އެމްޑީޕީގެ ލީޑަރޝިޕް އިތުރު ޖީލަކަށް ނުދެވޭ ނަމަ އަނެއްކާ ވެސް ގެއްލެނީ އިތުރު އެއް ޖީލަށް ޕާޓީގެ ލީޑަރޝިޕަށް އައުމުގެ ފުރުސަތު: ރައީސް ސޯލިހު
ރައީސް ނަޝީދަކީ ގިނަ ޚިދުމަތްތަކެއް ކުރައްވާފައިވާ ބޭފުޅެއް ކަމަށާއި، ނަމަވެސް މިއީ އެމަނިކުފާނު ޗެއަރޕާސަންގެ އިންތިޚާބުގައި ވާދަކުރައްވަންވީ ވަގުތު ނޫން ކަމަށް ރައީސް ސޯލިހު ވިދާޅުވި. ރައީސް ސޯލިހު ވިދާޅުވީ ގައުމު އިސްލާހުކުރުމަށްޓަކައި ޔުނައިޓެޑް ޑިމޮކްރެޓިކް ފްރޮންޓުން ފަށާފައިވާ މަސައްކަތުގައި ރައީސް ނަޝީދު ދެމިހުންނަވަން ޖެހޭ ކަމަށް.
ހިންނަވަރުގައި ރޭ ބޭއްވި އިިތުބާރު ކެމްޕެއިން ޖަލްސާގައި ކުރީގެ ރައީސް އިބްރާހިމް މުހައްމަދު ސޯލިހު . | އެމްޑީޕީ
އެމްޑީޕީގެ ލީޑަރޝިޕް އިތުރު ޖީލަކަށް ނުދެވޭ ނަމަ އަނެއްކާ ވެސް ގެއްލެނީ އިތުރު އެއް ޖީލަށް ޕާޓީގެ ލީޑަރޝިޕަށް އައުމުގެ ފުރުސަތު ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރައީސް ސޯލިހު އެފަދައިން ވިދާޅުވި ހިންނަވަރުގައި އޮތް އިތުބާރު ކެމްޕެއިން ޖަލްސާގައި ވާހަކަދައްކަވަމުންނެވެ. ދިގު 30 އަހަރުގެ ވެރިކަމުގެ ސަބަބުން ދެ ޖީލެއްގެ މޮޅެތި ލީޑަރުންނަށް ގައުމުގެ އެންމެ މަތީ މަގާމުތަކަށް އައުމުގެ ފުރުސަތު ގެއްލިގެން ދިޔަ ކަމަށް އެ މަނިކުފާނު ވިދާޅުވި އެވެ.
2028 ވަނަ އަހަރު ވޯޓުލާ އާބާދީގެ 40 އަށް ވުރެ ގިނަ އިންސައްތަ އަކީ ޒުވާނުން ކަމަށާއި އެމްޑީޕީގެ ބޮޑު އިންސައްތަ އެއް ހިއްސާކުރަނީ ވެސް ޒުވާނުން ކަމަށް ރައީސް ސޯލިހު ވަނީ ވިދާޅުވެފަ އެވެ. ރައްޔިތުންގެ މަޖިލީހުގެ މެމްބަރު މީކާއިލް އަހުމަދު ނަސީމް ނުކުމެ ހުންނެވީ ޒުވާނުންނާއި އެހެނިހެން ފަރާތްތަކަށް ޕާޓީގެ ތެރެއިން ރަނގަޅު ފުރުސަތުތަކެއް ލިބޭނެ މަގު ފަހިކޮށްދިނުމުގެ މެނިފެސްޓޯއަކާއި އެކުގައި ކަމަށް ވެސް ރައީސް ސޯލިހު ވިދާޅުވި އެވެ.
ރައީސް ނަޝީދު އަކީ ގިނަ ޚިދުމަތްތަކެއް ކުރައްވާފައިވާ ބޭފުޅެއް ކަމަށާއި މިއީ ރައީސް ނަޝީދު ޗެއަރޕަރސަންކަމުގެ އިންތިޚާބުގައި ވާދަކުރައްވަންވީ ވަގުތު ނޫން ކަމަށް ރައީސް ސޯލިހު ވިދާޅުވި އެވެ. މިއީ ގައުމު އިސްލާހުކުރުމަށްޓަކައި މިއަދު ކުރިމަތިވެފައި އޮތް މަސައްކަތްތައް ކުރުމަށްޓަކައި ޔުނައިޓެޑް ޑިމޮކްރެޓިކް ފްރޮންޓުގައި ތިން ރައީސުން ފެށި މަސައްކަތުގައި ރައީސް ނަޝީދު ދެމިހުންނަވަންވީ ވަގުތު ކަމަށް ރައީސް ސޯލިހު ވިދާޅުވި އެވެ.
" މި އަދު އަޅުގަނޑު މި ހުރީ މީކާއިލް އާއި އެކުގައި ނުކުމެ މީކާއިލް އަށް ތާއީދުކޮށްގެން. މާދަމާ ގޮސް އަޅުގަނޑު ހުންނާނީ ރައީސް ނަޝީދާއި އެކު މި ދެންނެވި މަސައްކަތް ކުރަން. އެކަން ކުރެވޭނެ އެގޮތަށް. " ރައީސް ސޯލިހު ވިދާޅުވި އެވެ.
30 އަހަރުގެ ދިގު ވެރިކަމުން ދިމާވި މައްސަލަތައް އެމްޑީޕީ އަށް ދިމާވާން ނޭދޭކަމަށް އެ މަނިކުފާނު ވަނީ ވިދާޅުވެފަ އެވެ. އަދި މިއަދު ނިންމާ ކޮންމެ ނިންމުމެއް ނިންމަން ވާނީ ވިސްނުމަށް ފަހު މާޒީ އިން ތަޖުރިބާ ހާސިލްކޮށްގެން ކަމަށް ރައީސް ސޯލިހު ވަނީ ވިދާޅުވެފަ އެވެ.
