ރަފީނިއާ އަށް އޭނާގެ މުސްތަޤުބަލު ފެންނަނީ ބާސެލޯނާގައި

އޭނާ އަށް ފެންނަނީ މުސްތަޤުބަލުގައި ގިނަ ދުވަސް ތަކެއް ވަންދެން ބާސެލޯނާގައި ހުރެވޭ މަންޒަރު ކަމަށް ބުނެ، އެހެން ކުލަބަކަށް ބަދަލުވުމުގެ ޝައުޤުވެރިކަން ނެތް ކަަމަށް ރަފީނިއާ ބުނެފި އެވެ.

ލީޑްސް ޔުނައިޓެޑު ދޫކޮށްލުމަށް ފަހު ރަފީނިއާ ބާސެލޯނާ އަށް ބަދަލުވީ 2022 ވަނަ އަހަރު އެވެ. އެންމެ ފަހުން، 2025 ވަނަ އަހަރު އޭނާ ވަނީ ބާސެލޯނާގެ އެއްބަސްވުން އައު ކޮށްފަ އެވެ. އެ އެއްބަސްވުމުގެ މުއްދަތު ހަމަވާނީ 2028 ވަނަ އަހަރުގެ ޖޫން މަހުގެ ނިޔަލަށެވެ. ބާސެލޯނާގައި ރަފީނިއާ މޮޅު ކުޅުމެއް ދައްކަމުން އަންނައިރު، ބައެއް ކުލަބު ތަކުން އޭނާ ހޯދަން ޝައުޤުވެރިވާ ކަމަށް ރިޕޯޓުތައް ބުނެ އެވެ.

އެގޮތުން ސައުދީ ޕްރޯ ލީގުގެ ބައެއް ކުލަބު ތަކުން ރަފީނިއާ އަށް ފާރަލަމުން އަންނަ ކަމަށް ވަނީ ރިޕޯޓު ކޮށްފަ އެވެ. އެކަމާ ގުޅޭ ގޮތުން ވާހަކަ ދައްކަމުން ރަފީނިއާ ބުނެފައި ވަނީ، އޭނާ އަށް މުސްތަޤުބަލު ފެންނަނީ ބާސެލޯނާގައި ކަމަށެވެ. އެގޮތުން އެތައް އަހަރެއް ވަންދެން އޭނާ ބާސެލޯނާގައި ހުރެވޭ މަންޒަރު ފެންނަ ކަމަށް ރަފީނިއާ ވަނީ ބުނެފަ އެވެ. 

މީގެ އިތުރުން ރަފީނިއާ ބުނީ، ބާސެލޯނާ އާއެކު އޭނާ ސޮއި ކޮށްފައިވާ އެއްބަސްވުމެއް އޮތް ކަމަށާއި، އެ އެއްބަސްވުމުގެ މުއްދަތު ހަމަވާނީ 2028 ވަނަ އަހަރު ކަމަށެވެ. އެހެން ނަމަވެސް، ބާސެލޯނާ އިން އެއްބަސްވުން އައު ކުރުމާ ގުޅޭ ގޮތުން އޭނާއާ ވާހަކަ ދައްކަން ބޭނުންވާ ނަމަ، އެކަމަށް ފުރިހަމަ އަށް ތައްޔާރަށް ހުރި ކަމަށް ވެސް ރަފީނިއާ ބުންޏެވެ. ރަފީނިއާ ބުނީ، ބާސެލޯނާ އާއެކު ގިނަ ކާމިޔާބީ ތަކެއް ހޯދުމަކީ އޭނާގެ އެންމެ ބޮޑު އަމާޒު ކަމަށެވެ.

ރަފީނިއާ އަކީ މިވަގުތު ބާސެލޯނާގައި ތިބި ކުޅުންތެރިންގެ ތެރެއިން، އެންމެ މުހިންމު އެއް ކުޅުންތެރިޔާ އެވެ. އަދި ބާސެލޯނާގެ ކޯޗު ހަންސީ ފްލިކް އިސްކަން ދެމުން އަންނަ ކުޅުންތެރިންގެ ތެރޭގައި ވެސް ރަފީނިއާ ހިމެނެ އެވެ. ރަފީނިއާ ވަނީ މިހާތަނަށް ބާސެލޯނާ އަށް ކުޅެދިން 176 މެޗުގައި 73 ލަނޑު ޖަހައިފަ އެވެ. ބާސެލޯނާ އާއެކު އޭނާ ވަނީ މިހާތަނަށް ހަތް ތައްްޓެއް ވެސް ކާމިޔާބު ކޮށްފަ އެވެ.