީމުގެ ތިން ލަނޑު ވެސް ޖެހީ މެޗުގެ ދެ ވަނަ ހާފުގަ އެވެ. ބަޔާން އިން ރަނގަޅަށް ކުޅުނު މެޗުގައި، އެ ޓީމަށް ވަނީ ފުރަތަމަ ހާފުގައި ވެސް ލަނޑު ޖަހަން ފުރުސަތު ލިބިފަ އެވެ.

މެޗުގެ ދެ ވަނަ ހާފު ފަށައިގެން 10 ވަނަ މިނެޓުގައި ބަޔާން އަށް ލީޑު ނަގައިދިނީ އިންގްލެންޑުގެ ކެޕްޓަން ހެރީ ކޭން އެވެ. އެއީ މައިކަލް އޮލައިސޭ ތަނަވަސްކޮށްދިން ފުރުސަތެއްގައި ކޭން ޖެހި ލަނޑެކެވެ. އޭގެ ފަހުން މެޗުގެ 80 ވަނަ މިނެޓުގައި ކޭން ވަނީ ބަޔާންގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު ޖަހަން ކޭން އަށް ފުރުސަތު ތަނަވަސްކޮށްދިނީ ލުއިސް ޑިއާޒް އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ބަޔާން އަށް ލިބުނު ޕެނަލްޓީ ކާމިޔާބުކޮށް ކޭން ވަނީ މެޗުގައި އޭނާގެ ހެޓްރިކް ހަމަ ކޮށްފަ އެވެ.

މޮޅާ އެކު ބަޔާން އިން ވަނީ ހަ އަހަރު ފަހުން ޖަރުމަނު ކަޕްގެ ތަށި އުފުލާލައިފަ އެވެ. އެންމެ ފަހުން އެ ޓީމުން ޖަރުމަނު ކަޕް ކާމިޔާބު ކޮށްފައި ވަނީ 2019/2020 ވަނަ ސީޒަންގަ އެވެ. އަނެއްކޮޅުން މިއީ ބަޔާން އިން ޖަރުމަނު ކަޕް ކާމިޔާބު ކުރި 21 ވަނަ ފަހަރު ކަމަށްވާއިރު، އެ ޓީމަކީ އެންމެ ގިނައިން މުބާރާތް ކާމިޔާބު ކޮށްފައިވާ ޓީމެވެ.  

މި ސީޒަންގައި ބަޔާން އިން ވަނީ ޖަރުމަނު ލީގުގެ އިތުރުން ޖަރުމަނު ކަޕް ކާމިޔާބު ކޮށްފަ އެވެ.