އެމެރިކާ އާއި ޗައިނާ ވާން ޖެހޭނީ މިތުރުންނަށް، ހަތުރުންނަކަށް ނޫން: ޗައިނާގެ ރައީސް

އެމެރިކާ އާއި ޗައިނާ ވާން ޖެހޭނީ މިތުރުންނަށް ކަމަށާއި، ހަތުރުންނަށް ވެގެން ނުވާނެ ކަމަށް ޗައިނާގެ ރައީސް ޝީ ޖިންޕިން ވިދާޅުވެއްޖެ އެވެ.

ޗައިނާގެ ރައީސް ޝީ ޖިންޕިން މިހެން ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕްއާ ބައްދަލު ކުރައްވައި ދެއްކެވި ވާހަކައިގަ އެވެ. ބުދަ ދުވަހު ޓްރަމްޕް ވަނީ ޗައިނާ އަށް ރަސްމީ ދަތުރުފުޅެއްގައި ވަޑައިގެންފަ އެވެ. ބުރާސްފަތި ދުވަހު ޗައިނާގެ ރައީސް ޝީ ޖިންޕިން ވަނީ، ޓްރަމްޕް އަށް ރަސްމީކޮށް މަރުޙަބާ ދަންނަވައިފަ އެވެ. 

ޓްރަމްޕްއާ އެކު އޮތް ބައްދަލުވުން ފައްޓަވަމުން ޗައިނާގެ ރައީސް ޝީ ޖިންޕިން ވިދާޅުވީ، ދުނިޔެ އަށް ތާރީޚީ ގޮތުން ބޮޑެތި ބަދަލު ތަކެއް އަންނަމުންދާ އަދި ދުނިޔެ އައު ހަތަރު އަނގޮޅިއެއްގެ މަތީގައި އޮތް ދަނޑިވަޅެއްގައި ޗައިނާގައި ޓްރަމްޕްއާ ބައްދަލުވުމަކީ ވަރަށް ބޮޑު އުފަލެއް ކަމަށެވެ. މި ބައްދަލުވުމުގައި ޝީ ވަނީ ދެ ޤައުމުގެ ގުޅުމާ ގުޅޭ ގޮތުން މުހިންމު ސުވާލު ތަކެއް ޓްރަމްޕް އަށް އަމާޒު ކުރައްވައިފަ އެވެ. 

ޗައިނާގެ ރައީސް ޝީ ކުރެއްވި ސުވާލު ތަކުގެ ތެރޭގައި، ބޮޑެތި ބާރު ތަކުގެ މެދުގައި އޮންނަ ހަމަ ނުޖެހުން ތަކުން އަރައި ގަނެ، ގުޅުން ތަކުގެ އައު ނަމޫނާއެއް ދެ ޤައުމަށް ބިނާ ކުރެވިދާނެތޯ އެވެ. އަދި ދުނިޔެ އަށް ކުރިމަތިވެފއިވާ ގޮންޖެހުން ތަކުން އަރައި ގަތުމަށް ދެ ޤައުމު ގުޅިގެން މަސައްކަތްކޮށް، ދުނިޔެ އަށް ހަމަޖެހުން ގެނެސްދެވިދާނެތޯ ވެސް ވަނީ އައްސަވައިފަ އެވެ. 

މީގެ އިތުރުން، ދެ ޤައުމުގެ ރައްޔިތުންގެ ލާބަޔާއި މުޅި އިންސާނިއްޔަތުގެ ކުރިމަގަށްޓަކައި، ދެ ޤައުމުގެ ދެ މެދުގައި އޮތް ގުޅުން އުޖާލާ ކުރުމަށް އެކުގައި މަސައްކަތް ކުރެވިދާނެތޯ ވެސް ޗައިނާގެ ރައީސް ސުވާލު ކުރެއްވި އެވެ. ޗައިނާގެ ރައީސް ޝީ ވިދާޅުވީ މިއީ ތާރީޚާއި، ދުނިޔެ އާއި، އަދި ރައްޔިތުން ކުރަމުންދާ ސުވާލު ތަކެއް ކަމަށެވެ. އަދި ބޮޑެތި ޤައުމު ތަކުގެ ލީޑަރުންގެ ހައިސިއްޔަތުން، މި ސުވާލު ތަކުގެ ޖަވާބު ލިޔަން ޖެހޭނީ ދެ ބޭފުޅުން ގުޅިގެން ކަމަށް ވެސް ޝީ ވިދާޅުވި އެވެ. 

ޗައިނާގެ ރައީސް ޝީގެ ވާހަކަފުޅުގައި އިތުރަށް ވިދާޅުވީ، ޗައިނާ އާއި އެމެރިކާ އަކީ ވާދަވެރިންގެ ބަދަލުގައި، ބައިވެރިންނަށް ވާން ޖެހޭ ކަމަށެވެ. އަދި ދެ ޤައުމުގެ ދެ މެދުގައި އޮންނަ ހަމަޖެހޭ ގުޅުމަކީ މުޅި ދުނިޔެ އަށް ލިބޭނެ ވަރަށް ބޮޑު ކުރިއެރުމެއް، ނުވަތަ ނިއުމަތެއްގެ ގޮތުގައި އެމަނިކުފާނު ސިފަ ކުރެއްވި އެވެ. 

މި ބައްދަލުވުމަކީ ދުނިޔޭގެ އެންމެ ބޮޑު ދެ އިޤްތިޞާދުގެ މެދުގައި އޮތް ނުތަނަވަސްކަން ކުޑަކޮށް، ކުރި މަގުގައި މަސައްކަތް ކުރާނެ ގޮތް ތަކެއް ކަނޑަ އެޅުމަށް ބާއްވާ މުހިންމު ބައްދަލުވުމެކެވެ. ދެ ޤައުމުގެ ލީޑަރުންގެ މި މަޝްވަރާ ތަަކަށް މުޅި ދުނިޔޭގެ ސަމާލުކަން ވަނީ ހުއްޓިފަ އެވެ.