ޓްރަމްޕް ޗައިނާ އަށް ވަޑައިގެންފި، ރަތް ދޫލައިގެ ފުރިހަމަ މަރުޙަބާއެއް

އެމެރިކާގެ ރައީސް ޑޮނަލްޑް ޓްރަމްޕް، ޗައިނާ އަށް ކުރައްވާ ރަސްމީ ދަތުރުފުޅުގައި އެ ޤައުމަށް ވަޑައިގެންފި އެވެ.

ބުދަ ދުވަހުގެ ވަގުތެއްގައި ޓްރަމްޕް ޗައިނާގެ ވެރި ރަށް ބެއިޖިން އަށް ވަޑައިގެންފައިވާއިރު، ޗައިނާ އިން ވަނީ ޓްރަމްޕް އަށް ރަތް ދޫލައިގެ ފުރިހަމަ މަރުޙަބާއެއް ދަންނަވައިފަ އެވެ. މިއީ އެމެރިކާގެ ރައީސް އަކު ފާއިތުވި 10 އަހަރު ދުވަހުގެ ތެރޭގައި ޗައިނާ އަށް ވަޑައިގެންނެވި ފުރަތަމަ ފަހަރެވެ. 

ޗައިނާ އަށް ޓްރަމްޕް ކުރައްވާ މި ދަތުރުފުޅުގައި، އެމެރިކާގެ ވިޔަފާރިތައް ޗައިނާ އަށް ހުޅުވާލުމަށް ޗައިނާގެ ރައީސް ޝީ ޖިންޕިންއާ މަޝްވަރާތައް ކުރައްވާނެ އެވެ. އަދި އެމެރިކާ އިން އީރާންއާ ދެކޮޅަށް ކުރަމުން އަންނަ ހަނގުރާމައާ ގުޅޭ ގޮތުން ވެސް ޓްރަމްޕް އާއި ޝީ ޖިންޕިން މަޝްވަރާ ކުރައްވާނެ އެވެ. 

ޓްރަމްޕްގެ ދަތުރުފުޅުގައި އޭނާގެ އަރިހުގައި ޗައިނާ އަށް ވަޑައިގެންނެވީ އެންވީޑިއާގެ ޖެންސަން ހުއާންގް އަދި ވިޔަފާރި ވެރިޔާ އީލޮން މަސްކް ހިމެނޭ ބޮޑު ވަފުދެކެވެ. މިއީ ޓްރަމްޕް އާއި މަސްކްއާ ދެމެދު މައްސަލަ ޖެހުނު ފަހުން، ޓްރަމްޕްގެ އަރިހުގައި މަސްކް މިފަދަ ދަތުރެއްގައި ބައިވެރިވާ ފުރަތަމަ ފަހަަރެވެ. 

އެއާފޯސް ވަން އިން ޓްރަމްޕް ފައިބައި ވަޑައިގެންނެވުމާ އެކު، ޗައިނާގެ އިސްވެރިންނާއި، ސިފައިން ވަނީ އޭނާ އަށް މަރުޙަބާ ދަންނަަވައިފަ އެވެ. މީގެ އިތުރުން އެމެރިކާ އާއި ޗައިނާގެ ދިދަ ހިފައިގެން ތިބި ދަރިވަރުން ވަނީ ޓްރަމްޕް އަށް މަރުޙަބާ ދެންނެވުމަށް ޚާއްސަ ހަރަކާތެއް ވެސް ކުރިއަށް ގެންގޮސްފަ އެވެ. 

ޓްރަމްޕްގެ އަރިހުގައި ވަޑައިގަތް ވިޔަފާރީ ވެރިންގެ ތެރޭގައި ޗައިނާ އާއެކު ވިޔަފާރީގެ މައްސަލަތައް ހައްލު ކުރުމަށް ބޭނުންވާ ކުންފުނި ތަކުގެ އިސްވެރިން ހިމެނެ އެވެ. އެންވީޑިއާ އަކީ ޗައިނާގައި ބާރުގަދަ އެޗް200 ހުނަރުވެރި ސިކުނޑި ޗިޕްސް ވިއްކުމުގެ ހުއްދަ ހޯދުމަށް މަސައްކަތް ކުރަމުން އަންނަ ކުންފުންޏެކެވެ. 

ޓްރަމްޕް ޗައިނާ އަށް ވަޑައިގެންނެވިއިރު، އީރާންއާ ދެކޮޅަށް ކުރަމުން އަންނަ ހަނގުރާމަ ނިންމުމަށް ކުރަމުން އައި މަސައްކަތް ވަނީ ނާކާމިޔާބުވެފަ އެވެ. އީރާން އާއި ޗައިނާ އަކީ ވަރަށް ގާތް ގުޅުމެއް އޮންނަ ދެ ޤައުމު ކަމަށްވާއިރު، ޓްރަމްޕް ވިދާޅުވީ އީރާން ހަނގުރާމައިގައި ޗައިނާގެ އެއްވެސް އެހީތެރި ކަމެއް ބޭނުން ނުވާ ކަމަށެވެ.