ހެޔޮކަމެއް ކުރެވުމުން އެ އަމަލުތައް ކުރުން މަތީގައި ދެމިތިބޭން ޖެހޭ ނަމަވެސް ކުރެވުނު އަމަލެއްގެ ގިނަކަމަކުން ސުވަރުގެ ޔަގީންވީ ކަމަށް ދެކިގެން ނުވާނެ: ޚުތުބާ
ރަމަޟާން މަސް ނިމުނު ނަމަވެސް ހެޔޮ އަމަލުތައް ކުރުންމަތީ ދެމިތިބުމަށާއި، ކުރެވޭ އަޅުކަންތަކާ މެދު ބޮޑާވެ ފަޚުރުވެރިނުވުމަށް ހުކުރު ޚުތުބާގައި ވަނީ ނަސޭހަތްތެރިވެފައި. މީގެ އިތުރުން ޝައްވާލު މަހުގެ ހަ ރޯދަ ހިފުމަށާއި ގިނަގިނައިން ތައުބާވެ އިސްތިޣުފާރު ކުރުމަށް ގޮވާލައި، ސީދާ މަގުގައި ދެމިތިބޭ މީހުންނަށް ސުވަރުގޭގެ އުފާވެރިކަން ލިބޭނެކަން ޚުތުބާގައި ފާހަގަކުރި. އަދި އިންސާނާގެ އެންމެ ފަހުގެ މަންޒިލަކީ ސުވަރުގެ ކަމުގައި ހެދުމަށްޓަކައި ގަދައަޅައި މަސައްކަތް ކުރުމަށް ޚުތުބާގައި ވަނީ ބާރުއަޅާފައި.
ފިތުރު އީދު ނަމާދު ކުރުމަށް ޖަމާއަތް ހަދައިގެން - ފައިލް ފޮޓޯ
ހެޔޮ ކަމެއް ކުރެވިއްޖެ ނަމަ އެ ހެޔޮކަމެއް ކުރެވުމުން އޭގެ ފަހުގައި އެ އަމަލުތައް ކުރުން މަތީގައި ދެމިތިބޭން ޖެހޭ ކަމަށާއި، ކުރެވުނު އަމަލެއްގެ ގިނަކަމަކުން ސުވަރުގެ ޔަގީންވީ ކަމަށް ދެކިގެން ނުވާނެ ކަމަށް ހުކުރު ޚުތުބާގައި ބުނެފި އެވެ.
''ރަމަޟާންމަހަށް ފަހު ހެޔޮ ޢަމަލުކުރުންމަތީ ދެމިތިބޭށެވެ'' މިމައުޟޫއަށް މުޅި ރާއްޖެއަށް އިއްވި ޚުތުބާގައި ވަނީ ރަމަޟާން މަސް ނިމޭކަން ހަނދާންކޮށްދީފަ އެވެ. އަދި ރަމަޟާން މަސް ނިމުނު ނަމަވެސް ހެޔޮ އަމަލު ކުރުންމަތީގައި ދެމިތިބުމަށާއި، ޝައްވާލު މަހުގެ ހަ ރޯދައިގެ ޚިފުމުގެ އިތުރުން ގިނަގިނައިން ތައުބާވެ، މާތް ﷲއަށް އިސްތިޣުފާރު ނަސޭހަތްތެރިވެފައިވެ އެވެ.
ކުރިން ކުރެވިފައިވާ އަޅުކަންތަކަކީ، ގިނަގުނަ ހެޔޮ އަމަލު ތަކެއްކަމުގައި ދެކިގެން ނުވާނެކަން ފާހަގަކޮށް ޚުތުބާގައި ބުނީ، އެހެނީ ކުރެވުނު ހެޔޮ އަމަލުތަކަށް ޓަކައި އަމިއްލަ ނަފުސަށް ބޮޑާވެ، ފަޚުރުވެރިވެ، އެއީ މާގިނަ ހެޔޮ އަމަލު ތަކެއްކަމުގައި ދެކޭ ނަމަ އެ އަމަލުތައް ބާތިލު ވެދާނެ ކަމަށެވެ.
ޚުތުބާގައި ބުނީ، އަހަރެމެންނަށް ހެޔޮ ކަމެއް ކުރެވިއްޖެ ނަމަ އެ ހެޔޮކަމެއް ކުރެވުމުން، އޭގެ ފަހުގައި އެ ޢަމަލުތައްކުރުން މަތީގައި ދެމިތިބޭން ޖެހޭ ކަމަށެވެ. އަދި ކުރެވުނު އަމަލެއްގެ މޮޅުކަމަކުން ނުވަތަ ގިނަކަމަކުން، ސުވަރުގެ ޔަގީންވީކަމަށް ދެކިގެން ނުވާނެ ކަމަށް ޚުތުބާގައި ބުނެފައިވެ އެވެ.
ގުރްއާނުގައި މާތްﷲ ވަޙީ ކުރެއްވި އާޔަތުގެ މާނާގައި ވަނީ: ހަމަކަށަވަރުން، ތިމަންމެންގެ ވެރިރަސްކަލާނގެއީ ﷲއޭ ބުނެ، ދެން ސީދާމަގުގައި ދެމިތިބި މީހުން (ދަންނާށެވެ!) އެއުރެންގެ މައްޗަށް މަލާއިކަތުން ފައިބައިވަޑައިގަންނަވާނެތެވެ. (ވިދާޅުވަމުންނެވެ.) ތިޔަބައިމީހުން ބިރުނުގަންނާށެވެ! އަދި ހިތާމަނުކުރާށެވެ! އަދި ތިޔަބައިމީހުންނަށް ވަޢުދުކުރައްވާކަމުގައިވާ ސުވަރުގޭގެ އުފާވެރިކަމުގެ ޚަބަރު ލިބިގަންނާށެވެ!" ބިރުވެރިކަމާއި، ހިތާމަކުރުން ނޯންނާނީ ކޮން ބަޔަކަށްހެއްޔެވެ؟ އެއީ މާތް ﷲއީ އެ މީހުންގެ ވެރިރަސްކަލާނގެއޭ ބުނެ، ހެޔޮ ޢަމަލުކުރުން މަތީ އަބަދާއި އަބަދު ދެމިތިބޭ މީހުންނަށެވެ. މުސްލިމް އަޚުންނޭވެ! ބިރެއްނެތް، ހިތާމަކުރުމެއްނެތް ތަނަކީ ސުވަރުގެ އެވެ.ހުކުރު ޚުތުބާ
މީގެ އިތުރުން ޚުތުބާގައި ވަނީ އަހަރެމެންގެ އެންމެ ފަހުގެ މަންޒިލަކީ ކޮބައިކަން ހަނދާން ކޮށްދީފަ އެވެ. އަދި ސުވަރުގެ ހޯދުމަށްޓަކައި ގަދައަޅާ މަސައްކަތް ކުރުމަށް ގޮވާލާފައިވެ އެވެ.
