އަންގާރަ ދުވަހު އީރާން އަށް ހަމަލާ ދޭން ނިންމިން، މަޑު ޖައްސާލީ ގަލްފުގެ ވެރިން އެދިގެން: ޓްރަމްޕް

އީރާން އަށް ހަމަލާ ދިނުމަށް އޭނާ ނިންމާފައި ވަނިކޮށް، ގަލްފުގެ ޤައުމު ތަކުގެ ވެރިން އެދިވަޑައިގެންނެެވުމުން އެ ހަމަލާ ނުދޭން ނިންމާފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، އަންގާރަ ދުވަހު އީރާން އަށް ދިނުމަށް ނިންމާފައިވާ ވަރުގަދަ ހަމަލާތައް މަޑު ޖައްސާލުމަށް އެދިވަޑައިގަތީ ޤަތަރުގެ އަމީރު ތަމީމް ބިން ހަމަދު އަލް ޘާނީ އާއި، ސައުދީ އަރަބިއްޔާގެ ވަަލީ އަހުދު މުޙައްމަދު ބިން ސަލްމާާން އާއި، ޔުނައިޓެޑު އަރަބް އެމިރޭޓްސް (ޔޫއޭއީ)ގެ ރައީސް މުޙައްމަދު ބިން ޒައިދު އަލް ނަޙްޔާން ކަމަށެވެ. 

މި ތިން ޤައުމުގެ ވެރިންނަކީ ވެސް އެމެރިކާގެ ގާތް އެކުވެރިކަން ފާހަގަ ކުރައްވައި ޓްރަމްޕް ވިދާޅުވީ، އީރާން އާއެކު މިހާރު ކުރިއަށްދާ މަޝްވަރާ ތަކުން އެމެރިކާ އާ މެދު އިރުމަތީގެ ޤައުމު ތަކަށް ބަލައި ގަނެވޭނެ ފަދަ އެއްބަސްވުމަކަށް އާދެވޭނެ ކަމަށް އެ ޤައުމު ތަކުގެ ވެރިން ޤަބޫލު ކުރައްވާ ކަމަށެވެ. 

އަންގާރަ ދުވަހު އީރާން އަށް ހަމަލާ ދިނުމަށް ރާވާފައިވާކަން މީގެ ކުރިން ޓްރަމްޕް ހާމަ ކުރައްވާފައި ނުވެ އެވެ. ނަމަވެސް، ނިމިދިޔަ ހަފްތާ ބަންދުގައި އޭނާ ވަނީ އީރާން އަށް ވަގުތު ކުޑަތަން ވަމުން އަންނަ ކަމަށާއި، އަވަހަށް އެއްބަސްވުމަކަށް ނައިސްފި ނަމަ، އެ ޤައުމުން ސަލާމަތް ވާނެ އެއްވެސް އެއްޗެއް ނޯންނާާނެ ކަމަށް ވިދާޅުވެ އިންޒާރު ދެއްވައިފަ އެވެ. 

މިދިޔަ އޭޕްރީލް މަހުގެ ތެރޭގައި ޤާއިމު ކުރި ވަގުތީ އެއްބަސްވުމަށް ފަހު، އީރާން އަށް އައު އެއްބަސްވުމަކަށް ނައިސްފި ނަމަ، އަލުން ހަމަލާ ދޭނެ ކަމުގެ އިންޒާރު ޓްރަމްޕް ދެއްވަމުން ގެންދަވާތާ ދުވަސް ތަކެއް ވެއްޖެ އެވެ. 

އީރާން އަށް ދޭން ރޭވި ހަމަލާގެ އެއްވެސް ތަފްސީލެއް ޓްރަމްޕް ހާމަ ކުރައްވާފައި ނުވެ އެވެ. އެހެން ނަމަވެސް، އެކަށީގެންވާ އެއްބަސްވުމަކަށް ނާދެވިއްޖެ ޙާލަތެއްގައި، ކުއްލި ސުންގަޑިއެއްގައި އީރާން އަށް ވަރުގަދަ އަދި ފުޅާ ދާއިރާއެއްގައި ހަމަލާއެއް ދިނުމަށް ތައްޔާރަށް ތިބުމަށް އެެމެރިކާގެ އަސްކަރިއްޔާ އަށް އަމުރު ކުރައްވާފައި ވާނެ ކަމަށް ޓްރަމްޕް ވިދާޅުވި އެވެ. 

މި މައްސަލައިގައި ފާއިތުވި ދުވަސް ތަކުގައި ޓްރަމްޕް ވަނީ އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ އާއި، ޗައިނާގެ ރައީސް ޝީ ޖިންޕިންއާ ވެސް މަޝްވަރާ ކުރައްވައިފަ އެވެ.