އީރާާނުގެ ހުށަހެޅުމުގައި ހިމަނާފައިވާ ކަންކަން ހާމަ ކޮށްފި

އެމެރިކާގެ ހުށަހެޅުމަށް ޖަވާބުދީ، އީރާން އިން ހުށަހަޅާފައިވާ ކަންކަން ހާމަ ކޮށްފި އެވެ. 

އެކަން ހާމަ ކޮށްފައި ވަނީ އީރާންގެ ފޮރިން މިނިސްޓަރުގެ ނައިބު އެވެ. އީރާންގެ ރަސްމީ ނިއުސް އެޖެންސީ ކަމަށްވާ، އިރްނާ އިން ރިޕޯޓު ކޮށްފައިވާ ގޮތުގައި، މި ހުށަހެޅުމަކީ ދެ ޤައުމުގެ ދެ މެދުގައި އޮތް ނުތަނަވަސްކަން ކުޑަ ކުރުމަށް އީރާން އިން އެންމެ ފަހުން ހުށަހެޅި ހުށަހެޅުން ތަކެކެވެ. 

އީރާންގެ ފޮރިން މިނިސްޓްރީގެ ނައިބު މައުލޫމާތު ދެއްވާފައިވާ ގޮތުގައި، އީރާނުން އެމެރިކާ އަށް ފޮނުވި މި ހުށަހެޅުމުގައި މައިގަނޑު ތިން ކަމަކަށް ވަނީ ބާރު އަޅައިފަ އެވެ. އޭގެ ތެރޭގައި އީރާންއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތައް އުވާލުމާއި، އެކި ޤައުމު ތަކުގައި ފްރީޒް ކޮށްފައިވާ ނުވަތަ ހިފަހައްޓާފައިވާ އީރާާންގެ ފައިސާ މިނިވަން ކުރުމުގެ އިތުރުން، އެ ޤައުމާ ދެކޮޅަށް ހިންގަމުންދާ ބްލޮކޭޑް ނުވަތަ ހުރަސްތައް ނައްތާލުން ހިމެނެ އެވެ. 

މި ހުށަހެޅުމާ ގުޅޭ ގޮތުން އިތުރު ތަފްސީލު ދެއްވަމުން އީރާންގެ ސަރުކާރުން ބުނެފައި ވަނީ، މިއީ ދެ ޤައުމުގެ ދެ މެދުގައި އުފެދިފައިވާ މައްސަލަ ތަކަަށް ސުލްޙަވެރި ޙައްލެއް ހޯދުމަށް އެޅުނު މުހިންމު ފިޔަވަޅެއް ކަމަށެވެ. ވަކިން ޚާއްސަކޮށް، ބޭރުގެ ބޭންކު ތަކުގައި ހުރި އީރާންގެ ފައިސާ ދޫކޮށްލުމަކީ، އެ ޤައުމުގެ އިޤްތިޞާދު ހަމައަކަށް އެޅުވުމަށް މިވަގުތު ކޮންމެހެން ބޭނުންތެރި ކަމެއްގެ ގޮތުގައި އީރާން އިން ދެކެ އެވެ. 

އެމެރިކާ އިން އީރާންއާ ދެކޮޅަށް ހަރުކަށި ފިޔަވަޅު ތަކެއް އަޅަން ފަށާފައި ވަނީ، 2015 ވަނަ އަހަރު ޤާއިމު ކުރި ނިއުކްލިއާ އެއްބަސްވުމުން އެމެރިކާ ވަކިވި ހިސާބުންނެވެ. އޭގެ ފަހުން އީރާންގެ ތެލުގެ ވިޔަފާރި އަށާއި، ބޭންކިން ނިޒާމަށް އަމާޒުކޮށް ގިނަ ފިޔަވަޅު ތަކެއް ވަނީ އަޅައިފަ އެވެ. މީގެ ސަބަބުން އީރާންގެ އިޤްތިޞާދަށް ބޮޑެތި ގޮންޖެހުން ތަކެއް ކުރިމަތިވެ، ބައިނަލްއަޤުވާމީ ބާޒާރުގައި މުއާމަލާތް ކުރުމަށް ވަނީ ހުރަސް ތަކެއް ކުރިމަތިވެފަ އެވެ. 

އީރާން އިން މިފަދަ ހުށަހެޅުމެއް އެމެރިކާ އަށް ހުށަހަޅާފައި މި ވަނީ، ދެ ޤައުމުގެ ދެ މެދުގައި ނުސީދާކޮށް މަޝްވަރާތައް ކުރިއަށްދާ ދަނޑިވަޅެއްގަ އެވެ. ނަމަވެސް، މި ހުށަހެޅުމާ ގުޅޭ ގޮތުން އެމެރިކާގެ ރިޔާސީ ގަނޑުވަރު ވައިޓް ހައުސް ނުވަތަ ސްޓޭޓް ޑިޕާޓްމަންޓް އިން ރަސްމީކޮށް އެއްޗެއް ބުނެފައި ނުވެ އެވެ. 

މި މައްސަލައިގައި ބައިނަލްއަގުވާމީ މުޖުތަމައުން އުންމީދު ކުރަމުން ދަނީ، މި ހުށަހެޅުމުގެ ސަބަބުން މެދު އިރުމަތީގެ މަސްރަހަށް ހަމަޖެހުމެއް އައިސް، ދެ ގައުމުގެ ދެމެދުގައި އޮތް ގުޅުން ރަނގަޅު ވެގެން ދިއުމަށެވެ. އީރާން އިން ބުނަމުން ދަނީ އެ ގައުމުގެ ހުށަހެޅުމަކީ އިންސާފުވެރި އަދި އަމަލީ ގޮތުން ތަންފީޒު ކުރެވޭނެ ކަންތައް ތަކެއްގެ މައްޗަށް ބިނާވެފައިވާ ހުށަހެޅުމެއް ކަމަށެވެ.