ވެމްކޯ އެމްޑީގެ ނުފޫޒުން، އެޕްރައިޒަލް އިން އެންމެ މަތީ މާކްސް ހޯދާ މުވައްޒަފަކު ވަޒީފާއިން ވަކިކޮށްފި
ވެމްކޯގެ ހިންގުން ހަރުދަނާކޮށް ޚަރަދު ކުޑަކުރުމުގެ ސިޔާސަތުގެ ދަށުން، ރ. ވަންދޫ ފެސިލިޓީގައި 8 އަހަރު މަސައްކަތްކުރި މުވައްޒަފަކު ވަޒީފާއިން ވަކިކުރީ ސިޔާސީ ނުފޫޒުން ކަމަށް ބުނެ ބޮޑެތި ތުހުމަތުތަކެއް ވަނީ ފެންމަތިވެފަ. ކައުންސިލް އިންތިޚާބަށްފަހު އަލުން ވަޒީފާ ދޭނެ ކަމުގެ ޔަގީންކަން ކުރިން ދީފައިވީ ނަމަވެސް، އެ މުވައްޒަފު ވަކިކުރިއިރު އެތަނަށް ސިޔާސީ ނުފޫޒުން އާ މުވައްޒަފުން އައްޔަންކުރަމުންދާ ކަމުގެ ޝަކުވާ ވަނީ ބޮޑުވެފަ. މި މައްސަލައިގައި ކުންފުނީގެ މެނޭޖިންގ ޑިރެކްޓަރާއި ސިޔާސީ ބައެއް ބޭފުޅުންގެ ނުފޫޒު އޮތް ކަމަށް އެތަނުގެ މުވައްޒަފުން ތުހުމަތުކުރޭ.
ވެމްކޯގެ މެނޭޖިންގ ޑިރެކްޓަރ މުޖުތަބާ ޖަލީހު އަދި ރައީސް މުއިއްޒު | ވެމްކޯ
ވޭސްޓް މެނޭޖްމަންޓް ކޯޕަރޭޝަން (ވެމްކޯ) ގެ މެނޭޖިންގ ޑިރެކްޓަރު މުޖުތަބާ ޖަލީލުގެ ނުފޫޒުން، ރ. ވަންދޫ ވޭސްޓް މެނޭޖްމަންޓް ފެސިލިޓީގައި މަސައްކަތް ކުރަމުންދިޔަ މުވައްޒަފަކު ވަޒީފާ އިން ވަކިކޮށްފި އެވެ.
މި މައްސަލައިގައި ވަޒީފާއިން ވަކިކޮށްފައިވަނީ އެ ފެސިލިޓީގައި މަސައްކަތް ކުރަމުންދިޔަ މުޙައްމަދު ސަމީހު އެވެ. އޭނާ ވަޒީފާއިން ވަކިކުރި ކަމުގެ ލިޔުން ވެމްކޯގެ ހެޑް އޮފީހުން ފޮނުވާފައިވަނީ މިދިޔަ ބުދަ ދުވަހު އެވެ.
ސަމީހަށް ފޮނުވި ލިޔުމުގައި ބުނެފައިވަނީ، އޭނާ ލޯކަލް ކައުންސިލް އިންތިޚާބުގައި ވާދަކުރުމަށް ނިންމުމާ ގުޅިގެން، ކުންފުނީގެ އުސޫލުގެ ދަށުން 2025 ޑިސެންބަރު 19 އިން ފެށިގެން އިންތިޚާބުގެ ވަގުތީ ނަތީޖާ އިޢުލާނުކުރުމާ ހަމައަށް މުސާރަ ލިބޭގޮތަށް އޭނާ ހުރީ ސަސްޕެންޝަންގައި ކަމަށެވެ. އަދި އިންތިޚާބަށްފަހު އެ ސަސްޕެންޝަން އުވާލާފައިވާ ކަމަށް ބުނެފައިވެ އެވެ. ނަމަވެސް، ޕްރައިވެޓައިޒޭޝަން އެންޑް ކޯޕަރޭޓައިޒޭޝަން ބޯޑު (ޕީސީބީ) ގެ އެންގުމާ އެއްގޮތަށް ކުންފުނީގެ ހިންގުން ހަރުދަނާކޮށް މުވައްޒަފުންގެ އަދަދު މަދުކުރުމުގެ ސިޔާސަތުގެ ދަށުން، 2026 މޭ 20 އިން ފެށިގެން އޭނާ ވަޒީފާ އިން ވަކިކޮށްފައިވާ ކަމަށް އެ ސިޓީގައި ބަޔާންކޮށްފައިވެ އެވެ.
މިކަމާ ގުޅޭގޮތުން "ރާއްޖެއެމްވީ" އަށް މަޢުލޫމާތު ދެމުން ސަމީހު ބުނީ، އޭނާ ރ. ރަސްމާދޫ ކައުންސިލް އިންތިޚާބުގައި ވާދަކުރީ ކުންފުނީގެ އުސޫލުތަކާ އެއްގޮތަށް ކަމަށެވެ. އިންތިޚާބުން ނާކާމިޔާބުވެއްޖެ ނަމަ އެކަން އެޗްއާރަށް އެންގުމުން އަލުން ވަޒީފާ ރުޖޫޢަވާނެ ކަމަށް ކުރިން ދީފައިވާ ލިޔުމުގައި އޮތް ނަމަވެސް، އިންތިޚާބަށްފަހު އޭނާ ހުށަހެޅި ސިޓީއަށް އެއްވެސް ޖަވާބެއް ނުދީ މަހަކަށްވުރެ ގިނަ ދުވަސް ވަންދެން ބޭއްވުމަށްފަހު، ކުއްލިއަކަށް ފޮނުވީ ވަޒީފާ އިން ވަކިކުރި ލިޔުން ކަމަށް އޭނާ ކިޔައިދިނެވެ.
ވެމްކޯ އެމްޑީގެ ނުފޫޒުން މުވައްޒަފަކު ވަޒީފާއަށް ނުނެރި މަޑުކުރުވަމުންދާކަމުގެ ތުހުމަތު!
މި މައްސަލައިގައި ކަންބޮޑުވުން ފާޅުކުރި ވެމްކޯގެ އެހެން މުވައްޒަފަކު ބުނީ، ސަމީހަކީ ވޭތުވެދިޔަ 8 އަހަރު ދުވަހު އެ ކުންފުނީގައި ނަމޫނާ މަސައްކަތްތަކެއް ކުރި މުވައްޒަފެއް ކަމަށެވެ. އަދި މުވައްޒަފުންގެ ފެންވަރު ބަލާ އެޕްރައިޒަލްތަކުން ކޮންމެ ފަހަރަކުވެސް އެންމެ މަތީ މާކްސް ހޯދަނީ ސަމީހު ކަމަށްވާއިރު، ހަރަދު ކުޑަކުރުމުގެ ނަމުގައި އެފަދަ ގާބިލް މުވައްޒަފަކު ވަކިކުރުމަކީ ބަލައިގަނެވޭނެ ކަމެއް ނޫން ކަމަށް އޭނާ ބުންޏެވެ.
މީގެ އިތުރުން، ސަމީހު ސަސްޕެންޝަންގައި ހުރި މުއްދަތުގެ ތެރޭގައިވެސް ވަންދޫ ފެސިލިޓީއަށް އަލަށް 5 މީހަކު ވަޒީފާއަށް ނަގާފައިވާކަން އެ މުވައްޒަފު ފާހަގަކުރިއެވެ. އަދި މި ސަރުކާރު އައިފަހުން އެތަނަށް އަލަށް އައްޔަންކުރި 20 މުވައްޒަފުންގެ ތެރެއިން ގިނަ މީހުންނަކީ މަހަކު 15 ދުވަހުވެސް ވަޒީފާއަށް ހާޒިރުނުވާ މީހުން ކަމަށާއި، އެ މީހުންނާ މެދު ފިޔަވަޅު އެޅުމަށް ހެޑް އޮފީހަށް ފޮނުވާ ސިޓީތަކަށް އެއްވެސް ޖަވާބެއް ނުލިބޭ ކަމަށް އޭނާ ތުހުމަތު ކުރިއެވެ.
މި މުވައްޒަފު އިތުރަށް ބުނި ގޮތުގައި، ވަޒީފާއަށް ނުކުމެ މަސައްކަތް ނުކުރާ މީހުންނަށް ފިޔަވަޅު ނޭޅި ސަމީހު ފަދަ މުވައްޒަފުން ވަކިކުރަމުންދަނީ ސިޔާސީ ނުފޫޒުންނެވެ. އެގޮތުން މިހާރު އެތަނުގައި ތިބި ގިނަ މުވައްޒަފުންނަކީ ޕީއެންސީގެ ޕީޖީ ލީޑަރު އިބްރާހިމް ފަލާހުގެ ނުފޫޒުން ވަޒީފާ ދީފައިވާ ބައެއް ކަމަށްވެސް އޭނާ ވަނީ ތުހުމަތު ކޮށްފަ އެވެ. އަދި އެ މުވައްޒަފުންނާ ދޭތޭރޭ ފިޔަވަޅެއް ނާޅާ، ރަގަޅަށް މަސައްކަތްކުރާ މުވައްޒަފުން މިގޮތަށް ވަކި ކުރުމަކީ ސަރުކާރުން ނިކަމެތި ރައްޔިތުންނަށް ދޭ ވަރަށް ބޮޑު އަނިޔާ އެއް ކަމަށް އޭނާ ބުންޏެވެ.
