ހަނގުރާމަ ހުއްޓާލުމުގެ އުންމީދު އައު ވެފައި ވަނިކޮށް، ހޮރްމޫޒް ކަނޑު އޮޅިން ޗައިނާގެ ދެ ޓޭންކަރެއް ހުރަސްކޮށްފި

އެމެރިކާ އާއި އީރާާންއާ ދެމެދު އުފެދިފައިވާ ހަމަނުޖެހުން ތަކަށް ސުލްޙަވެރި ޙައްލެއް ލިބިދާނެ ކަމުގެ އުންމީދު ބޮޑުވެފައިވާ ދަނޑިވަޅެއްގައި، ތެޔޮ ބަރު ކޮށްގެން ދަތުރު ކުރި ޗައިނާގެ ދެ ޓޭންކަރެއް ބުދަ ދުވަހު ހޮރްމޫޒް ކަނޑު އޮޅިން ބޭރުވެއްޖެ އެވެ. 

ޝިޕިން ޑޭޓާ ތަކުން ދައްކާ ގޮތުގައި ގާތް ގަނޑަކަށް ހަތަރު މިލިއަން ފީފާގެ ސާފު ނުކުރާ ތެޔޮ ހިފައިގެން މި ދެ އުޅަނދު ކަނޑު އޮޅި ހުރަސްކޮށްފައި މި ވަނީ، މަސްރަހު ފިނި ކުރުމަށް އެމެރިކާގެ ރައީސް ޑޮނަލްޑް ޓްރަމްޕް އާއި، ނައިބު ރައީސް ޖޭޑީ ވޭންސް ދެއްކެވި ވާހަކަ ތަކަށް ފަހު އެވެ. 

ވައިޓް ހައުސްގައި ނޫސްވެރިންނާ ވާހަކަ ދައްކަވަމުން އެމެރިކާގެ ރައީސް ޓްރަމްޕް ވިދާޅުވީ، އީރާން އާއެކު ކުރިއަށްދާ ހަނގުރާމަ ވަރަށް އަވަހަށް ނިމުމަކަށް އަންނާނެ ކަމަށެވެ. އަދި ހަމަނުޖެހުންތައް ހުއްޓާލުމަށް އީރާން އިން ހުށަހަޅާފައިވާ އައު ހުށަހެޅުމަކާ ގުޅިގެން، އަލުން ހަމަލާ ދޭން ނިންމާފައި އޮތް އޮތުން މަޑުޖައްސާލާފައިވާ ކަމަށް ވެސް ޓްރަމްޕް ވިދާޅުވި އެވެ. 

ޓްރަމްޕް ވިދާޅުވި ގޮތުގައި އީރާންގެ ވެރިން މިހާރު ތިއްބެވީ އެއްބަސްވުމަކަށް އައުމަށް ވަރަށް ބޮޑަށް ބޭނުންވެފަ އެވެ. ނަމަވެސް، ވަކި މުއްދަތެއްގެ ތެރޭގައި އެއްބަސްވުމަކަށް ނާދެވިއްޖެ ނަމަ، ކުރިއަށް އޮތް ދުވަސް ތަކުގައި އެމެރިކާ އިން ވަރުގަދަ ހަމަލާ ތަކެއް ދޭނެ ކަމުގެ އިންޒާރު ވެސް އޭނާ ވަނީ ދެއްވައިފަ އެވެ. 

މި މަޝްވަރާތަކާ ގުޅޭ ގޮތުން އެމެރިކާގެ ނައިބު ރައީސް ވޭންސް ވިދާޅުވީ، މަޝްވަރާ ތަކުގައި އެދެވޭ ކުރިއެރުން ތަކެއް ލިބެމުންދާ ކަމަށާއި، މިހާރު އޮތީ ވަރަށް އުންމީދީ ޙާލަތެއް ކަމަށެވެ. އެމެރިކާ އާއި އިޒްރޭލް ގުޅިގެން އީރާންއާ ދެކޮޅަށް ފެށި މި ހަނގުރާމަ އަށް ތިން މަސް ވާން ކައިރިވާއިރު، ހަނގުރާމަ ހުއްޓާލުމަށް އެމެރިކާގެ ސަރުކާރުން ވަނީ ގިނަ މަސައްކަތް ތަކެއް ކުރަމުންނެވެ. 

އެމެރިކާގެ ރައީސް ޓްރަމްޕް އަށް މިވަގުތު އެތެރެވަރީގެ ސިޔާސީ ބޮޑު ފިއްތުން ތަކެއް ކުރިމަތި ވެފައި ވަނީ، ދުނިޔޭގެ ބާޒާރަށް ތެޔޮ ސަޕްލައި ކުރާ މައި މަގު ކަމަށްވާ ހޮރްމޫޒް ކަނޑު އޮޅި ބަންދުވުމާ ގުޅިގެންނެވެ. މި ހަނގުރާމައިގެ ސަބަބުން ދުނިޔޭގެ ހަކަތައިގެ ބާޒާރަށް މީގެ ކުރިން ދުވަހަކު ވެސް ކުރިމަތި ނުވާ ވަރުގެ ބޮޑު ހުރަސް ތަކެއް ކުރިމަތިވެ، އެތައް ސަތޭކަ ޓޭންކަރެއް ވަނީ ގަލްފު ސަަރަހައްދުން ނުނިކުމެވި ތާށިވެފަ އެވެ. މީގެ އިތުރުން ސަރަހައްދުގެ ބައެއް ތެޔޮ ވަސީލަތް ތަަކަށް ވަނީ ގެއްލުން ލިބިފަ އެވެ. 

އެމެރިކާގައި ތެލުގެ އަގު އިންތިހާ އަށް އުފުލިފައިވާއިރު، އަންނަ ނޮވެމްބަރު މަހު އޮންނަ މިޑް ޓާމް އިންތިޚާބު ގާތް ވަމުން އަންނައިރު، ޓްރަމްޕް އަށް އޮތް ތާއީދު ދަށްވަމުން ދިޔުމަކީ އީރާން އާއެކު އަވަސް އެއްބަސްވުމަކަށް އައުމަށް އެމެރިކާ އަށް މަޖުބޫރުވެފައިވާ ސަބަބު ތަކެވެ. މި އުންމީދީ ޚަބަރުތަކާ އެކު ދުނިޔޭގެ ބާޒާރުގައި ތެލުގެ އަގު ވަނީ ކޮންމެ ވެސް ވަރަކަށް ދަށަށް ދާން ފަށައިފަ އެވެ. އެގޮތުން ބްރެންޓް ކްރޫޑް ފީފާއެއްގެ އަގު 110.16 އެމެރިކާ ޑޮލަރަށް ވެއްޓުނު ނަމަވެސް، ފަހުން ވަނީ އަގު ކުޑަކޮށް މައްޗަށް ޖެހިލައިފަ އެވެ. 

ފުޖިޓޯމީ ސެކިއުރިޓީޒްގެ އެނަލިސްޓް ތޮޝިޓަކާ ތަޒާވާ ވިދާޅުވި ގޮތުގައި، އިންވެސްޓަރުން މިހާރު ބަލަމުން ދަނީ އެމެރިކާ އާއި އީރާންއާ ދެމެދު ހަގީގީ ސުލްހައިގެ އެއްބަސްވުމަކަށް އާދެވިދާނެތޯ އެވެ. ނަމަވެސް އެމެރިކާގެ ސިޔާސަތު ކޮންމެ ދުވަހަކު ބަދަލުވަމުން ދާތީ، މަސްރަހު އޮތީ އަދިވެސް ނުތަނަވަސް ކަމެއްގެ ތެރޭގަ އެވެ.