ޗައިނާގެ ރައީސް އާއެކު ކުރިއަށް ގެންދިޔަ މަޝްވަރާތައް ވަރަށް ކާމިޔާބު: ޓްރަމްޕް

ޗައިނާގެ ރައީސް ޝީ ޖިންޕިން އާއެކު ކުރިއަށް ގެންދިޔަ މަޝްވަރާތައް ވަރަށް ކާމިޔާބު ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް މިހެން ވިދާޅުވީ ޗައިނާ އަށް ކުރައްވަމުން ގެންދަވާ ދަތުރުފުޅުގައި އެ ޤައުމުގެ ރައީސް ޝީ ޖިންޕިން އާއެކު ބޭއްވެވި ރަސްމީ ބައްދަލުވުމަށް ފަހު އެވެ. އެގޮތުން ޗައިނާގެ ތާރީޚީ ބިނާއެއް ކަމަށްވާ ޓެމްޕަލް އޮފް ހެވަން އަށް ވަޑައިގެންނެވި ވަގުތު، ޓްރަމްޕް ވަނީ ނޫސްވެރިންނާ ވާހަކަ ދައްކަަވައިފަ އެވެ.

އެސޯސިއޭޓެޑް ޕްރެސް (އޭޕީ) އިން ރިޕޯޓު ކޮށްފައިވާ ގޮތުގައި، ޗައިނާގެ ރައީސް އާއެކު ބޭއްވި ބައްދަލުވުން ދިޔައީ ކިހިނެއްތޯ ނޫސްވެެރިން ސުވާލު ކުރުމުން، ޓްރަމްޕް ވަނީ އެ ބައްދަލުވުންތައް ވަރަށް ރަނގަޅު ނުވަތަ ވަރަށް ކާމިޔާބު ކަމަށް ވިދާޅުވެފަ އެވެ. ދެ ޤައުމުގެ އިސްވެރިންގެ މެދުގައި ކުރިއަށް ދިޔަ މި މަޝްވަރާ ތަކަކީ، ދެ ޤައުމުގެ ގުޅުން ބަދަހި ކުރުމަށާއި، މުހިންމު ދާއިރާ ތަކުން އެއްބާރުލުން ދިނުމާ ގުޅޭ ގޮތުން ބޭއްވުނު ބައްދަލުވުން ތަކެކެވެ. 

މި ބައްދަލުވުމާ ގުޅޭ ގޮތުން ޓްރަމްޕް ކުރު ޖަވާބެއް ދެއްވި ނަމަވެސް، ނޫސްވެރިންގެ އިތުރު ސުވާލު ތަކަށް ޓްރަމްޕް ޖަވާބު ދެއްވާފައި ނުވެ އެވެ. ވަކިން ޚާއްސަކޮށް ޗައިނާ އާއި އެމެރިކާއާ ދެމެދު އަބަދު ވެސް ޚިޔާލު ތަފާތުވުން އުފެދިފައިވާ ޓައިވާންގެ މައްސަލައާ ގުޅޭ ގޮތުން ދެ ބޭފުޅުން މަޝްވަރާ ކުރެއްވިތޯ ނޫސްވެރިން ސުވާލު ކުރި ނަމަވެސް، ޓްރަމްޕް އެ ސުވާލަަށް އެއްޗެސް އެއްޗެއް ވިދާޅުވެފައި ނުވެ އެވެ. 

ދުނިޔޭގެ އެންމެ ބޮޑު ދެ އިގްތިސާދުގެ މެދުގައި އޮންނަ ގުޅުމަކީ މުޅި ދުނިޔޭގެ މަސްލަހަތާ ގުޅިފައިވާ ކަމަކަށް ވާއިރު، ރައީސް ޓްރަމްޕް ޗައިނާ އަށް ކުރައްވަމުންދާ މި ދަތުރުފުޅަކީ ބައިނަލްއަގުވާމީ މައިދާނުގައި ވަރަށް ބޮޑު ސަމާލު ކަމެއް ހުއްޓިފައިވާ ދަތުރުފުޅެކެވެ. މި ދަތުރުފުޅުގެ ތެރެއިން ދެ ގައުމުގެ ދެމެދުގައި ހުރި ވިޔަފާރީގެ މައްސަލަ ތަކާއި، ސަރަހައްދީ ސަލާމަތާ ގުޅުންހުރި ކަންކަމުގައި ފުޅާ ދާއިރާއެއްގައި މަޝްވަރާ ކުރެވޭނެ ކަމަށް ބެލެވެ އެވެ.