މިނިވަން މުއައްސަސާ ތަކަކީ ޕީއެންސީގެ ޖަގަހަ ތެރެއިން އޮޕަރޭޓް ކުރާ ތަންތަނަށް ހަދައިފި: މާޒް ސަލީމް
ސަރުކާރުން ސިޔާސީ ޕާޓީތަކުގެ ހަރަކާތްތައް ހުއްޓުވައި، ޕާޓީތަކަށް ދޭންޖެހޭ ފައިސާ ހިފަހައްޓަމުންދާ ކަމަށް ވިދާޅުވެ، މާޒް ސަލީމް ވަނީ ފަލާޙް ރައްޔިތުންނަށް މަލާމާތާއި ފުރައްސާރަ ކުރައްވާ ކަމަށް ވިދާޅުވެ ވަރަށް ބޮޑަށް ފާޑުވިދާޅުވެފަ. މި ފާޑުކިޔުންތައް އަމާޒުވީ އިދިކޮޅު ހަރަކާތްތަކަށް ފިޔަވަޅު ނޭޅޭނަމަ އިލެކްޝަންސް ކޮމިޝަނުގެ ވެރިން އިސްތިއުފާ ދޭން ޖެހޭނެ ކަމަށް ފަލާޙް ވިދާޅުވުމާ ގުޅިގެން.
ރާއްޖެ ޓީވީގެ ފަލަސުރުހީ ޕްރޮގްރާމްގައި މާޒް ސަލީމް ވާހަކަ ދައްކަވަނީ | ރާއްޖެ އެމްވީ
ރައީސް ޑރ. މުޙައްމަދު މުޢިއްޒުގެ ސަރުކާރުން ޤާނޫނުތަކަށް ބަދަލު ގެނެސްގެން، ރާއްޖޭގެ މިނިވަން މުއައްސަސާ ތަކަކީ ވެރިކަން ކުރާ ޕީއެންސީގެ ޖަގަހަ ތެރެއިން އޮޕަރޭޓް ކުރާ ތަންތަނަށް ހަދާފައިވާ ކަމަށް އެމްޑީޕީގެ ޤައުމީ މަޖިލިސް މެންބަރު އަޙްމަދު ސަލީމް (މާޒް ސަލީމް) ވިދާޅުވެއްޖެ އެވެ.
ރާއްޖެ ޓީވީގެ "ފަލަސުރުހީ" ޕްރޮގްރާމްގައި ވާހަކަ ދައްކަވަމުން މާޒް ސަލީމް ވިދާޅުވީ، ސިޔާސީ ޕާޓީތަކުން ހިންގާ ހަރަކާތްތައް ހުއްޓުވަން ޖެހޭނެ ކަމަށާއި، އެކަންކަން މިނިވަން މުއައްސަސާތަކުން ނުބަލާނަމަ އެ ތަންތަނުގެ ވެރިން އިސްތިއުފާ ދޭން ޖެހޭނެ ކަމަށް ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްރާހީމް ފަލާޙް ވިދާޅުވުމަކީ ހައިރާންވާންޖެހޭ ވަރުގެ ކަމެއް ނޫން ކަމަށެވެ. ސަބަބަކީ މިހާރު ވެސް ހުރިހާ މިނިވަން މުއައްސަސާތަކެއް މި ވަނީ ޤާނޫނަށް ބަދަލު ގެނެސްގެން ޕީއެންސީގެ ޖަގަހަ ތެރެއިން ހިންގާ ތަންތަނަށް ބަދަލުކޮށްފައިވާތީ ކަމަށް އޭނާ ތުހުމަތު ކުރެއްވި އެވެ.
އަޅުގަނޑުމެން މާ ބޮޑަކަށް ހާހެއްނުވޭ، ކަންބޮޑެއްނުވޭ... ފަލާޙު، ސިޔާސީ ޕާޓީތަކުން މި ހިންގާ ހަރަކާތްތައް ހުއްޓުވަންޖެހޭނެ ކަމާއި، އަދި މިނިވަން މުއައްސަސާތަކުން މިކަންކަން ބަލަންޖެހޭނެ ކަމާއި، ނުބަލާ ކަމުގައި ވަންޏާ، މިނިވަން މުއައްސަސާތަކުގެ ތިއްބެވި ބޭފުޅުން އިސްތިޢުފާދެއްވަންޖެހޭނެ ކަމެއް ވިދާޅުވުން. އެއީ، އެހެން އަޅުގަނޑު މި ދަންނަވަނީ، މި ހުރިހާ މިނިވަން މުއައްސަސާތައް ވެސް މި އޮތީ ގާނޫނުން ބަދަލުކޮށްފައި . ގާނޫނު ބަދަލުކުރެވޭނެ ކަންކަން ބަދަލުކޮށްފައި. މި އޮތީ ޕީއެންސީ ގެ ޖަގަހަތެރޭގައި ހިންގާ ތަންތަނަށް ހަދާފަ.އެމްޑީޕީގެ ޤައުމީ މަޖިލިސް މެންބަރު އަޙްމަދު ސަލީމް (މާޒް ސަލީމް)
ސަލީމް އިތުރަށް ވިދާޅުވީ، ސިޔާސީ ޕާޓީތަކުގެ މައިގަނޑު މަޤްޞަދަކީ ސަރުކާރު ޖަވާބުދާރީ ކުރުވުން ކަމަށާއި، ނަމަވެސް ސަރުކާރުން މިހާރު މަސައްކަތް ކުރަނީ ސިޔާސީ ޕާޓީތައް އުވާލައި، ބަންދުކުރުމަށް ކަމަށެވެ. އަދި ބައެއް ސިޔާސީ ޕާޓީތަކަށް ދައުލަތުން ދޭންޖެހޭ ފައިސާ ވެސް ސަރުކާރުން ހިފަހައްޓަމުންދާ ކަމަށް އޭނާ ވިދާޅުވި އެވެ.
މާޒް ސަލީމް ވަނީ ޕީއެންސީގެ ޕީޖީ ލީޑަރު ފަލާޙަށް ވަރަށް ބޮޑަށް ފާޑުވިދާޅުވެފަ އެވެ. އޭނާ ވިދާޅުވީ ފަލާޙަކީ ޕީއެންސީގެ ތެރޭގައި "އަޅުވާފައި ހުރި ފަންޏެއް" ކަމަށް ގަބޫލުކުރެވޭ ކަމަށާއި، މާލޭގެ ރައްޔިތުންނާއި ރާއްޖޭގެ އެކި ކަންކޮޅުތަކުގެ ރައްޔިތުންނަށް، ޚާއްޞަކޮށް ގޯތިގެދޮރުގެ މައްސަލައިގައި ފަލާޙް މަލާމާތާއި ފުރައްސާރަ ކުރައްވާފައިވާ ކަމަށެވެ. އަދި ފެންނަ ނުފެންނަ ވޯޓުން ރައްޔިތުންގެ 70 އިންސައްތަ ސަރުކާރަށް ބޮޑުތަނުން ނޫނެކޭ ބުނީވެސް، ފަލާހު މެންފަދަ މީހުން ރައްޔިތުންނަށް ކުރި ފުރައްސާރަތަކަށް ބިނާކޮށްކަމަށް ސަލީމް ވިދާޅުވި އެވެ.
ރައީސް މުޢިއްޒު އަށް ޙަޤީޤަތުގައި ޕާލަމެންޓްގެ ގުރޫޕަށް ލެވުނު އިރު، ފަލާޙު އަސްލު އަޅުގަނޑަށް ހީވަނީ އެނގިވަޑައި ނުގަންނަވަނީހެން. އެއީ ޙަޤީޤަތުގައިވެސް ރައްޔިތުންގެ މަޖިލީހުގެ ތެރޭގައި ނުވަތަ ޕީއެންސީ ގެ ތެރޭގައި އަޅުވާފައި ހުރި ފަންޏެއްގެ ގޮތުގައި އަޅުގަނޑުމެން ގަބޫލުކުރަނީ. އެއީ އެހެން އަޅުގަނޑު މި ދެންނެވީ ބައްލަވާ ދިވެހިރާއްޖޭގައި ފުރަ މާލޭގެ ރައްޔިތުންނަށް މަލާމާތްކުރި ވަރު؟ އަދި ރާއްޖޭގެ ކަންކޮޅު ތިބި ރައްޔިތުންނަށް މަލާމާތްކުރި ވަރު ފާޑުފާޑުގެ ވާހަކަ، ޚާއްޞަކޮށް މި ގޯތިގެދޮރުގެ މައްސަލައިގައި. ރައްޔިތުން ތިބި ނިކަމެތި ޙާލު އެތަނުގައި ބަޔާންކޮށް، މަލާމާތްކޮށް، ފުރައްސާރަކުރި ކުރުމުގެ މައްޗަށް ބިނާކޮށްދެއްތޯ. ރާއްޖޭގެ ރައްޔިތުން މި ފަހަރު ވޯޓު ދިނީ ހަތްދިހަ ޕަސެންޓުން ސަރުކާރަށް ނޫނެކޭ.އެމްޑީޕީގެ ޤައުމީ މަޖިލިސް މެންބަރު އަޙްމަދު ސަލީމް (މާޒް ސަލީމް)
މީގެ އިތުރުން، ސިޔާސީ ޕާޓީތަކުން ދައްކަނީ ސަރުކާރުން ކުރާ ވައްކަންތަކާއި، ކުފޫ ހަމަނުވާ ކަންތައްތަކުގެ ވާހަކަ ކަމަށާއި، އެކަންކަން ހުއްޓުވުމަށް މިނިވަން މުއައްސަސާތަކަށް ނުފޫޒު ފޯރުވުމަކީ ޑިމޮކްރަސީއާ ބީރައްޓެހި ކަމެއް ކަމަށް ވެސް އޭނާ ފާހަގަކުރެއް ވިއެވެ.
މި ވާހަކަތައް އަމާޒުވެފައިވަނީ އިދިކޮޅު ފަރާތްތަކުން މަގުމަތީގައި ހިންގާ ހަރަކާތްތަކަށް ފިޔަވަޅު ނޭޅޭނަމަ އިލެކްޝަންސް ކޮމިޝަނުގެ ވެރިން އިސްތިއުފާ ދޭން ޖެހޭނެ ކަމަށް ވިދާޅުވެ ވެރިކަން ކުރާ ޕީއެންސީ ގެ ޕާލަމެންޓްރީ ގްރޫޕުގެ ލީޑަރު އިބްރާހިމް ފަލާހު އިންޒާރު ދެއްވާފައިވާ ދަނޑިވަޅެއްގަ އެވެ. ފަލާހު މިހެން ވިދާޅުވީ އިދިކޮޅު ފަރާތްތަކުން މާލޭގައި ކުރިއަށް ގެންދާ މުޒާހަރާތަކަކީ ގާނޫނާ ހިލާފު ހަރަކާތްތަކެއް ކަމަށް ބުނެ، އެކަންކަން ހުއްޓުވައި ފިޔަވަޅު އެޅުމަށް ގޮވާލައި ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު މަޖިލީހަށް ހުށަހެޅުއްވި ގަރާރަށް ބަހުސް ކުރައްވަމުންނެވެ.
