ޓްރަމްޕްގެ ވަރުގަދަ އިންޒާރެއް އީރާން އަށް، "ސުލްޙަ ނުވެއްޖެ ނަމަ އެކައްޗެއް ވެސް ނުބަހައްޓާނަން!"

އެމެރިކާ އާއެކު ސުލްޙައިގެ އެއްބަސްވުމަކަށް ނުގޮސްފި ނަމަ، އީރާންގައި އެކައްޗެއް ވެސް ނުބަހައްޓާނެ ކަމަށް ވިދާޅުވެ އެމެރިކާގެ ރައީސް ޑޮނަލްޑް ޓްރަމްޕް ވަރުގަދަ އިންޒާރެއް ދެއްވައިފި އެވެ. 

ޓްރަމްޕްގެ ޓުރުތު ސޯޝަލް މީޑިއާގައި އޭނާ ލިޔުއްވާފައި ވަނީ، އީރާން އަށް އޮތް ވަގުތު ހަމަވަމުން އަންނަ ކަމަށާއި، އެ ޤައުމުން ވަރަށް އަވަސް އަރުވާލައިގެން ކަންކަން ކުރަން ޖެހޭ ކަމަށެވެ. އެހެން ނޫން ނަމަ، އީރާންގައި އެއްވެސް އެއްޗެއް ނުހުންނާނެ ކަމަަށް ޓްރަމްޕް އިންޒާރު ދެއްވި އެވެ. އެއާ އެކު ޓްރަމްޕް ވިދާޅުވީ، ވަގުތަކީ ވަރަށް މުހިންމު އެއްޗެއް ކަމަށެވެ. 

އެކްސިއޯސް ނޫހުން އާދީއްތަ ދުވަހު ރިޕޯޓު ކޮށްފައިވާ ގޮތުގައި، އަންގާރަ ދުވަހު ޤައުމީ ސަލާމަތާ ބެހޭ ކޮމެޓީއާ ޓްރަމްޕް ބައްދަލު ކުރައްވާނެ އެވެ. އެ ބައްދަލުވުމުގައި އެމެރިކާ އިން އީރާންއާ ދެކޮޅަށް އަޅާނެ އައު ފިޔަވަޅު ތަކަކާ ގުޅޭ ގޮތުން މަޝްވަރާ ކުރާނެ ކަމަށް ލަފާ ކުރެވެ އެވެ. އެކްސިއޯސް އިން މި ވާހަކަ ރިޕޯޓު ކޮށްފައި ވަނީ އެމެރިކާގެ ދެ އޮފިޝަލަކާ ހަވާލާދީ އެވެ. 

އެ ރިޕޯޓުގައި ބުނެފައިވާ ގޮތުން ޓްރަމްޕް ބޭނުން ވަނީ ހަނގުރާމަ ނިންމުމާއި، ހަމަޖެހުމަކަށް އައުމަށެވެ. ނަމަވެސް، އެމެރިކާގެ ގިނަ ކަންކަމަށް އީރާން އިން ދެކޮޅު ހެދުމާއި، އީރާން އިން ނިއުކްލިއާ ޕްރޮގްރާމްއާ ގުޅޭ ގޮތުން ގޮތް ދޫނުކުރުން ތަކެއް ގެންގުޅުމުގެ ސަބަބުން، އެމެރިކާ އިން އިތުރު ފިޔަވަޅު ތަކެއް އަޅަން ވިސްނާ ކަމަށް ބުނެފައިވެ އެވެ. 

އީރާންގެ ސަރުކާރާ ގުޅުން ހުރި މީޑިއާ ތަކުން އާދީއްތަ ދުވަހު ބުނެފައި ވަނީ، މަޝްވަރާ ތަަކަށް އީރާން އިން ހުށަހެޅި އެޖެންޑާ އަށް އެމެރިކާ އިން ދިން އެންމެ ފަހުގެ ޖަވާބުގައި އެއްވެސް ބުރަދަނެއް ހުރި ކަމެއް ނެތް ކަަމަށެވެ. 

އެކްސިއޯސް އިން އިތުރަށް ރިޕޯޓު ކޮށްފައިވާ ގޮތުގައި، އީރާންއާ ބެހޭ ގޮތުން މަޝްވަރާ ކުރުމަށް ޓްރަމްޕް ވަނީ އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫއާ ފޯނުން ވާހަކަ ދައްކަވައިފަ އެވެ. އިޒްރޭލްގެ ސަރުކާރުގެ ބްރޯޑްކާސްޓަރުން ރިޕޯޓު ކޮށްފައިވާ ގޮތުގައި، އެ ފޯނު ކޯލުގައި ޓްރަމްޕް އާއި ނަތަންޔާހޫ ވަނީ އީރާންއާ ދެކޮޅަށް އަލުން ފިޔަވަޅޫ އެޅުމާ ގުޅޭ ގޮތުން މަޝްވަރާ ކުރައްވައިފަ އެވެ.