ހިސޯރު ހުއްޓާނުލައިފި ނަނަ، އޮމާން ކަނޑަކީ އެމެރިކާ އަށް ސަހަރާ އަކަށް ވާނެ: އީރާން

އީރާންގެ ބަނދަރުތައް ބަންދުކޮށް އެމެރިކާ އިން ހިންގަމުން އަންނަ ހިސޯރު ކުރުންތައް ހުއްޓާނުލައިފި ނަމަ، އޮމާން ކަނޑަކީ އެމެރިކާގެ ސިފައިންގެ ސަހަރާ އަކަށް ވެގެންދާނެ ކަމުގެ އިންޒާރު އީރާންގެ އިސް އޮފިޝަލަކު ދެއްވައިފި އެވެ. 

މި އިންޒާރު ދެއްވާފައި ވަނީ އީރާންގެ އެކްސްޕީޑިއެންސީ ކައުންސިލްގެ މެމްބަަރު އަދި އީރާންގެ ރިވޮލިއުޝަނަރީ ގާޑް ކޯޕްސް (އައިއާރުޖީސީ)ގެ ކުރީގެ ކޮމާާންޑަރު މުހްސިން ރިޒާއީ އެވެ. އީރާންގެ ދައުލަތުގެ ޓީވީ މެދުވެރިކޮށް ވާހަކަ ދައްކަވަމުން ރިޒާއީ ވިދާޅުވީ، އޮމާން ކަނޑަކީ އެމެރިކާގެ ސިފައިން ވަޅުލާ ތަނަކަށް ވުމުގެ ކުރިން، އީރާންގެ ބަނދަރުތައް ހިސޯރު ކޮށްގެން ތިބި ތިބުން ނިމުމަކަށް ގެންނަން އެމެރިކާގެ ސިފައިންނަށް ނަސޭހަތްތެރިވާ ކަމަށެވެ. 

އެއާ އެކު އޭނާ ވިދާޅުވީ، އީރާންގެ އަސްކަރިއްޔާ އޮތީ ކުރިމަތި ވެދާނެ ކޮންމެ ހަމަލާ އަކަށް ވެސް، އަދި ކުރިމަތިލުން ތަކަކަށް ވެސް ފުރިހަމަ އަށް ތައްޔާރަށް ކަމަށެވެ. އީރާން އިން އޮތީ އެއްވެސް ކަމެއް ފަސް ޖެހި، ދޫދޭ ގޮތަށް ނޫން ކަމަށް އޭނާ ވަނީ ވިދާޅުވެފަ އެވެ. 

އެމެރިކާ އިން އީރާންގެ ބަނދަރުތައް ހިސޯރު ކޮށްފައި އޮތް އޮތުމަކީ، ހަނގުރާމައިގެ އަމަލެއްގެ ގޮތުގައި ރިޒާއީ ސިފަ ކުރެއްވި އެވެ. އޭނާ ވިދާޅުވީ މިފަދަ އަމަލުތަކާ ދެކޮޅަށް ތެދުވުމަކީ އީރާން އަށް ލިބިގެންވާ ފުރިހަމަ ހައްގެއް ކަމަށެވެ. މީގެ އިތުރުން، އެމެރިކާ އިން ކަނޑުގެ މަގުން އީރާން ހިސޯރު ކޮށްފައި އޮންނަ އޮތުން ދިގު ދެންމި ވަރަކަށް، ދުނިޔޭގެ އެކި ޤައުމު ތަކަށް ލިބޭ ގެއްލުންތައް ބޮޑުވަމުން ދާނެ ކަމަށް ވެސް އޭނަ ފާހަގަ ކުރެއްވި އެވެ. 

ހަނގުރާމަ ހުއްޓާލުމާ ގުޅޭ ގޮތުން ކުރިއަށްދާ މަޝްވަރާތަކާ ބެހޭ ގޮތުން ވާހަކަ ދައްކަވަމުން ރިޒާއީ ވިދާޅުވީ، އެމެރިކާ އަކީ އިތުބާރު ކުރެވޭ ފަރާތެއްކަން އަމަލުން ދައްކަން ޖެހޭ ކަމަށެވެ. މިހާރު އޮތް ޙާލަތުގައި އެމެރިކާ އަކީ އިތުބާރު ހުރި ބައެއްކަން ސާބިތު ކޮށްދޭން ޖެހޭނީ އެމެރިކާ އަމިއްލަ އަށް ކަމަށް ވެސް އޭނާ ވިދާޅުވި އެވެ. އަދި އީރާންގެ ޑިޕްލޮމެސީގެ މަސައްކަތްތައް ކުރިއަށްދާ ވަގުތުގައި ވެސް، އީރާންގެ ހަތިޔާރު އެޅި ފައުޖުތައް ތިބީ ބަޑީގެ ގާފިލާގައި އަތްލައިގެން، ކޮންމެ ވަގުތެއްގައި ވެސް ހަމަލާ ދޭން ތައްޔާރަށް ކަމަށް އޭނާ ވިދާޅުވި އެވެ.

އެމެރިކާ އިން އީރާންގެ ބަނދަރުތައް ހިސޯރު ކޮށްފައި ވަނީ މިދިޔަ އޭޕްރީލް މަހުގެ 13 ވަނަ ދުވަހު އެވެ. އެމެރިކާާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނީ، އޭނާ ބޭނުންވާ ޝަރުތުތަކުގެ މަތިން އީރާން އިން ސުލްޙައިގެ އެއްބަސްވުމަކަށް އަންނަންދެން މި ހިސޯރު ކުރުންތައް ދެމި އޮންނާނެ ކަމަށެވެ. ނަމަވެސް، އީރާން އިން ބުނަނީ އެމެރިކާގެ އެއްވެސް ފިއްތުމަކަށް އެ ޤައުމުން ބޯ ނުލަނބާނެ ކަމަށެވެ.