މިފްކޯގެ ސީއީއޯ އަދި އެމްޑީ އަކަށް، ޕީސީބީގެ ރައީސް ކަމުން އިސްތިއުފާދެއްވި އަނަސް އައްޔަންކޮށްފި
މިފްކޯގެ މެނޭޖިން ޑިރެކްޓަރުގެ މަގާމުން ފަރުހަތު ޝަހީރު އިސްތިއުފާ ދެއްވުމާ ގުޅިގެން، އެ މަގާމަށް ޕީސީބީގެ ކުރީގެ ރައީސް މުޙައްމަދު އަނަސް މިހާރު ވަނީ އައްޔަންކުރައްވާފަ. މީގެ ކުރިން ފައިނޭންސް މިނިސްޓްރީގެ ޑެޕިއުޓީ މިނިސްޓަރުކަން ވެސް ކުރެއްވި އަނަސް މި މަގާމާ ހަވާލުވެވަޑައިގަތީ، މަސްވެރިންނަށް ދޭންޖެހޭ ފައިސާ ނުލިބުމާއި ތެލާއި އައިސްގެ އަގު ބޮޑުވުމުގެ ޝަކުވާތައް އިތުރުވެފައިވާ ދަނޑިވަޅެއްގަ. ކުރު މުއްދަތެއްގެ ތެރޭގައި މިފްކޯގެ ހިންގުމަށް ތަކުރާރުކޮށް ބަދަލުތައް އަންނަމުންދާތީ، މަސްވެރިކަމުގެ ސިނާއަތަށް ދިމާވެފައިވާ ގޮންޖެހުންތަކަށް މި ބަދަލާއެކު ހައްލެއް ލިބޭނެތޯ ގިނަ ބަޔަކު އަންނަނީ ސުވާލު އުފައްދަމުން.
މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ)ގެ މެނޭޖިން ޑިރެކްޓަރު އަދި ޗީފް އެގްޒެކްޓިވް އޮފިސަރުގެ މަގާމަށް އައްޔަންކުރެެއްވި މުޙައްމަދު އަނަސް | ޕީސީބީ
މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ)ގެ މެނޭޖިން ޑިރެކްޓަރު އަދި ޗީފް އެގްޒެކްޓިވް އޮފިސަރުގެ މަގާމަށް، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ ރައީސްކަން ކުރެއްވި މުޙައްމަދު އަނަސް އައްޔަންކޮށްފި އެވެ.
ޕީސީބީ އިން ބުރާސްފަތި ދުވަހުގެ ރޭ ހާމަކުރި ގޮތުގައި، މިފްކޯގެ ހިންގުމާ ބުރާސްފަތި ދުވަހުން ފެށިގެން އަނަސް ވަނީ ރަސްމީކޮށް ހަވާލުވެވަޑައިގެންފަ އެވެ. މި މަގާމަށް އައްޔަންކުރެއްވުމުގެ ކުރިން އަނަސް ހުންނެވީ ސަރުކާރު ހިއްސާވާ ކުންފުނިތައް ބަލަހައްޓާ މައި އިދާރާ ކަމަށްވާ ޕީސީބީގެ ރައީސްގެ މަގާމުގަ އެވެ.
މިފްކޯގެ އެމްޑީގެ މަގާމުގައި އަނަސްގެ ކުރިން ހުންނެވީ ފަރުހަތު ޝަހީރެވެ. އޭނާ އެ މަގާމުން އިސްތިއުފާ ދެއްވީ މި މަހުގެ 12 ވަނަ ދުވަހު އެވެ. ފަރުހަތު މިފްކޯގެ ސީއީއޯގެ މަގާމަށް އައްޔަންކުރީ މިދިޔަ އަހަރުގެ މާޗު މަހުގެ ތެރޭގަ އެވެ. ފަރުހަތުގެ ކުރިން އެ މަގާމު ފުރުއްވީ ސްވިޒަލޭންޑަށް ނިސްބަތްވާ ޑރ. ލިއުބިމޮވް އެވެ. އޭގެ ކުރިން އެ މަގާމުގައި ހުންނެވީ މި ސަރުކާރުގައި އެކި ތުހުމަތުތަކަކާ ގުޅިގެން ދެ ފަހަރެއްގެ މަތިން މަގާމުން ވަކިކުރި އަހުމަދު ޝަމާހު އެވެ.
މިފްކޯގެ އެންމެ އިސް މަގާމާ ހަވާލުވެވަޑައިގެންނެވި އަނަސް އަކީ މީގެ ކުރިން ވެސް ސަރުކާރުގެ އިސް އެކި މަގާމުތަކެއް ފުރުއްވާފައިވާ ބޭފުޅެކެވެ. އެގޮތުން މިނިސްޓްރީ އޮފް ފައިނޭންސް އެންޑް ޕްލޭނިންގެ ޑެޕިއުޓީ މިނިސްޓަރުގެ މަގާމު ވެސް އޭނާ ވަނީ ފުރުއްވާފަ އެވެ.
މި ސަރުކާރުން މިފްކޯގެ ވެރިންގެ މަގާމަށް ކުރު މުއްދަތެއްގެ ތެރޭގައި ތަކުރާރުކޮށް ބަދަލުތައް ގެންނަމުންދާއިރު، މަސްވެރިންގެ ޝަކުވާތަކަށް އެދެވޭ ހައްލެއް ނުލިބޭތީ ގިނަ ބައެއްގެ ފާޑުކިޔުން ރައީސް ޑރ. މުޙައްމަދު މުއިއްޒަށް ވަނީ އަމާޒުވެފަ އެވެ. ޚާއްސަކޮށް މަސްވެރިން ބާނާ މަހަށް ރައީސް މުއިއްޒު ވެވަޑައިގެންނެވި ވައުދާ އެއްގޮތަށް ހަމަ އަގު ނުލިބުމާއި، މަސްވެރިންނަށް ބޭނުންވާ ތެލާއި އައިސް ހެޔޮ އަގުގައި ނުލިބުމަކީ މިއަދު ވެސް މަސްވެރިން ކުރަމުންދާ އެންމެ ބޮޑު ޝަކުވާ އެވެ.
