ސުލްޙައިގެ ބޭނުން ތަކަށް ޔުރޭނިއަމް މުއްސަނދި ކުރުމުގެ ހައްގު އީރާން އަށް އޮންނާނެ: ރަޝިޔާގެ ފޮރިން މިނިސްޓަރު

ސުލްޙައިގެ ބޭނުން ތަކަށް ޔުރޭނިއަމް މުއްސަނދި ކުރުމުގެ ހައްގު އީރާން އަށް ލިބިގެންވާ ކަމަށް، ރަޝިޔާގެ ފޮރިން މިނިސްޓަރު ސަރގޭ ލަވްރޮވް ވިދާޅުވެއްޖެ އެވެ. 

ރަޝިޔާގެ ފޮރިން މިނިސްޓަރު މިހެން ވިދާޅުވެފައިވާއިރު، އީރާން އަށް ޔުރޭނިއަމް މުއްސަނދި ކުރުމުގެ ހައްގު އޮވެގެން ނުވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ގެންދަވަނީ ތަކުރާރުކޮށް ވިދާޅުވަމުންނެވެ. 

ރަޝިޔާގެ ވެރި ރަށް މޮސްކޯގައި އޮތް ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ލަވްރޮވް ވިދާޅުވީ، އީރާން އަކީ ނިއުކްލިއާ ހަތިޔާރު ފެތުރުން ހުއްޓުވުމުގެ އެއްބަސްވުމުގެ މެމްބަރެއް ކަމަށް ވުމުން، ސުލްޙައިގެ ބޭނުމުގައި ޔުރޭނިއަމް މުއްސަނދި ކުރުމުގެ ފުރިހަމަ ހައްގު އެ ޤައުމަށް ލިބިގެންވާ ކަމަށެވެ. 

ލަވްރޮވް އިތުރަށް ވިދާޅުވީ، އެމެރިކާ އާއި އީރާންއާ ދެމެދު ކުރިއަށްދާ މަޝްވަރާ ތަކުގެ މަރުހަލާ އަށް ރަޝިޔާ އިން ނުވަންނާނެ ކަމަށެވެ. ރަޝިޔާގެ އިންޓަފެކްސް ނޫސް އެޖެންސީ އިން ރިޕޯޓު ކޮށްފައިވާ ގޮތުގައި، ވާހަކަ ދައްކާ ފަރާތް ތަކުން އެއްބަސްވެ ޤަބޫލު ކުރާ ހައްލު ތަކަށް ރަޝިޔާ އިން ތާއީދު ކުރާނެ ކަމަށް ލަވްރޮވް ވިދާޅުވެފައިވެ އެވެ. 

މި މައްސަލައިގައި ވާހަކަ ދައްކާ ފަރާތް ތަކަކީ އެމެރިކާ އާއި، އިސްލާމިކް ރިޕަބްލިކް އޮފް އީރާން ކަމަަށް ލަވްރޮވް ފާހަގަ ކުރެއްވި އެވެ. ދެ ޤައުމުގެ ދެ މެދުގައި ޙައްލު ހޯދައި، ސުލްޙަ ޤާއިމު ކުރުމަށް ކުރަމުން އަންނަ މަސައްކަތަށް ރަޝިޔާ އިން ފުރިހަމަ އަށް ތާއީދު ކުރާނެ ކަމަށް ވެސް ލަވްރޮވް ވަނީ ވިދާޅުވެފަ އެވެ. 

ރަޝިޔާގެ ފޮރިން މިނިސްޓަރު ލަވްރޮވް މިހެން ވިދާޅުވެފައި ވަނީ، އެމެރިކާގެ ރައީސް ޓްރަމްޕްގެ ސަރުކާރުން އީރާން އަށް ވަރަށް ބޮޑަށް ޕްރެޝަރު ކުރަމުން އަންނަ ވަގުތެއްގަ އެވެ. އެގޮތުން އެމެރިކާ އާއި ހުޅަނގުގެ ގިނަ ޤައުމު ތަކަކުން ބުނަނީ، އީރާންގެ ނިއުކްލިއާ ޕްރޮގްރާމް ވަގުތުން ހުއްޓާލަން ޖެހޭނެ ކަމަށެވެ. ނަމަވެސް، އީރާން އިން އެކަމަށް އިންކާރު ކުރާތީ އީރާން އާއި އެމެރިކާއާ ދެމެދު ވަނީ ނުތަނަވަސްކަން ބޮޑުވެފަ އެވެ. 

ނިއުކްލިއާ ހަތިޔާރު އުފެއްދުން ހުއްޓުވުމުގެ އެއްބަސްވުމުގެ ދަށުން، އެއްބަސްވުމުގައި ބައިވެރިވާ ޤައުމު ތަކަށް ސުލްޙަައިގެ ބޭނުމުގައި ނިއުކްލިއާ ޓެކްނޮލޮޖީ ބޭނުން ކުރުމުގެ ހައްގު ލިބިގެންވެ އެވެ. ރަޝިޔާ އިން އަންނަނީ އަބަދު ވެސް އެ ހައްގު ތަކަށް ވަކާލާތު ކުރަމުންނެވެ. އަނެއްކޮޅުން ރަޝިޔާ އަކީ އަބަދު ވެސް އީރާން އާއެކު ގާތް ގުޅުމެއް ބާއްވަމުން އަންނަ ޤައުމެކެވެ. 

ބައިނަލްއަޤުވާމީ މުޖުތަމައުގައި އީރާންގެ ނިއުކްލިއާ ޕްރޮގްރާާ ގުޅިގެން ދިގު މުއްދަތަކަށް ކަންބޮޑުވުންތައް ފާޅު ކުރަމުންދާއިރު، އީރާން އިން ބުނަނީ އެ ޤައުމުގެ ނިއުކްލިއާ ޕްރޮގްރާމަކީ ސުލްޙައިގެ ބޭނުމުގައި ހިންގާ ޕްރޮގްރާމެއް ކަމަށެވެ. ރަޝިޔާގެ ފޮރިން މިނިސްޓަރުގެ ވާހަކަ ތަކުން އިނގެނީ، މި މައްސަލައިގައި ރަޝިޔާ އިން އީރާން އަށް ތާއީދު ކުރާ ކަމެވެ.