މިހުރީ އުފަލުން، އެއްބަސްވުން އައު ކުރާނަން: ފްލިކް

ބާސެލޯނާގައި އޭނާ މަސައްކަތް ކުރަނީ ވަރަށް އުފަލުން ކަމަށާއި، އެ ކުލަބުގެ އެއްބަސްވުން އައު ކުރަން ތައްޔާރު ކަމަށް ހަންސީ ފްލިކް ބުނެފި އެވެ. 

އުމުރުން 61 އަހަރުގެ ފްލިކް، ބާސެލޯނާގެ ކޯޗުކަމާ ހަވާލުވީ 2024 ވަނަ އަހަރު އެވެ. ބާސެލޯނާ އާއެކު އޭރު ފްލިކް ސޮއި ކުރީ ދެ އަހަރުގެ އެއްބަސްވުމެއްގަ އެވެ. ނަމަވެސް، 2025 ވަނަ އަހަރު ފްލިކް ވަނީ ބާސެލޯނާގެ އެއްބަސްވުން އައު ކޮށްފަ އެވެ. އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ.

ބާސެލޯނާާ އިން ފްލިކްގެ އެއްބަސްވުން އައު ކުރަން ބޭނުންވާ ކަމަށް ރިޕޯޓު ކޮށްފައިވާއިރު، ފްލިކް ވަނީ އެކަން ޔަޤީން ކޮށްދީފަ އެވެ. ފްލިކް ބުނީ އޭނާ ބާސެލޯނާގައި ހުރީ ވަރަށް އުފަލުން ކަމަށާއި، ބާސެލޯނާ އާއެކު އޭނާ އައު އެއްބަސްވުމެއްގައި ސޮއި ކުރާނެ ކަމަށެވެ. 

އައު އެއްބަސްވުމުގެ ތަފްސީލުތައް ހިއްސާ ކުރަމުން ފްލިކް ބުނީ، 2028 ވަނަ އަހަރާ ހަމައަށް ބާސެލޯނާގައި އޭނާ ދެމި ހުންނާނެ ކަމަށެެވެ. އެހެންކަމުން ބާސެލޯނާގެ އެއްބަސްވުން ފްލިކް އައު ކުރާނީ އިތުރު އެއް ސީޒަންގެ ނިޔަލަށެވެ. އެކަން ފާހަގަކޮށް ފްލިކް ބުނީ ކަންކަން ރަނގަޅަށް ގޮސްފި ނަމަ، އިތުރު އެއް އަަހަރަށް އަދިވެސް މަޑު ކުރުމުގެ ފުރުސަތު އޮތް ކަމަށެވެ. 

ފްލިކްގެ އިރުޝާދުގެ ދަށުން ބާސެލޯނާ އިން ވަނީ މިހާތަނަށް 114 މެޗު ކުޅެފަ އެވެ. އޭގެ ތެރެއިން އެ ޓީމު ވަނީ 87 މެޗުން މޮޅުވެފަ އެވެ. 10 މެޗު އެއްވަރުވެފައިވާއިރު، 17 މެޗަކުން ވަނީ ބަލިވެފަ އެވެ. ފްލިކްގެ އިރުޝާދުގެ ދަށުން ބާސެލޯނާ އިން ވަނީ ފަސް ތައްޓެއް ވެސް ކާމިޔާބު ކޮށްފަ އެވެ. އޭގެ ތެރޭގައި ސްޕެނިޝް ލީގާއި، ސްޕެނިޝް ސުޕަ ކަޕް ދެ ފަހަރު ކާމިޔާބު ކުރުމުގެ އިތުރުން، ކޮޕާ ޑެލް ރޭ ކާމިޔާބު ކުރުން ހިމެނެ އެވެ.