ޔޫނިއަން ބާލިން ބަލިކޮށް، ބަޔާން އިން ނުވަ ޕޮއިންޓުގެ ލީޑު ހިފަހައްޓައިފި

ޖަރުމަނު ލީގުގައި ޔޫނިއަން ބާލިންއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބަޔާން މިއުނިކް އިން އެއް ވަނައިގައި ނުވަ ޕޮއިންޓުގެ ލީޑު ހިފަހައްޓައިފި އެވެ.

ބަޔާންގެ އަމިއްލަ ދަަނޑުގައި ހޮނިހިރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި ބަޔާން އިން ދެ ލަނޑު ޖެހިއިރު، އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 43 ވަނަ މިނެޓުގައި ބަޔާން އަށް ލީޑު ނަގައިދިނީ މައިކަލް އޮލައިސޭ އެވެ. އެއީ ލިއޯ ގޮރެޓްޒްކާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން ފުރަތަމަ ހާފުގެ އިތުރު ވަގުތުގައި ބަޔާންގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ސާޖް ގްނަބްރީ އެވެ. 

މެޗުގެ ދެ ވަނަ ހާފު ފަށައިގެން ހަތަރު ވަނަ މިނެޓުގައި އިންގްލެންޑުގެ ކެޕްޓަން ހެރީ ކޭން ވަނީ ބަޔާންގެ ތިން ވަނަ ލަނޑު ޖަހައިފަ އެވެ. މިއީ ބަޔާންގައި މޮޅު ކުޅުމެއް ދައްކަމުން އަންނަ ކޭން މި ސީޒަންގައި ޖެހި 54 ވަނަ ލަނޑެވެ. މެޗުގެ 67 ވަނަ މިނެޓުގައި ގްނަބްރީ ވަނީ ބަޔާންގެ ހަތަރު ވަނަ ލަނޑު ޖަަހައިފަ އެވެ.

މޮޅާ އެކު ބަޔާން އެއް ވަނައިގައި އޮތީ މިހާތަނަށް ކުޅެފައިވާ 27 މެޗުން 70 ޕޮއިންޓާ އެކު އެވެ.