އެންމެ ފޯމުގައި އޮތީ ބަޔާން، ބަޔާން ބަލި ކުރެވޭނެ ޓީމަކަށް އޮތީ ރެއާލް: އެމްބާޕޭ
ޖަރުމަނު ލީގުގައި އެ ޓީމުން އެކަން ސާބިތު ކޮށްދެމުން އަންނައިރު، އެ ޓީމުގެ ކުޅުމުން ވެސް އެކަން ފާހަގަވާން އޮތް ކަމަށް އެމްބާޕޭ ބުނި. ނަމަވެސް، މިވަގުތު ބަޔާން ބަލި ކުރެވޭނެ ޓީމެއް އޮތް ނަމަ، އެ ޓީމަކީ ހަމައެކަނި ރެއާލް ކަމަށް ވެސް އެމްބާޕޭ ބުނެފައިވޭ.
ރެއާލް އަށް ކުޅެމުން އަންނަ ފްރާންސްގެ ކެޕްޓަން އެމްބާޕޭ | ރޮއިޓާސް
މިވަގުތު ޔޫރަޕުގައި އެންމެ ފޯމުގައި އޮތް ޓީމަކީ ޖަރުމަނުގެ ބަޔާން މިއުނިކް ކަމަށާއި، ނަމަވެސް ބަޔާން ބަލި ކުރެވޭނެ ޓީމަކަށް އޮތީ ރެއާލް މެޑްރިޑް ކަމަށް، ރެއާލް އަށް ކުޅެމުން އަންނަ ފްރާންސްގެ ކެޕްޓަން ކީލިއަން އެމްބާޕޭ ބުނެފި އެވެ.
މިފަހަރުގެ ޔުއެފާ ޗެމްޕިއަންސް ލީގުގެ ކުއާޓާ ފައިނަލްގައި ރެއާލް ވާދަ ކުރަން ޖެހިފައި ވަނީ ބަޔާންއާ އެވެ. މި ދެ ޓީމު ބައްދަލު ކުރާ ފުރަތަމަ ލެގު އޮތީ އޭޕްރީލް މަހުގެ އަށް ވަނަ ދުވަހު ރެއާލްގެ އަމިއްލަ ދަނޑުގަ އެވެ. އޭގެ ފަހުން ބަޔާންގެ އަމިއްލަ ދަނޑުގައި ކުޅޭ ދެ ވަނަ ލެގު އޮތީ އޭޕްރީލް މަހުގެ 16 ވަނަ ދުވަހު އެވެ.
އެ މެޗާ ގުޅޭ ގޮތުން ސުވާލު ކުރުމުން އެމްބާޕޭ ބުނެފައި ވަނީ، މިވަގުތު ޔޫރަޕުގައި އެންމެ ފޯމުގައި އޮތް ޓީމަކީ ބަޔާން ކަމަށެވެ. ޖަރުމަނު ލީގުގައި އެ ޓީމުން އެކަން ސާބިތު ކޮށްދެމުން އަންނައިރު، އެ ޓީމުގެ ކުޅުމުން ވެސް އެކަން ފާހަގަވާން އޮތް ކަމަށް އެމްބާޕޭ ބުންޏެވެ. ނަމަވެސް، މިވަގުތު ބަޔާން ބަލި ކުރެވޭނެ ޓީމެއް އޮތް ނަމަ، އެ ޓީމަކީ ހަމައެކަނި ރެއާލް ކަމަށް ވެސް އެމްބާޕޭ ބުނެފައިވެ އެވެ.
މީގެ އިތުރުން އެމްބާޕޭ ބުނީ ރެއާލް އާއެކު ކާމިޔާބީ ހޯދަން އޭނާ ބޭނުންވާ ކަމަށެވެ. އޭނާގެ ފޯކަސް އޮތީ ހަމައެކަނި ޖޫން މަހު ފަށާ ފީފާ ވޯލްޑް ކަޕަށް ނޫން ކަމަށް ވެސް އެމްބާޕޭ ބުންޏެވެ. އެގޮތުން އޭނާ ބުނީ ރެއާލް އަަށް އަދިވެސް ސްޕެނިޝް ލީގާއި، ޔުއެފާ ޗެމްޕިއަންސް ލީގު ކާމިޔާބު ކުރުމުގެ ފުރުސަތު އޮތް ކަމަށެވެ. އެމްބާޕޭ ބުނީ ޗެމްޕިއަންސް ލީގުގައި ބަޔާންއާ ދެކޮޅަށް ނިކުންނައިރު، އެ ޓީމަކީ ވަރަށް ވަރުގަދަ ޓީމެއް ކަމަށެވެ.
މީގެ ކުރިން ވެސް ރެއާލް އާއި ބަޔާން ވަނީ ވާދަކޮށްފަ އެވެ. ޗެމްޕިއަންސް ލީގުގެ ސެމީ ފައިނަލްގައި މީގެ ކުރިން މި ދެ ޓީމު ބައްދަލު ކުރިއިރު، ކުރި ހޯދީ ރެއާލް އެވެ. ބަޔާން އަމިއްލަ ދަނޑުގައި ކުޅުނު ލެގު އެއްވަރުވީއިރު، ރެއާލްގެ ދަނޑުގައި ކުޅުނު ލެގު އެ ޓީމުން ވަނީ ކާމިޔާބު ކޮށްފަ އެވެ.
