ރޯދަމަހުގެ ފަހު ދިހައިގެ ރޭތަކުގެ ދަރުމަ ހޯދުމަށް މަސައްކަތް ކުރުމަކީ ސުވަރުގެ އެދޭ ކޮންމެ މީހަކު ކުރާން ޖެހޭ ކަމެއް: ޚުތުބާ
ރަމަޟާން މަހުގެ ފަހު ދިހައިގެ މާތްކަން ހާސިލުކުރުމަށް ގަދައަޅައި މަސައްކަތް ކުރުމަށް ޚުތުބާގައި ވަނީ ގޮވާލާފައި. ޚާއްސަކޮށް ލައިލަތުލްޤަދުރި ރޭގެ ދަރުމަ ހޯދުމަށް އިސްކަންދިނުމަށާއި ފިޠުރު ޒަކާތް ދެއްކުމަށް ހަނދާން ކޮށްދީފައިވޭ. މީގެ އިތުރުން އިސްލާމީ އުންމަތަށް ކުރިމަތިވެފައިވާ ގޮންޖެހުންތަކުން އަރައިގަތުމަށް އެއްބައިވަންތަކަން އިސްކުރުމަށް ޚުތުބާގައި ބާރުއަޅާފައިވޭ. އަދި އިސްލާމީ ހަޟާރަތު އިއާދަކުރުމަށްޓަކައި ޒުވާން ޖީލު އިޚުލާސްތެރި އަޒުމަކާއެކު މަސައްކަތްކުރުމަށް ވެސް ޚުތުބާގައި ވަނީ ގޮވާލާފައި.
ހުކުރު ޚުތުބާ އަޑު އެހުމަށް ޖަމާއަތް ހަދައިގެން. | އިސްލާމިކް މިނިސްޓްރީ
ކުރިއަށް އޮތީ އެންމެ ހެޔޮކަން ބޮޑުވެގެންވާ ރަމަޟާންމަހުގެ ފަހު ދިހައިގެ ރޭތައް ކަމަށާއި، އެރޭތަކުގެ މާތްކަމާއި ދަރުމަ ލިބިގަތުމަށް މަސައްކަތްކުރުމަކީ ސުވަރުގެ އެދޭ ކޮންމެ މީހަކު ކުރާން ޖެހޭ ކަމެއް ކަމަށް ހުކުރު ޚުތުބާގައި ބުނެފި އެވެ.
''ރަމަޟާން މަހުގެ ފަހު ދިހައެއް'' މިމައުޟޫއަށް މުޅި ރާއްޖެއަށް އިއްވި ޚުތުބާގައި ބުނީ، ރަހުމަތުގެ މައްސަރު ވަކިވުމުގެ ވަގުތު ކުޑަތަންވާ ކަމަށާއި، ކުރެވުނު ހެޔޮ އަމަލުތަކާ މެދު ވިސްނައި އިތުރަށް ހެޔޮ އަމަލުކުރުމުގައި ދެމިތިބުމަށް ކުރެވޭން ހުރީ ކޮން ކަންތަކެއްތޯ ބަލަން ޖެހޭ ކަމަށެވެ.
ކުރިއަށް އޮތީ ފަހު ދިހައެއްގެ ދުވަސްތައް ކަން ފާހަގަކޮށް ޚުތުބާގައި ބުނީ، އަހަރުގެ ތެރޭގައި މައްސަރުތަކާއި ދުވަސްތަކާއި ރޭތައް ﷲ تَعَالَى ޚާއްސަ ކުރައްވައިފައިވާ ކަމަށެވެ.
ޚުތުބާގައި ބުނީ، ރަމަޟާންމަހު ފަހު ދިހައިގެ ރޭތަކަކީ ކާއިނާތުގެވެރި اللهُ سُبْحَانَهُ وَتَعَالَى ގެ ރަހުމަތާއި ފުއްސެވުމާއި ރުއްސެވުމާއި ދިންނެވުން، އޭގެ އިންތިހާއަށް އަޅުތަކުންނަށް ދެއްވާނެކަން އަންގަވައިފައިވާ ރޭތަކެއް ކަމަށާއި، އެ ރޭތަކުގެ މާތްކަމާއި ދަރުމަ ލިބިގަތުމަށް މަސައްކަތްކުރުމަކީ ސުވަރުގެ އެދޭ ކޮންމެ މީހަކު ކުރާން ޖެހޭ ކަމެއް ކަމަށެވެ.
ލައިލަތުލްޤަދުރިއަކީ އަށްޑިހަ ތިން އަހަރާއި ގާތްގަނޑަކަށް ހަތަރު މަސްދުވަހު މާތް ﷲއަށް އަޅުކަން ކުރުމުގައި ދެމިހުރި މީހަކަށް ލިބޭ ސަވާބާއި ދަރުމަ އެންމެ ރެއަކުން ލިބޭ ރެއަށްވާއިރު، މި ދަރުމައާއި ސަވާބު ހާސިލުވޭތޯ ގަދައަޅައި މަސައްކަތް ކުރުމަށް ޚުތުބާގައި ގޮވާލާފައިވެ އެވެ.
ރަމަޟާންމަހުގެ ފަހު ދިހައިގެ ރޭތަކުގައި ލައިލަތުލްޤަދުރި ހޯދުމަށް މަސައްކަތްކުރުމާ ބެހޭ ގޮތުން اِبْنُ عُمَر رَضِيَ اللهُ عَنْهُمَاގެ އަރިހުން ރިވާވެގެން ވެ އެވެ. (أَنَّ رِجَالًا مِنْ أَصْحَابِ النَّبِيِّ صَلَّى اللهُ عَلَيْهِ وَسَلَّمَ أُرُوْا لَيْلَةَ الْقَدْرِ فِي الْمَنَامِ فِي السَّبْعِ الْأَوَاخِرِ، فَقَالَ رَسُولُ اللهِ صَلَّى اللهُ عَلَيْهِ وَسَلَّمَ: أَرَى رُؤْيَاكُمْ قَدْ تَوَاطَأَتْ فِي السَّبْعِ الْأَوَاخِرِ، فَمَنْ كَانَ مُتَحَرِّيَهَا، فَلْيَتَحَرَّهَا فِي السَّبْعِ الْأَوَاخِرِ). މާނައީ: "މާތްނަބިއްޔާ صَلَّى اللهُ عَلَيْهِ وَسَلَّمَ ގެ އަޞްޙާބުން ކުރެ ބައެއް ބޭކަލުންނަށް (ރަމަޟާންމަހު) ފަހު ދިހައިގެ ހަތްރެއިން ރެއެއްގައި، ހުވަފެންފުޅުގައި ލައިލަތުލްޤަދުރި ދެއްކެވުނެވެ. ފަހެ، (މި ކަން އެނގިވަޑައިގެން) ރަސޫލު اللَّهِ صَلَّى اللهُ عَلَيْهِ وَسَلَّمَ ޙަދީޘްކުރެއްވިއެވެ. "ތިޔަބޭކަލުންނަށް، ފަހު ދިހައިގެ ހަތް ރެއިން ރެއެއްގައި އެއް ކަހަލަ ހުވަފެންފުޅެއް ފެނިވަޑައިގަތްކަމުގައި ތިމަންކަލޭގެފާނު ދެކެވަޑައިގަންނަވަމެވެ. ފަހެ، އެ ރޭ ލިބިގަތުމަށް އެދޭ މީހާ، ފަހު ދިހައިގެ ހަތްރޭ ގަދައަޅައި މަސައްކަތްކުރާ ހުށިކަމެވެ.ހުކުރު ޚުތުބާ
ރަމަޟާންމަހަކީ ދީލަތިކަމުގެ މައްސަރުކަން ފާހަގަކޮށް ޚުތުބާގައި ވަނީ ފިޠުރު ޒަކާތް ވެސް ދެއްކުމަށް ހަދާން ކޮށްދީފަ އެވެ.
މީގެ އިތުރުން އިސްލާމީ އުންމަތަށް އިޝާރާތް ކޮށް ޚުތުބާގައި ބުނީ، މިއަދު އިސްލާމީ އުންމަތް ހޭދަކުރަމުން މިދަނީ އުންމަތުގެ ތާރީޚުގައި ފާހަގަކޮށްލެވޭ ފަދަ ނުރައްކާތެރި ދުވަސްތަކެއްގެ ތެރޭގައި ކަމަށާއި، އިސްލާމީ އުންމަތުގެ ދުޝްމަނުން، މި އުންމަތް ބަލިކަށިކޮށް ބައިބައިކޮށްލުމަށް ގިނަގުނަ މަސައްކަތްތަކެއް ކުރަމުންދާ ކަމަށެވެ. އަދި އުންމަތުގެ ކަންކޮޅުތަކުގައި ލޭއޮހޮރުވައިލައި، އިސްލާމީ ގައުމުތަކުގެ މެދުގައި ބައިބައިވުން އުފެއްދުމަށް ކުރަމުންދާ މަސައްކަތް ފެންނަމުންދާ ކަމަށާއި، މި ހާލަތުގައި އިސްލާމީ އުންމަތް އެއްބައިވަންތަވެ އަޚުވަންތަ ބަޔަކަށްވާން ޖެހޭ ކަމަށެވެ.
ޚުތުބާގައި ބުނީ، މުސީބާތާއި ނުރައްކާތެރިކަންކަމުގެ ކުރިމަތީގައި ކެތްތެރިކަން އިސްކޮށް ހިކުމަތްތެރިވާން ޖެހޭ ކަމަށާއި، އިސްލާމީ އުންމަތަށް ނަސްރެއް ލިބޭނީ އުންމަތް އެކަތިގަނޑަކަށްވެގެން ކަމަށެވެ. އަދި ބައިބައިވެއްޖެ ނަމަ އުންމަތް ބަލިކަށިވެދާނެ ކަމަށް ޚުތުބާގައި ބުނެފައިވެ އެވެ.
އެހެންކަމުން އުންމަތުގެ މުސްތަގުބަލަށް ޓަކައި، އިސްލާމީ ޙަޟާރަތު އަލުން އިއާދަކުރުމަށް އަދުގެ ޒުވާން ޖީލު އިޚުލާސްތެރިކަމާ އެކު އެއަޒުމް ކަނޑައެޅުމަށް ޚުތުބާގައި ގޮވާލާފައިވެ އެވެ.
