ބާސެލޯނާގެ އެއްބަސްވުން އައު ކުރާނެ ކަމަށް ފްލިކް އަންގައިފި
މީޑިއާ ތަކުގައި ބުނެފައިވާ ގޮތުން، ބާސެލޯނާ އިން ފްލިކް އަށް ހުށަހަޅާފައި ވަނީ ދެ އަހަރު ދުވަހަށް އެއްބަސްވުން އައު ކުރުމަށް. އެހެންކަމުން އެ އެއްބަސްވުމުގެ މުއްދަތު ހަމަވާނީ 2029 ވަަނަ އަހަރު ކަމަށް ބުނެފައިވޭ.
ބާސެލޯނާ އަށް އިރުޝާދު ދެމުން އަންނަ ހަންސީ ފްލިކް. | ރޮއިޓާސް
ބާސެލޯނާ އަށް އިރުޝާދު ދެމުން އަންނަ ޖަރުމަނުގެ ހަންސީ ފްލިކް، އެ ކުލަބުގެ އެއްބަސްވުން އައު ކުރާނެކަން ކުލަބަށް އަންގައިފި އެވެ.
އުމުރުން 61 އަހަރުގެ ފްލިކް، ބާސެލޯނާގެ ކޯޗުކަމާ ހަވާލުވީ 2024 ވަނަ އަހަރު އެވެ. ބާސެލޯނާ އާއެކު އޭރު ފްލިކް ސޮއި ކުރީ ދެ އަހަރުގެ އެއްބަސްވުމެއްގަ އެވެ. ނަމަވެސް، 2025 ވަނަ އަހަރު ފްލިކް ވަނީ ބާސެލޯނާގެ އެއްބަސްވުން އައު ކޮށްފަ އެވެ. އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ.
ނަމަވެސް، ބާސެލޯނާ އިން ބޭނުން ވަނީ ފްލިކްގެ އެއްބަސްވުން އައު ކުރުމަށެވެ. އެގޮތުން އޭނާއާ މަަޝްވަރާ ކުރުމަށް ފަހު، ބާސެލޯނާ އިން އައު އެއްބަސްވުމެއް ހުށަހަޅާފައިވާ ކަމަށް މީގެ ކުރިން ވެސް މީޑިއާ ތަކުގައި ވަނީ ރިޕޯޓު ކޮށްފަ އެވެ. ސްޕެއިންގެ މީޑިއާ ތަކުގައި މި ފަހުން ރިޕޯޓު ކޮށްފައިވާ ގޮތުގައި، އެއްބަސްވުން އައު ކުރާނެކަން ފްލިކް މިހާރު ވަނީ ބާސެލޯނާ އަށް އަންގައިފަ އެވެ.
މީޑިއާ ތަކުގައި ބުނެފައިވާ ގޮތުން، ބާސެލޯނާ އިން ފްލިކް އަށް ހުށަހަޅާފައި ވަނީ ދެ އަހަރު ދުވަހަށް އެއްބަސްވުން އައު ކުރުމަށެވެ. އެހެންކަމުން އެ އެއްބަސްވުމުގެ މުއްދަތު ހަމަވާނީ 2029 ވަަނަ އަހަރު ކަމަށް ބުނެފައިވެ އެވެ. ހަމަ އެހެންމެ، އައު އެއްބަސްވުމުގެ އެންމެ ފަހުގެ ކަންކަމާ ގުޅޭ ގޮތުން މި ހަފުތާގައި ބާސެލޯނާ އިން ފްލިކްގެ އެޖެންޓާ އެކު މަޝްވަރާ ކޮށްފައިވާ ކަމަށް ބުނެފައިވެ އެވެ.
ބާސެލޯނާ އިން ފްލިކްގެ އެއްބަސްވުން އައު ކުރުމަށް ބޭނުންވާއިރު، އޭނާގެ އިރުޝާދުގެ ދަށުން ބާސެލޯނާ އިން އަންނަނީ ރަނގަޅު ނަތީޖާ ތަކެއް ނެރެމުންނެވެ. ފްލިކްގެ އިރުޝާދުގެ ދަށުން ބާސެލޯނާ އިން ވަނީ މިހާތަނަށް ހަތަރު ތަށްޓެއް ކާމިޔާބު ކޮށްފަ އެވެ. މި ސީޒަންގެ ސްޕެނިޝް ލީގު ކާމިޔާބު ކުރުމުގެ ފުރުސަތު ވެސް ބާސެލޯނާ އަށް އެބަ އޮތެވެ. އެގޮތުން އާދީއްތަ ދުވަހުގެ ރޭ އަމިއްލަ ދަނޑުގައި ރެއާލް މެޑްރިޑާ ދެކޮޅަށް ކުޅޭ މެޗުން ބަލި ނުވެ ފަރުޖައްސާލައިގެން ބާސެލޯނާ އަށް ލީގު ކާމިޔާބު ކުރެވޭނެ އެވެ.
