ހޮރްމޫޒް ކަނޑު އޮޅީގެ މައްސަލައިގައި އެމެރިކާ އާއި ޗައިނާ އެއްބަސްވުމަކަށް

އީރާން އިން ބަންދު ކޮށްފައިވާ ހޮރްމޫޒް ކަނޑު އޮޅީގެ މައްސަލައިގައި އެމެރިކާ އާއި ޗައިނާ އިން އެއްބަސްވުމަކަށް އައިސްފައިވާ ކަަމަށް ހާމަ ކޮށްފި އެވެ. 

މިކަން ހާމަ ކޮށްފައި ވަނީ އެމެރިކާގެ ސްޓޭޓް ޑިޕާޓްމަންޓް އިންނެވެ. އެގޮތުން އެއްވެސް ޤައުމަަކަށް ހޮރްމޫޒް ކަނޑު އޮޅި ފަދަ ބައިނަލްއަޤުވާމީ ކަނޑު ދަތުރު ފަތުރުގެ ސަރަހައްދު ތަކުން ފީ ނެގުމުގެ ފުރުސަތު ނުދެވޭނެ ކަމަށް، ދެ ޤައުމުގެ ބައެއް އޮފިޝަލުން އެއްބަސްވެފައިވާ ކަމަށް ސްޓޭޓް ޑިޕާޓްމަންޓް އިން ބުނެފައިވެ އެވެ. 

މި އެއްބަސްވުމަކަށް ދެ ޤައުމުން ވެސް އައިސްފައި މި ވަނީ، އެމެރިކާގެ ރައީސް ޑޮނަލްޑް ޓްރަމްޕް އާއި ޗައިނާގެ ރައީސް ޝީ ޖިންޕިން ބައްދަލު ކުރެއްވުމަށް ހަމަޖެހިފައި ވަނިކޮށެވެ. މި ބައްދަލުވުމުގައި އީރާން އިން ހޮރްމޫޒް ކަނޑު އޮޅި ކޮންޓްރޯލް ކުރަމުން ގެންދާ މައްސަލައިގައި މަޝްވަރާ ކުރާނެ ކަމަށް ބެލެވެ އެވެ. 

މިދިޔަ ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލް އިން އީރާންއާ ދެކޮޅަށް ފެށި ހަނގުރާމައިގެ ސަބަބުން، އީރާން އިން ވަނީ ހޮރްމޫޒް ކަނޑު އޮޅި ބަންދު ކޮށްފަ އެވެ. އެކަމުގެ ސަބަބުން ދުނިޔޭގެ ހަކަތައިގެ ބާޒާރަށް ވަނީ ބޮޑު ނުތަނަވަސް ކަމެއް ކުރިމަތިވެފަ އެވެ. 

ސްޓޭޓް ޑިޕާޓްމަންޓް އިން ބުނެފައިވާ ގޮތުގައި ޗައިނާގެ ފޮރިން މިނިސްޓަރު ވާންގް ޔީ އާއި، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ މިދިޔަ އޭޕްރީލް މަހުގެ ތެރޭގައި ކުރި ފޯނު ކޯލުގައި ވަނީ އެ މައްސަލަ އަށް މަޝްވަރާ ކުރައްވައިފަ އެވެ. ސްޓޭޓް ޑިޕާޓްމަންޓުގެ ތަރުޖަމާނު ޓޮމީ ޕިގޮޓް ބުނެފައިވާ ގޮތުގައި، ހޮރްމޫޒް ކަނޑު އޮޅި ފަދަ ބައިނަލްއަޤުވާމީ ކަނޑު ދަތުރު ފަތުރުގެ ސަރަހައްދު ތަކުން ދަތުރު ކުރުމަށް އެއްވެސް ޤައުމަކަށް ނުވަތަ ޖަމާއަތަކަށް ފީ ނެގުމުގެ ފުރުސަތު ނުދެވޭނެ ކަަމަށް ދެ ބޭފުޅުން ވެސް ވަނީ އެއްބަސްވެފަ އެވެ. 

ޗައިނާގެ އެމްބަސީ އިން ވެސް އެމެރިކާގެ ބަޔާނާ ދެކޮޅު ހަދާފައި ނުވެ އެވެ. އެމްބަސީގެ ތަރުޖަމާނު ލިއު ޕެންގިޔޫ ބުނެފައިވާ ގޮތުގައި ހޮރްމޫޒް ކަނޑު އޮޅީގެ ދަތުރު އާންމު ޙާލަތަކަށް އަނބުރާ ގެނައުމަށް ހުރިހާ ފަރާތް ތަކަކުން އެކުގައި މަސައްކަތް ކުރުމަކީ އެދެވޭ ގޮތެކެވެ.