އުނދަގޫ މޮޅާ އެކު، ބަޔާން އިން އަށް ޕޮއިންޓަށް ލީޑު ފުޅާ ކޮށްފި

ޖަރުމަނު ލީގުގައި އައިންޓްރަކްޓް ފްރޭންކްފާޓްއާ ދެކޮޅަށް ކުޅުނު މެޗުން ހޯދި އުނދަގޫ މޮޅާ އެކު، އެންމެ ފަހުގެ ޗެމްޕިއަން ބަޔާން މިއުނިކް އިން އެއް ވަަނައިގައި އަށް ޕޮއިންޓުގެ ލީޑެއް ނަގައިފި އެވެ. 

ބަޔާންގެ އަމިއްްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 3-2 އިންނެވެ. މެޗުގެ ފުރަތަމަ ހާފުގައި ބަޔާން އިން ދެ ލަނޑު ޖެހިއިރު، އަނެއް ލަނޑު ޖެހީ ދެ ވަނަ ހާފުގަ އެވެ. އޭގެ ފަހުން ފްރޭންކްފާޓް އިން ވަނީ ދެ ލަނޑު ޖަހައިފަ އެވެ.

މެޗު ފަށައިގެން 16 ވަނަ މިނެޓުގައި ބަޔާން އަށް ލީޑު ނަގައިދިނީ  އަލެކްސަންޑާ ޕަވްލޮވިޗް އެވެ. އޭގެ ހަތަރު މިނެޓު ފަހުން އިންގްލެންޑުގެ ކެޕްޓަން ހެރީ ކޭން ވަނީ ބަޔާންގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. މެޗުގެ ދެ ވަނަ ހާފުގެ 68 ވަނަ މިނެޓުގައި ބަޔާންގެ ތިން ވަނަ ލަނޑު ވެސް ޖެހީ ކޭން އެވެ.

އޭގެ ފަހުން މެޗުގެ 77 ވަނަ މިނެޓުގައި ފްރޭންކްފާޓް އަށް ލިބުނު ޕެނަލްޓީ ކާމިޔާބުކޮށް، އެ ޓީމުގެ ފުރަތަމަ ލަނޑު ޖެހީ ޖޮނަތަން ބުރްކާޑް އެވެ. އޭގެ ފަހުން މެޗުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް، ފްރޭންކްފާޓްގެ ދެ ވަނަ ލަނޑު ޖަހައި ފަރަގު ކުޑަ ކުރީ އާނޯ ކަލިމުއެންޑޯ އެވެ. އިތުރު ލަނޑެއް ޖަހައި ނަތީޖާ ހަމަހަމަ ކުރުމަށް އެ ޓީމުން ކުރި މަސައްކަތް ކާމިޔާބެއް ނުވި އެވެ.

މޮޅާއެކު ބަޔާން އެއް ވަނައިގައި އޮތީ މިހާތަނަށް ލީގުގައި ކުޅެފައިވާ 23 މެޗުން 60 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަަނައިގައި ބޮރޫޝިއާ ޑޯޓްމަންޑް އަށް ލިބެނީ 52 ޕޮއިންޓެވެ.