އެޓަލަންޓާ ބަލިކޮށް، ބަޔާން އިން ކުއާޓާ ފައިނަަލްގެ ފުރުސަތު ބޮޑު ކޮށްފި

ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ފުރަތަމަ ލެގުގައި އެޓަލަންޓާއާ ދެކޮޅަށް ކުޅުނު މެޗުން މޮޅުވެ، ބަޔާން މިއުނިކް އިން މުބާރާތުގެ ކުއާޓާ ފައިނަލްގެ ފުރުސަތު ބޮޑު ކޮށްފި އެވެ.

އެޓަލަންޓާގެ އަމިއްލަ ދަނޑުގައި އަންގާރަ ދުވަހުގެ ރޭ ދަންވަރު ކުޅުނު މެޗު ބަޔާން އިން ކާމިޔާބު ކުރީ 6-1 އިންނެވެ. މެޗުގެ ފުރަތަމަ ހާފުގައި ބަޔާން އިން ތިން ލަނޑު ޖެހިއިރު، އަނެއް ތިން ލަނޑު ޖެހީ ދެ ވަނަ ހާފުގަ އެވެ. އެޓަލަންޓާ އިން އެ ޓީމުގެ ހަމައެކަނި ލަނޑު ޖެހީ ވެސް ދެ ވަނަ ހާފުގަ އެވެ.

މެޗު ފަށައިގެން 12 ވަނަ މިނެޓުގައި ބަޔާން އަށް ލީޑު ނަގައިދިނީ ޖޮސިޕް ސްޓަނިސިޗް އެވެ. އޭގެ ފަހުން މެޗުގެ 22 ވަނަ މިނެޓުގައި މައިކަލް އޮލައިސޭ ވަނީ ބަޔާންގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އޭގެ ތިން މިނެޓު ފަހުން ބަޔާންގެ ތިން ވަނަ ލަނޑު ޖެހީ ސާޖް ގްނަބްރީ އެވެ.

މެޗުގެ ދެ ވަނަ ހާފު ފަށައިގެން ހަތް ވަނަ މިނެޓުގައި ބަޔާންގެ ހަތަރު ވަނަ ލަނޑު ޖެހީ ނިކޮލަސް ޖެކްސަން އެވެ. އޭގެ ފަހުން މެޗުގެ 64 ވަނަ މިނެޓުގައި އޮލައިސޭ ބަޔާންގެ ފަސް ވަނަ ލަނޑު ޖެހިއިރު، ބަޔާންގެ ހަ ވަނަ ލަނޑު ޖެހީ ޖަމާލް މުސިއާލާ އެވެ. މެޗުގައި އެޓަލަންޓާގެ ހަަމައެކަނި ލަނޑު ޖެހީ މާރިއޯ ޕަސަލިޗް އެވެ.

އެޓަލަންޓާގެ އަމިއްލަ ދަނޑުގައި ކުޅުނު ފުރަތަމަ ލެގުގައި ބޮޑު ތަފާތަކުން ބަޔާން މޮޅުވެފައިވާއިރު، ދެ ވަނަ ލެގު އޮތީ ބަޔާންގެ އަމިއްލަ ދަނޑުގަ އެވެ. އެއާ އެކު ބަޔާން އިން މި ވަނީ މުބާރާތުގެ ކުއާޓާ ފައިނަލްގެ ފުރުސަތު ބޮޑު ކޮށްފަ އެވެ.