ބާސެލޯނާގެ ކުޅުންތެރިންގެ ފަރާތުން ފެނުނު އޯގާތެރިކަމުން ފްލިކް އަށް ކުރެވުނީ ތަފާތު އިޙުސާސެއް

އޭނާގެ ބައްޕަ މަރުވި ވާހަކަ ހިއްސާ ކުރުމާ އެކު، ބާސެލޯނާގެ ކުޅުންތެރިންގެ ފަރާތުން ފެނުނީ އިންތިހާ އަށް ލޯތްބާއި އަޅާލުން ކަމަށާއި، އެކަމުން ކުރެވުނީ ތަފާތު އިޙުސާސެއް ކަމަށް ބާސެލޯނާގެ ކޯޗު ހަންސީ ފްލިކް ބުނެފި އެވެ.

އާދީއްތަ ދުވަހުގެ ރޭ ސްޕެނިޝް ލީގުގައި ވާދަވެރި ރެއާލް މެޑްރިޑާ ދެކޮޅަށް ނިކުތް މެޗުގެ ކުރިން، ފްލިކްގެ ބައްޕަ ވަނީ މަރުވެފަ އެވެ. ފްލިކް ބުނީ، މެޗުގެ ކުރިން އެ ޚަބަރު ލިބުމާ އެކު، އޭނާ އަށް ހަދާނެ ގޮތެއް ނޭނގުނު ކަމަށެވެ. އެގޮތުން ޓީމުގެ ކުޅުންތެރިންނާ އެ ވާހަކަ ހިއްސާ ކުރާނީތޯ، ނުވަތަ ނޫންތޯ ނިންމަން އުނދަގޫވި ކަމަށް ފްލިކް ބުންޏެވެ. 

ނަމަވެސް އެންމެ ފަހުން ނިންމީ ބާސެލޯނާގެ ކުޅުންތެރިންނާ އެ ވާހަކަ ހިއްސާ ކުރަން ކަމަށް ފްލިކް ބުންޏެވެ. ފްލިކް ބުނީ ކުޅުންތެރިންނާ އެ ވާހަކަ ހިއްސާ ކުރުމުން، ކުޅުންތެރިންގެ ފަރާތުން ފެނުނީ އާދަޔާ ޚިލާފު ލޯތްބަކާއި، ކުލުނެއް ކަމަށެވެ. އޭނާ ބުނީ ބާސެލޯނާގެ ކުޅުންތެރިން އޭނާ އަށް އިޙުސާސް ކޮށްދިނީ، އަމިއްލަ ގޭގައި ހުރެވުނު ކަމުގެ އިޙުސާސް ކަމަށެވެ. އެކަން ފާހަގަކޮށް ފްލިކް ބުނީ، އެއީ ދުވަހަކު ވެސް އޭނާ ހަނދާން ނެތޭނެ ކަމެއް ނޫން ކަމަށެވެ.

މީގެ އިތުރުން ފްލިކް ބުނީ، ބާސެލޯނާ އަށް ޖެހި ޖެހިގެން ދެ ވަނަ ސީޒަންގައި ސްޕެނިޝް ލީގު ކާމިޔާބު ކުރެވިފައިވާ ކަމަށާއި، އެއީ ވަރަށް ބޮޑު ކާމިޔާބެއް ކަމަށެވެ. އޭނާ ބުނީ ބާސެލޯނާ އަށް އިރުޝާދު ދެމުން އަންނަނީ ވަރަށް ގަޔާވެގެން ކަމަށާއި، ބާސެލޯނާގައި ގިނަ ކާމިޔާބީ ތަކެއް ހޯދަން ބޭނުންވާ ކަމަށެވެ. ބާސެލޯނާާ އާއި، އެކުލަބުގެ ބެޖަށްޓަކައި ބާސެލޯނާ އިން ކޮންމެ މެޗެއްގެ 90 މިނެޓުގައި މަސައްކަތް ކުރަމުން އަންނަ ކަމަށް ފްލިކް ބުންޏެވެ.

ފްލިކް ބުނީ ބާސެލޯނާގައި އަދި ވެސް ގިނަ މަސައްކަތް ތަކެއް ކުރަން ޖެހޭ ކަމަށާއި، ބާސެލޯނާ މިހާރު ކުރިއަށް ދަނީ ރަނގަޅު މިސްރާބުގައި ކަަމަށެވެ. އެގޮތުން ބާސެލޯނާ އިން އަދި ވެސް މަސައްކަތް ކުރާނީ އިތުރު ކާާމިޔާބުތައް ހޯދުމަށް ކަމަށާއި، ބާސެލޯނާގައި މިހާރު އޮތް ޓީމަކީ އެ ފެންވަރުގެ ޓީމެއް ކަަމަށް ފްލިކް ބުންޏެވެ. 

ފްލިކްގެ އިރުޝާދުގެ ދަށުން ބާސެލޯނާ އިން ވަނީ މިހާތަނަށް ފަސް ތައްޓެއް ކާމިޔާބު ކޮށްފަ އެވެ. އޭނާގެ އިރުޝާދުގެ ދަށުން ބާސެލޯނާ އިން ރަނގަޅު ނަތީޖާ ތަކެއް ނެރެމުން އަންނައިރު، ބާސެލޯނާ އިން އޮތީ ފްލިކްގެ އެއްބަސްވުން އައު ކުރަން ވެސް ބޭނުންވެފަ އެވެ. އަދި ފްލިކް ހުރީ ބާސެލޯނާގެ އެއްބަސްވުން އައު ކުރަން ޤަބޫލު ވެގެން ކަމަށް ރިޕޯޓު ތަކުގައި ވަނީ ބުނެފަ އެެވެ.