އީރާންގެ އަސްކަރީ ޤާބިލުކަން ވަރަށް ބޮޑަށް ދަށްކޮށްލާފައިވާ ކަމަށް އެމެރިކާގެ ސެންޓްކޮމް އިން ބުނެފި

އެމެރިކާ އިން އީރާންގެ އަސްކަރީ ޤާބިލުކަން ވަރަށް ބޮޑަށް ދަށްކޮށްލާފައިވާ ކަމަށް، އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ހާމަ ކޮށްފި އެވެ. 

އަލް އަރަބިއްޔާ ނޫހަށް ދެއްވި ޚާއްސަ އިންޓަވިޔުއެއްގައި ސެންޓްކޮމްގެ ތަރުޖަމާނު ކެޕްޓާން ޓިމް ހޯކިންސް ވިދާޅުވީ، އީރާންއާ ދެކޮޅަށް އެމެރިކާ އިން ކުރިއަށް ގެންދާ އަސްކަރީ އޮޕަރޭޝަން ތަކަކީ ވަރަށް ކާމިޔާބު އޮޕަރޭޝަން ތަކެއް ކަމަށެވެ. އަދި އީރާންއާ ދެކޮޅަށް ކުރިމަތިލުންތައް ފެށުނުއިރު، ކަނޑައެޅި އަސްކަރީ ލަނޑު ދަނޑިތައް މިހާރު ހާސިލު ކުރެވިފައިވާ ކަމަށް ވެސް އޭނާ ވިދާޅުވި އެވެ. 

ހޯކިންސް ވިދާޅުވި ގޮތުގައި، އެމެރިކާގެ ހަމަލާ ތަކުގައި އީރާންގެ އަސްކަރީ އުފެއްދުންތައް އުފައްދާ މަރުކަޒު ތަކާއި، މިސައިލް އާއި ޑްރޯން ފޮނުވުމުގެ ޤާބިލުކަން ވަނީ ވަރަށް ބޮޑަށް ދަށްކޮށްލައިފަ އެވެ. އީރާން އަކީ ކުރިން އޮތް ފަދަ ނުރައްކަލެއް ނޫން ކަމަށާއި، ސަރަހައްދީ ބައިވެރިންނާ ގުޅިގެން ވައިގެ ދިފާއީ ނިޒާމުތައް ވަރުގަދަ ކޮށްފައިވާ ކަމަށް ވެސް އޭނާ ފާހަގަ ކުރެއްވި އެވެ. 

މީގެ އިތުރުން އީރާން އިން އާންމުންނަށް އަމާޒުކޮށް ގަސްދުގައި ހަމަލާ ދޭ ކަމަށާއި، މިސައިލްތައް ފޮނުވަނީ މީހުން ގިނައިން ދިރިއުޅޭ ސަރަހައްދު ތަކުން ކަމަށް ވެސް ހޯކިންސް ވަނީ ތުހުމަތު ކުރައްވައިފަ އެވެ. 

ހޮރްމޫޒް ކަނޑު އޮޅީގެ މިނިވަން ކަމަށް ހުރަސް އަޅައި، އެ ސަރަހައްދު ހަތިޔާރެއްގެ ގޮތުގައި އީރާން އިން ބޭނުން ކުރާތީ އެމެރިކާ އިން މިހާރު އަންނަނީ އީރާން ބްލޮކޭޑް، ނުވަތަ ބަންދު ކުރުމުގެ މަސައްކަތް ތަަންފީޒު ކުރަމުންނެވެ. މި މަސައްކަތުގެ ދަށުން މިހާތަނަށް 80 އަށް ވުރެ ގިނަ އުޅަނދެއްގެ މިސްރާބު ބަދަލު ކޮށްފައިވާ ކަމަށް ހޯކިންސް ވިދާޅުވި އެވެ. އީރާން އަށް އެތެރެ ކުރާ އަދި ބޭރު ކުރާ ހުރިހާ ތަކެއްޗެއް އެމެރިކާގެ އަސްކަރިއްޔާ އިން ވަރަށް ގާތުން މޮނިޓަރ ކުރަމުންދާ ކަމަށާއި، ކޮންމެ ވަގުތަކު ކުރިމަތި ވެދާނެ ޙާލަތަކަށް ވެސް އެމެރިކާގެ ފައުޖުތައް އޮތީ ތައްޔާރަށް ކަމަށް އޭނާ ވިދާޅުވި އެވެ. 

ދުނިޔޭގެ ތެލުގެ އެކްސްޕޯޓުގެ ފަސްބައި ކުޅަ އެއް ބައި ހުރަސް ކުރާ ކަނޑު އޮޅީގައި މަސްރަހު ގޯސްވުމާ ގުޅިގެން، ބައިނަލްއަޤުވާމީ ހަކަތައިގެ ބާޒާރަށް ވެސް އޭގެ އަސަރު ކޮށްފައިވެ އެވެ. ގިނަ ކުންފުނި ތަކަކުން މިހާރު ދަނީ އެމީހުންގެ ދަތުރު ފަތުރުގެ މަގުތައް މުރާޖައާ ކުރަމުންނެވެ. މި މައްސަލައިގައި އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ، ހޮރްމޫޒް ކަނޑު އޮޅީގެ ހަމަޖެހުމަކީ ޗައިނާގެ މަސްހަލަތާ ވެސް ގުޅިފައިވާ ކަމަކަށް ވާތީ، އީރާން އަށް ފިއްތުންތައް ކުރިމަތި ކުރުވުމުގައި ޗައިނާ އިން މިއަށްވުރެ ބޮޑު ދައުރެއް އަދާ ކުރުމަަށް ގޮވާލައްވައިފަ އެވެ. 

ސެންޓްކޮމްގެ ތަރުޖަމާނު އިތުރަށް ހާމަ ކުރެއްވި ގޮތުގައި، އެމެރިކާގެ އޮޕަރޭޝަން ތަކުގެ ސަބަބުން އީރާން އަށް ވާގިވެރިވާ ހަނގުރާމަވެރި ޖަމާއަތް ތަކަށް ހަތިޔާރު ފޯރުކޮށްދޭ މަގުތައް ވަނީ ބަންދު ކޮށްފަ އެވެ. ސަރަހައްދީ މަސްރަހު އިތުރަށް ގޯސްވިޔ ނުދީ، އެމެރިކާ އާއި އީރާންއާ ދެމެދު އޮތް ނާޒުކު އެއްބަސްވުން ދެމެހެއްޓުމަށް ބައިނަލްއަޤުވާމީ މެދުވެރިން މަސައްކަތް ކުރަމުންދާއިރު، އެމެރިކާ ސަރުކާރުން ބުނަނީ އަދިވެސް ޑިޕްލޮމެޓިގް މަގުން މައްސަލަ ހައްލު ކުރުމުގެ ފުރުސަތު އޮތް ކަަމަށެވެ. ނަމަވެސް، އަސްކަރީ ގޮތުން އެމެރިކާ އޮތީ އެންމެ މަތީ ތައްޔާރީ ޙާލަތުގައި ކަމަށް ހާމަކޮށްފައިވެ އެވެ.