ރޫބިއޯ ޕޯސްޓު ކުރެއްވި ކެމްޕެއިން ސްޓައިލްގެ ވީޑިއޯ އާއެކު، ރިޔާސީ ރޭހަށް އޭނާ ނިކުންނަވާ ކަމުގެ އަޑުތައް ގަދަވެއްޖެ

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ، 2028 ވަނަ އަހަރުގެ ރިޔާސީ އިންތިޚާބުގައި ވާދަ ކުރައްވާނެ ކަމުގެ އަޑުތައް ގަދަވެއްޖެ އެވެ.

މި އަޑުތައް ގަދަވެފައި ވަނީ، ރޫބިއޯ އޭނާގެ އެކްސް އެކައުންޓުގައި ޕޯސްޓު ކުރެއްވި ވީޑިއޯއެއްގެ ސަބަބުންނެވެ. އެމެރިކާއާ މެދު އުންމީދީ ތަސައްވުރެއް ހުށަހަޅައިދޭ މި ވީޑިއޯ އަކީ، ރޫބިއޯގެ ރިޔާސީ ކެމްޕެއިން ނުރަސްމީކޮށް ފެށުން ކަމަށް ގިނަ ބަޔަކު އަންނަނީ ސިފަ ކުރަމުންނެވެ. އެ ވީޑިއޯ އަކީ، ކެމްޕެއިން ސްޓައިލެއްގެ ވީޑިއޯ ކަމަށް ގިނަ ބަޔަކު އަންނަނީ ބުނަމުންނެވެ. 

އެއް މިނެޓުގެ އެ ވީޑިއޯގައި ރޫބިއޯގެ އިތުރުން، އެމެރިކާގެ ރައީސް ޑޮނަލްޑް ޓްރަމްޕް ވެސް ފެނެ އެވެ. އަދި އެމެރިކާގެ ރިޔާސީ ގަނޑުވަރު، ވައިޓް ހައުސްގެ މަތިން އުދުހޭ ޖެޓުތަކާއި، އެކި ނަސްލު ތަކުގެ އެމެރިކާ ރައްޔިތުންނާއި، ކުރީގެ ރައީސް ރޮނަލްޑް ރޭގަންގެ ފޮޓޯތައް އެ ވީޑިއޯގައި ހިމަނާފައިވެ އެވެ. 

މި ވީޑިއޯގައި ބޭނުން ކޮށްފައިވާ އޯޑިއޯ އަކީ މިދިޔަ ހަފުތާގައި ވައިޓް ހައުސްގައި އޮތް ނޫސްވެރިންގެ ބައްދަލުވުމުގައި ރޫބިއޯ ދެއްކެވި ވާހަކަފުޅެކެވެ. އެ ދުވަހުގެ ނޫސްވެރިންގެ ބައްދަލުވުމުގައި ރޫބިއޯ ބައިވެރިވެ ވަޑައިގެންފައި ވަނީ، ވައިޓް ހައުސްގެ ޕްރެސް ސެކްރެޓަރީ ކެރޮލިން ލެވިޓް ވިހެއުމުގެ ޗުއްޓީގައި ހުންނެވުމުގެ ސަބަބުންނެވެ. 

ނޫސްވެރިޔަކު ކުރި ސުވާލަށް ޖަވާބު ދެއްވަމުން ރޫބިއޯ ވިދާޅުވީ، އެމެރިކާ އަކީ ކޮންމެ ތަނަކުން އައި ކޮންމެ މީހަކަށް ވެސް، އެ މީހެއްގެ ނަސްލަށް ނުވަތަ އުފަންވީ ޙާލަތަށް ބެލުމެއް ނެތި، ކާމިޔާބީއާ ހަމައަށް ވާސިލުވެވޭނެ ތަނަކަށް ވުމަކީ އަބަދު ވެސް އޭނާ އުންމީދު ކަމަށެވެ. އެމެރިކާގެ ތާރީޚަކީ ފުރިހަމަ ތާރީޚެއް ނޫން ނަމަވެސް، އެއީ އެހެން ކޮންމެ ޤައުމަކަށް ވުރެ ރަނގަޅު އަދި މެދު ނުކެނޑި އިސްލާޙު ވަމުންދާ ތާރީޚެއް ކަމަށް އޭނާ ފާހަގަ ކުރެއްވި އެވެ. އަދި ކޮންމެ ޖީލަކުން ވެސް މަސައްކަތް ކުރަނީ އަންނަން އޮތް ޖީލަށް މިނިވަން، ތަނަވަސް އަދި ރައްކާތެރި ޤައުމެއް ފޮރުކޯށްދިނުމަށް ކަމަށް ވެސް ރޫބިއޯ ވިދާޅުވެފައިވެ އެވެ. 

މި ވާހަކަތަކާ ގުޅިގެން ސޯޝަލް މީޑިއާގައި މިކަަމަށް ބޮޑު ސަމާލު ކަމެއް އަދި ތަރުހީބެއް ލިބެމުންދާއިރު، މަހުޖަނު އީލޮން މަސްކް ވެސް ވަނީ މި ވީޑިއޯ ހިއްސާ ކޮށްފަ އެވެ. ބައެއް އެކްޓަރުންނާއި، ސިޔާސީ ދާއިރާގެ ބޭފުޅުން ވިދާޅުވަމުން ގެންދަވަނީ، ރޫބިއޯ އަކީ އެމެެރިކާގެ ދެން އޮތް ރިޔާސީ ދައުރުގެ ރައީސް ކަމަށެވެ. ފްލޮރިޑާގެ ކުރީގެ ސެނެޓަރު ރޫބިއޯ ވަނީ، 2016 ވަނަ އަހަރުގެ ރިޔާސީ އިންތިޚާބުގައި ވާދަ ކުރައްވަން މަސައްކަތް ކުރައްވާފަ އެވެ. އެފަހަރު އޭނާ އަށް ނާކާމިޔާބާ ކުރިމަތިލައްވަން ޖެހުނު ނަމަވެސް، ފާއިތުވި 10 އަހަރުގެ ތެރޭގައި އޭނާގެ މަޤުބޫލުކަން އިތުރު ވަމުން އަންނަ ކަމަށް ބައެއް ފަރާތްތަކުން ދެކެ އެވެ. 

މިދިޔަ މާޗު މަހު ބޭއްވި ކޮންޒަވޭޓިވް ޕޮލިޓިކަލް އެކްޝަން ކޮންފަރެންސް (ސީޕީއޭސީ)ގެ ސާވޭ އަކުން ދައްކާ ގޮތުގައި، 2028 ވަނަ އަހަރުގެ ރިޔާސީ އިންތިޚާބަށް ރިޕަބްލިކަން ޕާޓީ އިން ބާއްވާ ރިޔާސީ ޕްރައިމަރީގައި، މިހާރުގެ ނައިބު ރައީސް ޖޭޑީ ވޭންސް އަށް 53 އިންސައްތަ ތާއީދު އެބަ އޮތެވެ. އަދި ރޫބިއޯ އަށް 35 އިންސައްތަ ތާއީދު އެބަ އޮތެވެ. ނަމަވެސް، އީރާން ހަނގުރާމައާ ގުޅިގެން ޓްރަމްޕް އާއި އޭނާގެ ނައިބު ރައީސް ވޭންސްއާ ދެމެދު ޚިޔާލު ތަފާތުވުން ތަކެއް އޮތް ކަމަށް ރިޕޯޓުތައް ބުނެ އެވެ. 

ރޫބިއޯގެ މި ވާހަކަ ތަކަށް ބައެއް ފަރާތްތަކުން ވަނީ ފާޑު ކިޔުން ވެސް ކުރިމަތި ކޮށްފަ އެވެ. ކޮންގްރެސްގެ ކުރީގެ މެމްބަރު ޖޯ ވޯލްޝް ވިދާޅުވީ، ރޫބިއޯ އެ ވިދާޅުވާ އުންމީދީ ވާހަކަ ތަކާއި ޓްރަމްޕްގެ ސިޔާސަތުތަކާ ދިމާ ނުވާ ކަމަށެވެ. އަދި ޑިމޮކްރަސީ އަށް މަސައްކަތް ކުރާ ގޭރީ ކަސްޕަރޯވް ވިދާޅުވީ، ރޫބިއޯ އަކީ ފަންނީ ބޭފުޅެއް ނަމަވެސް، ޚިދުމަތް ކުރައްވަނީ އޭނާ އެ ވިދާޅުވާ ހުވަފެން ތަކަށް ހުރަސް އަޅާ ސަރުކާރަކަށް ކަމަށެވެ. މި ހުރިހާ ފާޑު ކިޔުންތަކާ އެކު ވެސް، ރޫބިއޯ ފެންނަނީ ޓްރަމްޕްގެ ސަރުކާރުގެ އެންމެ ނުފޫޒު ގަދަ ވަޒީރުގެ ގޮތުގަ އެވެ. 

2028 ވަނަ އަހަރު އޮންނަ ރިޔާސީ އިންތިޚާބުގައި ޓްރަމްޕް އަށް ވާދަ ކުރުމުގެ ފުރުސަތެއް ނޯންނާނެ އެވެ. އެމެރިކާގެ ޤާނޫނު އަސާސީ ބުނާ ގޮތުގައި، ދެ ދައުރަށް ވުރެ ގިނަ ދައުރު އެއްވެސް ބޭފުޅަކަށް ވެރިކަމެއް ނުކުރެވޭނެ އެވެ. މިއީ ޓްރަމްޕްގެ ރިޔާސީ ދެ ވަނަ ދައުރު ކަމަށްވާއިރު، 2028 ވަނަ އަހަރުގެ ރިޔާސީ އިންތިޚާބުގައި ރިޕަބްލިކަން ޕާޓީ އިން ވާދަ ކުރައްވާނީ އައު ކެންޑިޑޭޓެކެވެ.