މީކާއިލް ޗެއަރޕަރސަންކަމަށް އައުމަކީ ޕާޓީ ރަނގަޅަށް ރުކުރުވާލަން ލިބޭ ފުރުސަތެއް: ނާޒިލް
21 މެއި 2026 | ބުރާސްފަތި 13:34އެމްޑީޕީގެ ޗެއަރޕަރސަން ކަމަށް އެންމެ ބޮޑު ވާދަވެރިކަމެއް އޮތީ މީކާއިލް އާއި ކުރީގެ ރައީސް މުހައްމަދު ނަޝީދު އާއި ދެމެދު. މި އިންތިޚާބު އޮންނާނީ އަންނަ ޖޫން މަހު.
އެމްޑީޕީގެ ޕީޖީ ލީޑަރ އިބްރާހިމް ނާޒިލް | އެމްޑީޕީ
އެމްޑީޕީގެ ޗެއަރޕާސަން ކަމުގެ މަގާމަށް ވާދަކުރައްވާ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަޙްމަދު ނަސީމް، ޕާޓީގެ ޗެއަރޕަރސަންކަމަށް އައުމަކީ ޕާޓީ ރަނގަޅަށް ރުކުރުވާލަން ލިބޭ ފުރުސަތެއް ކަމަށް އެމްޑީޕީގެ ޕީޖީ ގްރޫޕްގެ ލީޑަރ އިބްރާހިމް ނާޒިލް ވިދާޅުވި އެވެ.
ޗެއަރޕަރސަން އިންތިޚާބުގައި މީކާއިލް އަށް ތާއީދު ހޯދުމަށް މިހާރު އަތޮޅު ތެރެއަށް ކުރަމުންދާ ދަތުރުގެ ތެރެއިން ރާއްޖެއެމްވީ އަށް ދެއްވި އިންޓަރވިއު އެއްގައި ނާޒިލް ވަނީ އެމްޑީޕީގެ ޗެއަރޕަރސަންގެ އިންތިޚާބު މީކައިލް ކާމިޔާބު ކުރާނެ ކަމުގެ އުއްމީދު ވަރަށް ބޮޑު ކަމަށް ވިދާޅުވެފަ އެވެ.
މީގެ އިތުރުން ޗެއަރޕަރސަންގެ އިންތިޚާބު މީކާއިލް ކާމިޔާބު ކުރުމަކީ އިންތިޚާބު ކާމިޔާބު ކުރުމަށް ޕާޓީ ރަނގަޅަށް ރާވާލަން ލިބޭ ބާރަކަށް ވާނެ ކަމަށް އޭނާ ވިދާޅުވި އެވެ. މީކާއިލްގެ މެނިފެސްޓޯ އަކީ ވަރަށް ސާފު މެނިފެސްޓޯ އެއް ކަމަށާއި ޕާޓީ އިތުރަށް ބާރަށް ހިންގާނެ ގޮތް މެނިފެސްޓޯ އިން ވަރަށް ބޮޑަށް ސާފުވާ ކަމަށް ނާޒިލް ވިދާޅުވި އެވެ.
"މީކާއިލް އަށް ވަރަށް ބޮޑަށް ތާއީދު ލިބެމުން ދަނީ. އުއްމީދު ވަރަށް ބޮޑު މި އިންތިޚާބު މީކާއިލް އަށް ކާމިޔާބު ކުރެވޭނެ ކަމުގެ." ނާޒިލް ވިދާޅުވި އެވެ.
އެމްޑީޕީގެ ޗެއަރޕަރސަން ކަމަށް އެންމެ ބޮޑު ވާދަވެރިކަމެއް އޮތީ މީކާއިލް އާއި ކުރީގެ ރައީސް މުހައްމަދު ނަޝީދު އާއި ދެމެދުގަ އެވެ. މި އިންތިޚާބު އޮންނާނީ އަންނަ ޖޫން މަހު އެވެ.
